Россиялъул ва Шималияб Кавказалъул эскпертаз батIи-батIияб къимат кьолеб буго МахIачхъала шагьаралъул мэр СагIид Амиров туснахъ гьавиялъе ва щив вачIинев гьесул бакIалд тахшагьаралъул бетIерлъун абураб суалалъе.
Гьал къоязда Ростов мухъалда гIагарлъухъ чIван ратун руго Дагъистаналдаса кIиго чи. Гьел рукIун руго боцIи бичун босизе къватIире рахъарал Буйнакск мухъалъул Гъадар росулъа чагIи. ЧIваразул жаназаби ратун руго гьезухъ букIараб «Камазалда» жанир, бикъун буго гьезухъ кодоб букIараб кIиго миллион гIанасеб гIарацги.
МахIачхъалаялда гIемерлъулел руго тахшагьаралъул нухмалъулев СагIид Амиров цIех-рехчагIаз туснахъ гьавиялде дандечIарал акциял. Гьесул рахъ ккун улкаялъул нухмалъиялде кагъат битIун буго Халкъияб Мажлисалъул къоло лъабго депутатасцин. Амма гьелдаго цадахъго МахIачхъалаялъул мэр вачун иналдаса бугеб жидерго кIудияб рохел загьир гьабулелги дагьал гьечIо.
Араб соналъул марталда Гъизляралда вацал ХIамзатовал чIваялда тIасан цIех-рех гьабиялъул ишалда сверун цIияб багъа-бачари унеб буго Дагъистаналда гьал къоязда. ЧIваразул гIага-божаразул гьариялда рекъон, гьеб такъсиралъул цIех-рех гьабиялъул иш тIаде босун букIана улкаялъул Жанубияб Федералияб мухъалда бугеб цIех-рехалъул комитеталъ, амма чанго моцIалъ цебе Дагъистаналъул цIех-рехалъул идараялде тIад буссинабун буго гьеб. ЧIваразул гIага-божаразул адвокатазе хIинкъаби кьолел хIужабиги загьирлъун руго цадахъго.
Араб анкьалда жаниб Дагъистаналда чIван вуго 10 чи, гьезулги щугояв июнь моцIалъул тIоцересел къоязда. Масала, Гъарабудахкент мухъаладаса чиясул автомобиль батун буго гьесул гIагараб росдада аскIосан унеб шагьранухда бухIун. Цогияс полициялъ кквеларедухъ живго жинцаго кьвагьизавун вуго. Гьединал руго низам цIунулезул баянал.
«Дагъистаналъул Авиалинии» компаниялда гIагараб заманалда рукIине бегьула гIиси-бикъинал хиса-басиял. Аслияб куцалда гьел хурхарал рукIине руго гьаваялдасан роржаралъухъ росулел багьабазда, тIадеги багьаял аэропланал росиялда, гьединго республикаялъул аэропорталде хIалтIизе бачIине буго цоги цIияб авиакомпанияги. Гьел ва цогидалги аэропорталъул хIалтIуда хурхарал кIвар бугел хIужабазул бицунеб букIана хамиз къоялъ гьеб идараялъул нухмалъиялъ тIобитIараб пресс-конференциялда.
Дагъистаналда цIикIкIунел руго гIадамал тIагIиналъул ва гьел рачун иналъул хIужаби. Дагьал церегIан къояз рокъоса къватIире ун щибниги хабар гьечIого тIагIун руго Буйнакскиялъул педагогикияб колледжалда цIалулей йикIарай кIиго яс. Гьебго Буйнакск шагьаралда кIиго анкь гIанасеб заманалда жаниб викъун ун вуго лъабго чиги. Инсанасул ихтиярал цIунулез абулеб буго цере рукIарал гьединал хIужабазда дандеккун рикъун аразул гIемерисел гьоркьоб заман ун хадуб ратулел ругин гьанжеян.
Пачалихъияб Думаялъ хIадур гьабулеб буго гьанже руччабазги васазго гIадин армиялда хъулухъ гьабизе рес кьолеб къанун. Армиялде ахIулел гIолилал васазул къадар дагьлъулеб букIиналда бан рачIун руго депутатал гьединаб къанун хIадур гьабиялде. Кинаб пикру бугеб гьеб къануналда тIасан жалго руччабазулали лъазе гьезул цо-цоязулгун гара-чIвари гьабуна «Эркенлъиялъ»
Россиялъул киналго регионазда итни къоялъ унел рукIана цогояб пачалихъалъул экзамен кьеялъул тадбирал. Дагъистаналда жакъа гьеб экзамен кьолеб букIана 30 800 гIанасев гIолилал васаз ва ясаз. Церего гIадин гIемерисел эбел-эмен рази гьечIо цогояб пачалихъалъулаб экзамен тIобитIизе гьабураб хIукмуялда, амма жалго экзамен кьолез ва мугIалимзабаз абулеб буго гьелъул мунпагIатлъи цIикIкIараб бугин цIализе лъугьунел гIолилазеян. Республикаялда цогояб пачалихъалъулаб экзамен кьолеб куцалда хадуб халккуна «Эркенлъиялъ»
Апрель моцIалдаса байбихьун Дагъистаналъул чанго мухъазда кьун гьечIо мугIалимзабазул моцIрол харжал. Мухъазул гIарац бикьа-къотIулел идарабаз дагIба балеб буго республикаялъул финансазул министерлъиялъ жидехъе гIарац битIун бачIинчIилан. Финансазул министерлъиялъ гIаксалда гIайиб гьезде жидедего бугъулеб буго.
Гьаб анкь хIалуцарал лъугьа-бахъиназдалъун байбихьана Дагъистаналда. Итни къоялъ МахIачахъалаялда ккарал вахIшиял такъсиразда хадусел къоязда цIиял харбал криминалиял темабаздалъун байбихьана республикаялда.
МахIачхъалаялъул Советский мухъалъул диваналъ кIиго моцIалъ жанир тIамизе хIукму къотIун буго ХIамзатов МахIачиеги, ГIашурбегов Зауриеги. Гьезде гIунтIизабулеб буго изну гьечIого яргъидгIуцIаразе кумек гьабулеб букIанилан абурабги гIайиб. Жанир тIамуразул гIагарлъиялъги гьезул адвокатазги абулеб буго гьеб провокация бугин. Цо-цо баяназда рекъон, жанир тIамурал рухулелги руго.
Дагъистаналъул нухмалъулес гьал къоязда лъазабуна республикаялъул тIолалго мажгитазул имамзабазул аттестация гьабизе кколин. Гьеб пикруялъул рахъ кколеб буго ислам лъазабиялда сверухъ хIалтIи гьабулеб централъул вакилзабазги. Амма Дагъистаналъул рухIияб идараялъги гьединго мухъазул имамзабазул нухмалъулелги разиял гьечIо гьелда.
Чиясул миллаталдехун яги диналдехун рокьукъаб бербалагьи загьир гьабурал гIадамал хIукматалъул жавабиял хъулухъазадаса эркен гьаризе ккелъул суал борхун букIана дагьаб цебегIан улаялъул регионал церетIеялъул министерлъиялда тIобитIараб данделъиялда. Улкаялъул политолгазугун экспретазул цоккураб пикру гьечIо гьеб суалалда тIасан.
Дагъистаналъул хIукуматалда унел руго кадровиял хиса-басиял. Гьал къоязда заманаялъ дагъистаналъул нухмалъулевлъун вугев ГIабдулатIипов Рамазаница хъулхъалдаса эркен гьавуна вице премьерлъун вукIарав МухIамадов Юсуп. Гьеб хъулухъалде тIамилалде гьев хIалтIулев вукIана Новолак мухъалъул нухмалъулевлъун. Нижехъе щварал цогидал баяназда рекъон гIагараб заманалда хIалтIудаса рахъизе бегьула гьединго батIи-батIиял министерлъиялъул нухмалъулелги. Кинаб къимат кьолеб буго гьел хиса-басиязе экспертазали абураб суалалда тIасан цIех-рех гьабуна «Эркенлъиялъ».
Дагьалъ цебе Украиналдаса ругьел бачІун буго рагъда бакІ лъачІого тагІун вукІарав СалтІаса Къураев Сайпудинил жаназа батанин абураб. Гьелде тІаде ккун руго Одессаялда аскІоб бугеб Холодная Балка росдал рагІалда Одессаялдаса Сергей Удаловас ва Василий Инченкоца нухмалъулеб «Воинская доблесть» абураб хасаб цІех-рех гьабулеб къока. Къураевасул хутІелал ватІаналде щвезарун хадуб гьал къоязда СалтІа тІобитІана гьев вукъиялъул тадбир. Нижер мухбир Юсупов Ашаханил репортаж.
ТIолгодунялалъул журналистазул ихтиярал цIуни абураб гIуцIиялъ хIадур гьабураб рейтингалда бищунго журналистазул хIалтIуе хIинкъи цIикIкIарал улкабазда гьоркьоб ичIабилеб бакIалде бачIун буго Россия. Аслияб куцалда гьеб рейитнг хIадур гьабун буго чIварал журналистазул такъсир рагьиялъул хIасилазде балагьун. ЦIез-рехаз бихьизабулеб буго цониги гьединаб такъсир рагьун гьечIеблъи Россиялда. Кинаб ахIвал-хIалха бугеб гьелъул рахъалъ Дагъистаналда?
Дагъистаналда халат бахъунеб буго Гъизляр шагьаралда дагьалъ церегIан къояз бертадул гIахьалчагIаздаги полициялъул хIалтIухъабаздаги гьоркьоб ккараб рагъулаб тунка-гIусияллда сверухъ бугеб ахIи-хIур.
Россиялда жакъа кIодо гьабулеб букIана ТIоцебесеб маялъул байрам. Улкаялъул чанго шагьаразда тIоритIана батIи-батIиял тадбирал, демонстрациял дандеруссинал. Совет хIукуматалъул заманалда тIолгозахIматчагIазул аслияб байрам ракIалде щвезабуна Дагъистаналдаги. Кинаб къагIидаялъ гьеб къо республикаялда кIодо гьабурабали цIех-рех гьабуна Эркенлъи Радиоялъул мухбирас.
30 апрелалда Дагъистаналъул нухмалъиялъул минаялда цере ракIарун рукIана Гъарабудагъкент мухъалъул Къакъашура росдал гIадамал. Амма гьезие рес щвечIо республикаялъул нухмалъулелгун дандчIвазе. Чанго сон буго жидерго ихтиярал цIунун батIи-батIиял идарабазде гьел хьвадулел ругелдаса.
Загрузить еще
