Лъица ва щай чlварав Аджиев Юсуп?

Аджиев Юсуп чIвана Хасавюрт шагьаралда мажгиталда цеве. Щивали лъаларев чияс гIадамазда цеве вачIун 15 нухалъ речIчIун буго. АскIор рукIараз бицухъе, такъсирчиясул гьумер бахчун букIинчIо, цо-цоязул баяназда рекъон гьев гIемер заманаялъ валагьун вукIана Юсуп вачIиналъухъ. ЦIех-рехалъул идараялда лъазабуна такъсиралда хурхун уголовияб хIалтIи гьабун бугин, цIех-рехалъулал хIалтIаби унел ругин. Кинаб бугеб гьезул пикруялда рекъон такъсир гьабиялъе гIилла ва кинал хIалтIаби гьарулел ругел абурал суалазе жаваб щвечIо.

ГIажаиблъи гьабизе ккараб хIужа ккун буго Юсуп чIвалелде. Гьев цIунулев Алевдинов Руслан Хасавюрталъул полициялъ ккун вуго ва жеги къватIиве виччан гьечIо. ГIагарлъиялъул пикруялда рекъон, гьев ккун вуго Юсуп чIвазе бигьалъи букIиналъе гIоло. «Эркенлъи» радиоялъе гьелъул хIакъалъулъ бицана чIвара Аджиев Юсупил имгIал Аджиев ГIусманица.

Аджиев ГIусман: «ТIоцеве Юсуп цIунулев вас ккун полициялде вачана, жидеего Юсуп чIвазе бигьалъи букIиналъе гIоло. Цадахъ цоги чIи вукIунаан Юсуп цIунулев, гьевги гьес щиб ккараб, щай дов вачун аравали лъазе досда хадув витIун вукIана. Гьедин, цохIо хутIарабго чIвана гьев. Дида ккола гьеб такъсир рагьизе бокьун гьечIин лъиениги ва гьеб рагьиялда дун божуларо. Юсуп цIунулев чи гIиллаго гьечIого полициялъ кквеялдаса бичIчIулеб буго такъсир рагьизе гуреб, гьеб гьабизе цIикIун хIалтIулеб букIин полицияги цIех-рехалъул хIалтIухъабиги. Гьес цо лъие бугониги кIудияб квал-квал гьабулеб букIана жиндир гIадамазда ва хасго гIолилазда гьоркьоб бугеб къадруялдалъун. Бицунеб букIана Хасавюрт мухъалъул нухмалъуде кандидатура лъейин, гьесда гьарулеб букIана, амма гьев живго политикаялдаса рикIкIад чIун вукIана».

Гьединго Аджиев ГIусманица бицана Юсупил цониги чиясулгун рокьукълъи букIинчIин, киназулгун лъикIал гьоркьорлъаби рукIанин. Гьесул пикруялда рекъон гьев чIваялъе политикияб гIилла буго, тIалъиялда ругезе рекIее гIолеб букIинчIо хъулухъалда гьечIониги гьесул бугеб машгьурлъи ва халкъалда гьоркьоб бугеб къадру.

Гьединабго пикру загьир гьабуна лъарагIазул «Майдан» абураб газеталъул бетIерав редактор Мирзаев ХIажица. «Ахираб заманалда Хасавюрт мухъалда гIолилазда гьоркьоб кIудияб къадру бугев Аджиев Юсуп кида-къадги гьез тIалъиялде вачун вачIине вукIана. 2010 соналъ рукIарал рищиязда Юсупица нухмалъулесул хъулухъалде жиндирго кандидатура лъечIо, доб мехалъ вукIарав республикаялъул президентасул гьариялда рекъон», - илан абуна гьес «Эркенлъи» радиоялъе.

40 сон барав Юсуп Аджиев лъарагIазул гIолохъанаб гIелалъул нухмалъулевлъун рикIкIунев вукIана гIемерисел экспертаз. Цевеккун гьев вукIана Хасавюрт мухъалъул депутатлъун ва «Межрегионгаз» абураб идараялда хIалтIулев. Ахираб заманалда кивниги хIалтIулев вукIинчIо. ТIоцеве гьес живго загьир гьавуна 2005 соналъ жиндир росулъ Тотурбийхъалаялда ккараб кьвагьа-гIанхъиялда. Доб мехалъ Чачаналдаса бачIараб хасаб рагъулаб къокъаялъ сверун ккун букIан Юсуп Аджиевасул рукъ, валагьулев вукIан гьесул вац СултIан Аджиев. Амма гьез гьабураб дандечIеялъул хIасилалда Чачаназул къуваталъул идарабазул кIиго хIалтIухъан чIван вукIана.

Юсуп Аджиевасул гьудул Сиражудин ГIалиевасул пикруялда рекъон, гьеб лъугьа-бахъиналдаса ва хадурккун рукIарал цоги ишаздаса хадуб гьесул машгьурлъи халкъалда гьоркьоб цIикIкIунеб букIана. ГIемерисез гьев рикIкIунев вукIана лъарагIазул цIияв миллияв цевехъанлъун. КинабгIаги политикаялда ва пачалихъиял хъулухъазда вукIинчIолъиялъ гьесул къадру жеги цIикIкIунеб букIана.

«Кумыкия.ру» абураб лъарагIазул сайталда гIемерисез Юсуп Аджиев чIвай бухьинабулеб буго политикаялда, амма цо-цояз бицунеб буго гьев чIваялъе гIилла букIун батизе бегьулин доб 2005 соналъ гьесул росулъ ккараб кьвагьа-гIанхъи. Гьелдаса хадубги Юсуп чIвазе бокьараз гьесде гьужумал гьарулел рукIана, гьелъ чIезарун рукIана гьев цIунулел чагIигиян хъалеб буго.