Рузман къоялъ Унсоколо росдал Майданское росулъе рачIун рукIана Дагъистаналъул муфтий АхIмадхIажиги муфтияталъул цоги хIалтIухъабиги. Гьезул мурад букIана майданское росулъ цIияв имам тей. Гьеб росдал имамлъун гьанже тун вуго Шамил мухъалъул Бакълъухъ росулъа МухIамадов МухIамадрасул.
Унсоколо мухъалдаса нахъе ана гьаб анкьалда гьениб тIобитIараб хасаб операциялъул къуватал. Амма гьенир гьанжеги хутIулел рагIула блок-постал. Официалияб лъазабиялда рекъон, къватияб операциялъул хIасилалда хвана Майданское росулъа экстремисталлъун рикIкIарав 7 чи ва цо ОМОНалъулав. Гьебго росулъ низам цIунулезул къуватазул хIалтIухъабаз кьвагьизабуна 7 мина ва мадрас. Гьениса рачIарал суратазда рихьизарун руго гьадамазул рукъзабазул чIватIелал.
Итни къоялъ 8 июлалъ Унсоколо мухъалъул Майданск росулъ россиялъул аскарияз кьвагьизабун буго анкьго чиясул жалго бетIергьанал минаби ва чIван вуго кIиго чи рохьилалин абулезул.
Унсоколо мухъалда рузман къоялъго байбихьараб хасаб операция халат бахъунеб буго ва жакъаялде гьенив чIван рагIула кинавгIаги анлъго чи.
Дагъистаналъул Унсоколо мухъалъул Балахьуни, Майданское ва Зирани росабалъ шамат къоялдаги халат бахъунеб букIана цебесеб рузман къоялда байбихьараб контртеррористияб операциялъул низам.
4 июлалъул радал Унсоколо мухъалъул Балахьуни росдада тIад тиризе байбихьун буго щуго рагъулаб тирелоялъ ва росулъе жанире лъугьун руго гьурмазда маскаби хурал аскариязул батIи-батIиял автомашинабазда рекIарав 1500 –гIан чи. Росдал гIадамазул баяназда рекъон, цебесан ккун щибаб рокъоре лъугьун гьез чIухь балеб буго рукъзазул хважаиналги нуцIа бахун жанире ричIчIачIого.
Унсоколо мухъалъул ХарачIи росулъ чIван вуго кIиго лъимадул эмен. Полициялъул баяназда рекъон, гьев чIваялъе гIиллаби кинал рукIаралали гьезда жеги лъалел гьечIо.
Хамиз къоялъ 6 июналъ радал сагIат анцIго тIубан къого минут араб мехалъ Унсколо мухъалъул Шамилхъалаялда живго бетIергьанаб автомашинаги кьвагьун чIвана полициялъул сержант, 25 сон барав Рихьуниса ХIажиев МахIач.
19-апрелалда Унсоколо мухъалда рагъулазул I5 аскарияв тIад рекIараб Урал автомашина кьабун буго бакIалъул гIадамазул Нива-Шевроле ва Жигули 6 автомашиназда. Гьезул щугояв ва бакIалъул гIадамазул цояв лъукъун азарханаялде щвезарун руго.
Унсоколо мухъалъул Унсоколо росдадаса бакъбаккул рахъалдехун 4-го километралъ рикIкIад бугеб полициялъул блогпосталде 12 апрелалъул сардилъ щалали лъаларел чагIи автоматаз, пулеметаз кьвагьдон руго. Полициялъул посталда дандбитIун буго Унсоколо росдал жамагIаталъ гIуцIараб хъаравуллъиялъул постги.
16-абилеб марталъул къасде сагIат 10 тIубалеб заманаялда Буйнакск шагьаралдаса Генуре рачIунаго, Ишкартали росулъехун сверулеб бакIалда кьвагьун буго Генуса ХIажигIабдулаев Базарганил живго бетIергьанаб Мерседес джип.
Шамат къоялъ ГIашилтIа вукъана цебесеб сордоялъ щалали лъаларев анкьго чияс хвезегIан вуханав гIолохъанчи.
Дагъистаналъул Унсоколо мухъалъул Балахьуни, Рихьуни росабазул сверухълъиялда лъабабилеб къо буго рохь бухIулеб бугелдаса.
Унсоколо мухъалъул Балахьуни росдал гIадамал 13 матарлда радал рорчIилалде хIухьел цIазе кIвеларедухъ росдада тIад кIкIуй бетун батун буго. Гьелъие гIиллалъунги ккун буго цебесеб талат къо 12 марталъул бакъанида рохьазде россиялъул аскариял кьвагьдеялъул хIасилалда рохьазда цIа рекIин.
