Рузман къоялъул къалъудаса нахъеги Балахьуниса къватIире ва гьенире жанире щивго виччалев вукIинчIо. Хасаб операция тIобитIулеб бакIалда свинабун буго канлъи. Гьенир ругел гIадамазул баяназда рекъон, аскарияз рукъзабахъе рачIун чIухь балеб буго кинал рукIаниги гIадамал аскIоре къазеги течIого, нугIзалги гьечIого. ЧIухь балеб рукъалъул бетIергьаби чIезарун рукIунила нуцIида кIалтIа тIаде ярагъги битIун.
аскарияз абулеб бугила рохьахъ рахчарал лъутутIа ругел, къануналде данде кколареб куцалда яргъидгIуцIарал чагIи ралагьулел ругин жидецайин.
Майданское росулъа бахъараб Зиранибе щвезегIан киса-кирего лъун ругила аскариял гIалахаздаги, нухаздаги, щобаздаги. ТIад сверулел тирелоялги ругила рогьаралдаса.
Щибаб азбаралъуре рачIун щибаб рокъоре жанире раккун щивасул шифанер букIа, шкаф букIа, цоги нахъе лъураб хъамас букIа-кинабгIаги жаниб ярагъ яги цоги щибниги балъголъи цIунизе бегьулеб бакIалъе раккулел ругила, киса-кибего бакIал хъирщулеб бугин лъазабулеб буго росдал гIадамаз.
Росдал бегавуласул, мухъалъул бетIерасул яги мухъалъул полициялъул нухмалъиялъул рахъалъан гьениб кколелда хурхун жидеда щибниги лъазабичIинги абулеб буго гIадамаз. ТIелефоналдасан берцинго бухьен гьабизеги гьелгун бажарулеб гьечIо. Рогьаралдаса цо телефналъ гурони жаваб кьечIо.
Гьел аскарал кида нахъе ине ругелалиги гIадамазда лъалеб гьечIо.
