ГIисинал миллатазул ихтиярал цIуниялда тIасан Дагъистаналъул жамгIиял церехъабазул хIаракатчилъи цIияб даражаялде баханин абизе бегьула. Гьал къоязда Дагъистаналде сапар бухьана Европарлманталъул вакилзабаз. Лезгиязул федералиябгун миллияб автономиялъ гьабураб хIалтIул кIудияб хIасил ккола гьеб. Жидерго сапаралъул аслиял мурадазул хIакъалъулъ бицине журналисталгун дандчIвана гьел 28 августалда.
Каспийскалда араб рузман къоялда рагьана халкъазда гьоркьосеб «Каспий ХIалал-ЭКСПО» абулеб экспозиция. Тадбиралъул гIуцIарахъабазул мурад буго Дагъистаналда хIалалаб куцалда квен, ретIел хьит цогидабги къайи-цIа киналго рахъаздаса лъикIабги пайдаябги букIин бихьизаби. Экспозицялда жидерго кванил нигIматал ва цогидабги магIишаталъул бутIаялъул тайпаби рихьизаруна Дагъистаналъул батIи-батIиял мухъаздаса ва шагьараздаса вакилзабаз.
Сентябралъул къоло микьабилеб къоялъ аза-азар Дагъистанияз зиярат гьабизе буго Кавказалъул рагъалъул бищунго машгьураб тарихияб нугI – АхIулгохIде. Машгьураб магIарде гьаб соналъ гьабулеб зиярат кколеб юбилеялъулаб зияратлъун.
Къоло кIиабилеб август ккола Дагъистаналъе 20-гIан соналъ нухмалъи гьабурав ва Сталинил депортациялдаса республикаялъул халкъал цIунарав чилъун рикIкIунев Даниялов ГIабдурахIман гьавурав къо. Хамиз къоялъ машгьурав дагъистанияв ракIалде щвезавизе МахIачхъалаялда гьесие лъураб монументалде цере данделъун рукIана гIемерал гIадамал.
Буйнахъскалда чIван вуго цо ва лъукъун вуго цойги аскарияв. Гьедин лъазабулеб буго Дагъистаналъул жанисел ишазул министерлъиялъ. Талат къоялда гьебго шагьаралда тIобитIараб хасаб операциялъул хIасилалда хваразул къадар, мухIкан гьарурал баяназда рекъон, бахунеб буго ичIго чиясде ва гьездаго гьоркьов рагIула яргъидгIуцIаразул лидерин абулев вукIарав Шейхов Бамматханги.
Кавказалда ругел пачалихъиял хIакимзабазул къадар дагь гьабизе ккола. Гьедин абуна итни къоялда Пятигорскалда букIараб Россиялъул хIукуматалъул вакилзабазул данделъиялда улкаялъул финансазул министр Антон Силуановас. Гьеб данделъиялда гьоркьор лъун рукIана суал Шималияб Кавказалъул федералияб икълим социалиябгун-экономикияб рахъалъ цебетIеялъул суалал. Щайха дагьлъизабизе кколеб кавказалда пачалихъиял хъулухъчагIазул къадар?
Дагъистанлъул Буйнакск шагьаралда талат къоялъ радал тIобитIараб хасаб операциялъул хIасилалда чIван вуго щуго изну гьечIого яргъид гIуцIарав. Гьедин лъазабулеб буго низам цlунулез. Къокъаб заманалда жаниб Дагъистаналда тIобитIараб лъабабилеб хасаб операция ккола гьеб.
«ГIела Кавказ кваназабураб!» абураб гIурус миллатчагIазул игIлан улкаялъул бюджет кин бикьулеб бугебали яги лъаларел яги лъаниги, ургъунго ахIвал-хIал хIалуцинабизе бокьараз ахIулеб бугин рикIкIунеб буго журналист Дмитриев Игорица «Россиялъул бюджет кунеб Кавказалъул хIакъалъулъ маргьу» абулеб макъалаялда. Гьесул пикруялда гьеб бюджет Кавказалдаса щуго нухалъ цIикIкIун кунел регионал гIемерал руго улкаялда. Кваназабулеб бугищха Россиялъ Кавказ?
Дагъистаналъул «Хъвадарухъабазул Цолъиялъул» вакилзабаз Президент ГIабдулатIипов Рамазанихъе рагьараб кагъат хъвана гьал къоязда. Кагътида гьез гьарулеб буго гIорхъолъара рорчIарал ишал гьаризе лъугьараб печаталъул ва информациялъул рахъалъ министерлъи гIадлуялде цIайилан. Жидеда гIайиб гьечIилан абулеб буго гьеб рехсараб министерлъиялъ. Кинал дандеккунгутIиял гьел кIияздаго гьоркьор ругелали бицунеб буго гъоркьехун.
Дагъистаналдаса бизнесчагIазе нух кьезе ккола хIалалаб бацIцIадаб кванил нигIматал гIезаризе. Гьеб масъала гIумруялде бахъинабиялъе гIемераб гIарац хIажат буго жакъа республикаялъе. Гьелъие ругел ресазул журналистазе бицине арбагI къоялъ МахIачхъалаялда данделъун рукIана «Каспий-ХIалал» абураб гIуцIиялъул вакилзаби.
Унсоколо мухъалда бугеб лъималаз хIухьбахъи гьабулеб бакIалъул нухмалъулелда тIад такъсир гьабиялъул иш рагьиялда сверун кIудияб ахIи-хIур бахъун буго Дагъистаналда. Пачалихъги махсароде ккун гьелъ хъулухъалдаса пайдаги босун чанго миллион гъурущ гIарцул бетIергьанлъун яхъине къасд гьабун букIиналъул гIайиб гIунтIизабулеб буго гьелде улкаялъул Генералияб прокуратураялъ.
Гьал къоязда Пятигорск Шагьаралъул Машук магIарда тIобитIизе буго кIудияб тадбир. Шималияб Кавказалдаса гIолилазул форум. Санайилго гIадин гьеб тадбиралда гIахьалъи гьабизе буго Дагъистаналдаса гIолилал васазги ясазги. Гьезул тIоцебесеб къукъа сапаралъ бахъине буго талат къоялъ.
МахIачхъалаялъул «Анжиялда» сверун бахъараб ахIи-хIуралъул дандерижи жеги гIодобцун гьечIо Дагъистаналда. Клубалдаса нахъе унел руго цIакъго гIемераб гIарацги кьун гьенире росун рукIарал футболистал. ГIагараб заманалда хъулухъалдаса рахъизе ругилан абулеб буго нухмалъиялъул рахъалдаса жавабиял хIалтIухъабиги.
КватIичIого Дагъистаналда букIине буго жибго жиндаго чIараб авиакомпания. Гьелъ рес кьезе буго регионалда жанисел гьединго магистралиял рорженал гьаризе. Гьелъ рес кьезе буго гIадамазе хIалтIулел бакIал чIезаризеги, гьаваялдасан роржаралъухъ босулеб гIарацги гьркьохъеб багьаялда чIезабизе. Дагъистаналъул аэропорт букIинеселде кинал галабиги тIамун унеб бугебали бицунеб букIана гьел къоязда гьеб идараялъ журналисталгун гьабураб дандчIваялда.
Жакъа къоялда бакIал раялда сверухъ Дагъистаналда лъугьараб бичIчIизе захIматаб ахIвал-хIалалъул бицине июлалалъул ахиралда «Черновикалъул» конференц-залалде данделъана ралел бакIазда жидерго гIумру бухьинабурал чагIи. Бицунеб букIана жакъа гIемертIалаял минаби ралел бакIазул хважаинзаби- бечедал хIакимзабаз гьабулеб бугеб кIудияб заралалъул. Аслияб кIвар кьолеб букIана гьалдаса хадуб ралел бакIазул бизнес Дагъистаналда цебетIеялъе ругел масъалабазде.
МахIачхъалаялъул мажгиталъул имам Ильясов Ильяс-хIажи чIваялда сверун тIубараб бахIс унеб буго Дагъистаналда. 62 сон барав Ильяс-хIажи чIвана араб шамат къоялъ къаси мажгиталде вачIунаго нухда. Дагъистаналъул муфтиясул хъулухъ сабаблъун гьабураб чIвай-хъвей кколин гьебилан абулеб буго цо-цо Россиялъул экспертаз. Республикаялъул рухIияб идараялъ гьеб кинабго гьереси букIин баян гьабулел хIужаби рехсана.
Хасавюрт мухъалъул ЦIиябсасикь росдал мадраса къазе хIукму гьабуна гьал къоязда гьеб мухъалъул дивнханаялъ. Мадраса хIалтIизе лъугьаралдаса бан букIун буго гIицIго цо лъагIелги хадубги заман. Гьелда разигьечIолъи загьир гьабун прессаялдасан церерахъун ахIи-хIур бахъинабуна гьеб росдал гIадамаз.
Дагъистаналъул ТIадегIанаб диванханаялъ гьал къоязда нахъбуссинабуна Гъизилюрт мухъалъул Нечаевка росулъа МухIамадова Марьям чIваялда хурхун хIадур гьабураб ишалъул халгьаби.Чанго соналъ цее гьей чIван йикIана жиндирго имгIалас. Гьесда гIайиб гьечIилан чIезабуна исана ихдал Гъизилюрталъул диванханаялъ. Амма ясалъул эбелалъул ихтиярал цIунулей адвокаталъ рикIкIунеб буго гьеб чIвай-хъвей тасдикъ гьабизе кIолел киналго далилал тIагIинарунин цIех-рех чагIазилан.
Азербайжаналда гIумру гьабун ругел магIарулазул Закатала мухъалъул Динчи росулъ июналъул ахиралда тIобитIулеб букIана кIудияб тадбир. Дагъистаналъул лъабабилев Имам Генуса Шамил гьавуралдаса 215 сон тIубаялъул хIурматалда гIуцIараб гIалимзабазул мажлис. Гьеб тадбиралда гIахьаллъи гьабизе ун рукIарал Аваразул миллиябгун маданияб автономиялъул вакилзабазе кIудияб квал-квал гьабуна Азербайжаналъул гIорхъода. Лъабго анкь гIанасеб заманги таможниялъул «асирлъуда» бан Дагъистаналде нахъвуссун вачIана автономиялъул вакил МикагIилов Мурад.
Дагъистаналъул чанго бакIазда тIатинарун руго гIадамал чвердезе унеб бакIалда нухал къаялъул хIужаби. «Эркенлъи» радиоялъухъе щварал баяназда рекъон гьеб хIалтIи гьабун батун буго жидерго мина-рукъалда аскIосан гIадамал ва автомобилал хьвадизе бокьичIел гIадамаз. Амма гьезул гьелъие кинабгIаги ихтияр гьечIин абулеб буго республикаялъул тIабигIат цIуниялъул рахъалъ прокуратураялъул вакилзабаз
Загрузить еще
