Россиялъул генералияв прокурор Юрий Чайкал буюрухъалда рекъон Дагъистаналъул прокурорлъун тIамун вуго Шагьнавазов Рамазан. ЦIивищарав прокурорасул хIакъалъулъ лъалел баянал дагьал гурони жеги. Гьев ккола Сергъохъала мухъалдаса.
Дагъистаналъул прократураялъул нухмалъулевлъун вачIиналде гьев халтIулев вукIун вуго Нижний Новгород мухъалъул икълималъул прокурор хисулевлъун. Дагъистаналъул цеве вукIарав прокурор Назаров Андрей хъулухъалдаса эркен гьавуна апрелалъул 11-б къоялъ. ЦIияв прокурорасул автобиографиялда хъвалеб буго 1988 соналъ Свердловскиялъул юридикияб интситутги лъугIизабун гьев хIалтIанин Казахазул республикаялда цIех-рехалъул идараялъул прокурорасул хъулухъазда, 90-л соназда гьев хIалтIун вуго Избербаш шагьаралъул прокурорлъун.
Дагъистаналъул прокуратураялъул жавабияв хIалтIухъан ХIажиев Набица гьадин бицана цIияв прокурорасул хIакъалъулъ.
ХIажиев Наби: «Узухъда гьеб лъикIаб хабар буго республикаялъул прокуратураялъе. Дагъистаниясда гIадин Дагъистаналъул халкъги гIамал хасиятги лъидаха тIокIаб лъалеб? Гьединлъидал нилъеца киназго ракIразиго къабул гьабизе ккола гьеб хабар. Дидаго вихьун лъалев чи гьев гуро, вихьараз бицунелда рекъон гIезегIан гIодове виччарав, лъай бугев чиян абулев рагIана».
Дагъистаналъул прокуратураялъ гьабулеб хIалтIуда тIасан гIемерал гIарзал рукIана республикаялда. Васал рикъарал улбуз, хъулхъалдаса эркен гьарурал полициялъул хIалтIухъабаз чанго нухалда митингал тIоритIана Дагъистаналъул прокурорги жанисел ишазул министрги хъулхъалдаса эркен гьавеян абураб хитIабгун. ЦIивищарав прокурорас республикаялда къанун цIуниялда сверухъ гIемерал хиса-басиял гьариялде хьул буго гIемерисезул.
