Тохтур Гунашев Марат туснахъ гьавиялъул болжал чанцIулго халат бахъун букIана диваналъ. Гьелъие гIиллалъун юристаз рикIкIунеб буго гьесда гIунтIизабулеб гIайиб. Гьезул пикруялда рекъон цо-цо захIматал уголовиял статьябазда рекъон гIайиб гIунтIизабулел туснахъалъуса къватIире риччаларо, адвокатазул далилазул халго гьабичIого гьел жанирго тола. Жакъасеб диваналъул данделъиялдаги тохтур туснахъалда тезе хIукму гьабизе бугоян рикIкIунеб буго гьесул адвокат МухIамадов Заурица. «Эркенлъи» радиоялъе гьес гьадинаб баян кьуна:
МухIамадов Заур: «ЦIех-рехалъул хIалтIаби лъугIизегIан чи туснахъалъув тIамулаго диваналъ гIемерисеб мехалъ уголовияб хIалтIул материалазда ялъуни адвокатаз кьолел документазул халго гьабуларо. Щаялиго диваналъ гьеб хIукму гьабула кинаб гIайиб гIунтIизабулеб бугеб чиясдаги балагьун. ГьитIинабго такъсир бугони виччазе бегьула цIех-рех лъугIизегIанго, амма Маратида гIунтIизабулеб гIайиб гIезегIан кIудияб буго ва гьев къватIиве виччаялда дун божуларо. Нижеца чанцIулго хIалбихьана диваналъул кIвар буссинабизе Гунашев Маратида гIунтIизарулел гIайибал кьучI гьечIел рукIиналда, амма гьез нахъойги гьев туснахъалда толев вуго».
Гьединго МухIамадов Заурица бицана туснахъалъув тIамуралдаса нахъе Гунашев Маратида аскIоб цониги цIех-рехалъул тадбир гьабичIин, уголовияб хIалтIи гьабиялдаса цебе щибниги унеб гьечIин. Къануналда рекъон цIех-рех инегIан жинда гIайиб гIунтIизабулев чи туснахъалъув тезе бегьула лъагIелгун бащдаб заманалъул болжалалда. Амма МухIамадов Заурица бицухъе, гьелдаса хадувги Гунашев жанив тезе бегьула.
Тохтурзабазул ишалде кIудияб кIвар кьолеб букIана информалатаз гьеб байбихьаралдасаг
Тохтур Гунашев Маратил гIагарай журналистка ГIабдулаева Заираца бицухъе, гьев туснахъалда унтун вуго, гьесул канлъи дагьлъулеб буго къойидаса къойиде, амма цIех-рехалъул идарабаз щибниги хIалтIи гьабулеб гьечIо гьесие кумек гьабизе ва тIадеялдаса тIаде туснахъалъул болжал халат бахъулеб буго.
Гунашевасул рахъ ккун жидерго гъулбасал ракIаранин 2500 тохтурас. Гьединалго гъулбасал ракIарун рукIана Россиялъул Генералияб прокуратураялде Гунашевасе туснахъалда гIакъуба кьолеб бугилан гьабураб хитIабалда гъоркьги. ГIагарлъиялъул пикруялда рекъон, гьелдаса хадув Владикавказалъул цIех-рехалъул изоляторалда вукIарав тохтур МахIачхъалаялде вачине ихтияр кьуна. Маратил чIужу Гунашева Аминаца кагъат хъван букIана Россиялъул президент Владимир Путинихъе жиндир рос гIайиб гьечIого тамихIалде цIалев вугин.
Адвокат ГучучIалиев МахIачица «Эркенлъи» радиоялъе бицана гьабсагIатги, уголовияб дело рагьун чанго моцI аралдасаги цIех-рехалъул хIалтIухъабазухъ цониги далил гьечIо гьесда гIайиб гIунтIизабулеб. Жиндир заманалда диваналде кьечIого цIех-рех халат бахъиялъе гIиллалъун гьес рикIкIунеб буго цIех-рехалъул идараялда гьесда тIадецуйги гьабун, гIакъуба кьун гIайиб тIаде босизе бокьи. Гьединго ГучучIалиевас бицана Маратил рокъор наркотикал ратанилан гьабураб хIалтIи бугин нагагь аслияб гIайибалдалъун тамихIалде цIазе кIвечIони гьелдалъун тамихI гьабиялъул мурадалда гьабураб. Информалатаз цебеккун бицунеб букIана Маратил ясалда бихьанилан чIухь балезул цояс рокъор наркотикал рахчулел.
Юрист НурмухIамадов Мурадил пикруялда рекъон, Марат Гунашев лъагIелгун бащдалъ туснахъалъувги тун хадув къватIиве виччазе бегьула уголовияб хIалтIи диваналдецин кьечIого. Мисалалъе, гьелдаго релълъараб къисмат ккана Дагъистаналъул жанисел ишазул министр МухIамадтIагьиро
