Горсверуда сверизе бугеб Олимпиадаялъул цIа

Дагъистаналде Олимпиялъул цIа щвезе буго январалъул къоло анкьабилеб къоялъул сагIат 11 тIубалеб гIужалъ. МахIачхъалаялъул аэопорталде гьелда дандчIвай гьабизе буго машгьурал спортсменазги волонтеразул кIудияб къукъаялъги. Олипиялъул хIаялъул цIа бакизе буго президент Рамазан ГIабдулатIиповас. Гьедин бицана хамиз къоялъ МахIачхъалаялъул «Динамо» абураб стадионалъул данделъаби тIоритIулеб рокъоб Дагъистаналъул спорталъул министр хисулев Салаудинов Зайналица. Гьелда гIахьаллъи гьабуна батIи-батIиял соназда спорталъул рахъалъ кIудиял чIелал росарал машгьурал спортсменалги Дагъистаналде олимпиялъул цIа щвезабиялъул тадбир нуха регIине ругел волонтеразги цо-цо журанлистазги.

Зайнал Салаудиновас данделъаразе мухIканго бицана кин гьеб къо Дагъистаналда тIобитIизе бугебали. Байбихьуда гьес кIвар буссинабуна Олимпиялъул цIа Дагъистаналде бачIин гьеб спортивиябгун жамгIияб гIумруялда жаниб цIакъ кIудияб лъугьа-бахъинлъун кколин. Олимпиялъул хIаял Россиялда кIиабилеб нухалъ тIоритIулел рукIаниги Дагъистаналде Олимиадаялъул цIа тIоцебесеб нухалда бачIунеб буго ва гьединаб лъугьа-бахъин нилъер республикаялда цоги нухалда букIинарин кколин жиндаян бицана спорталъул министр хисулев. Цоцазухъе Олимпиялъул цIаги кьолаго рекеризе руго Дагъистаналъул 67 спортсмен. Гьезда гъоркьор руго машгьурал гугарухъаби, Мавлет Батиров, КъурамухIамад КъурамухIамадов, Владимир Юмин, МухIамадхан ГIарацилов, Загъалав ГIабдулбеков, Халкъияб собраниялъул депутат, Дагъистаналъул футболалъул шураялъул нухмалъулев Будун Будунов, квержубараб рагъул чемпион Малик МухIамадов ва жеги анцI-анцI сопртсменал руго гьеб сияхIалда. Гьезда гьоркьой йиго микьго чIужугIаданги.

Байбихьуда цIагун рекеризе ругел спортсменазул сияхIалда вукIун вуго 270 гIансев чи амма 67 чиясде щвезегIан къокъ гьабун тIасарищанин гьел. Гьеб щай къокъ гьабурабилаан абун жиб-жиб къоялъ телефоналдасан ахIун бачIиналъ тату хвезабун бугиланги мукIурлъана Зайналов.

Зайнал Салаудинов: «ЦIакъ гIемерал чи кIалъан вачIунев вуго телефоналдасан ва битIараб бицани дир тIубараб къо унеб бугин абизе бегьила щай цIа босун ине ругел спортсменазул къадар дагь гьабурабали гьезда бичIчIизабулаго. ГIиллаби гIемерал руго, кин бугониги 270 чиясда гьоркьоса 67 чиясде щвезегIан чи дагь гьави бигьаяб масъала букIинишха. ХIукму ккана олимпиялъул цIа босун ине бищун мустIахIикъал ругин дагъистаналда спорталдагун жамгIияб гIумруялда жаниб кIудияб бутIа лъурал гIадамалилан. Гьенир руго профессоралги руго тIадегIанал цIалул идарабазда дарсал кьолелги, олимпиялъул хIаязул чемпионалги. Дир гьелда гъорлъ гIахьаллъи гьечIо. Спорталъул министерлъиялда дица абуна нужецаго ритIе кагъталги щибаб муниципалитетазул нухмалъулезухъе гьез мустIахIикъав спортсменасда цIар чIван нужехъе жаваб битIизе букIине. Гьедин гьабизеги гьабуна».

Гьединго гIемерисезда бичIчIулеб гьечIо щай Олимпиялъул цIагун рекерулеб тадбир гIицIго «Анжи Арена» стадионалда тIобитIизе бугебалиги. ГIемерисел чагIазул пикру букIун буго респубикалъул чанго щагьар къотIун рекеризе ратилин спортсменалилан . балатIа гьединаб букIун буго Сочиялда тIоритIулел хIаязул гIуцIарухъабазулги пикру хадуб гьеб манзил къокъ гьабун буго 8 км-лъ, МахIачхъалаялда гIурус мугIалималъе монумент лъураб бакIалдаса стадион «Трудалде» аскIобе щвезегIан, хадуб тIубанго къокъ гьабун гIицIго «Анжи Аренаялда» жаниб тIобитIизе хIукму гьабун буго гьеб тадбир.

Терактаздаса цIуна -къаялъул мурадалда яги цогидал гIиллабазда бан гьабураб хIукмуйищин гьеб кколебан гьикъидал, жинда лъалеб жо гьечIин гьеб бугин тIасанхун Москваялда, Сочиялъул олимпиадаялъул рахъалъ комитеталъул хIукмуян бицана Зайнал Салаудиновас «Эркенлъиялъе»

Олимпиялъул хIаялгун «Анжи-Арена» сверун векеризе вугезул цояв машгьурав гугарухъан КъурамухIамад КъурамухIамадовас гьадин загьир гьабуна гьеб тадбиралда тIасан жиндирго пикру.

КъурамухIамад КъурамухIамадов: «Кинавго чIагояв чиясе гIадин диеги кIудияб асар гьабуна олимпиялъул цIа босун ине ругезул кьерда гьоркьоб диеги бакI кьезе бугилан абун бициндал. Гьеб цIакъ кIудияб рохел ккола дагъистаналъе. Школалда цIале лъималазе рес щвезе буго олипиялъул цIа босун унеб куцалъухъ балагьизе. Тарихалдаса нилъеда лъала олимпиялъул хIаязул заманалда цIа босун унеб мехалъ рагъцин чIезе толеб букIин. Гьедин жакъаги гьал кьвагьиялгун чIвай-хъвеязул бидулаб дандерижи чIезабизе, гьеб цIаялъул мисалалда квешлъи нахъчIвазе бокьун бихьизабизе ракIалда буго нижеда, спортсменазда. Гьелъие ниж кидаго хIадурал руго».

27 январалда Олипиялъул цIа Дагъистаналъул спортсменаз босулеб куц бихьизе Анжи аренаялде рачIине бокьарал чагIазе рес щвезе букIине хIадурлъи гьабулеб буго спорталъул министерлъиялъ. Дореги нахъеги гIадамал раччизе хасал автобусалги чIезарун руго, гьеб кинабго тадбир нухда бачине буго 400 гIанасев волонтерас. МахIачхъалаялда щуго бакIалда букIине буго гIадамал ракIарулеб бакI. Стадион «Трудалда» ва «Университеталъул майданалда» аскIоб. «Анжи-Арена» бикьун буго чанго бутIаялде. Щибаб мухъалъул ва шагьаралдаса рачIарал гIадамазе хасаб бакI бихьизабун буго гьениб. Стадионалде жанибе нух эркенго букIине буго. БакI ккун буго абилин Сочиялъул олипиялъул хIаялъул чанго программаялъухъ балагьизе Дагъистаналдаса гьенире ине рес швезе буго цо-цо спортсменазеги. Спорталъул министерлъиялъ 800 билет босун буго гьезие. Амма гIицIго спортсменазе гурони гIадатияв чиясе щвезе рагIуларо февралалда Сочиялде ине.