Итни къоялъ нахъойги хехаб куцалда эхеде бахана цебесеб анкьалда дагьабго гIодобе ккун букIараб долларалъулги евроялъулги багьа. Центробанкалъ абулеб буго ахIвал-хIал рукIалиде бачIинабизе кIварабщинаб гьабулеб бугилан. Амма гьединал лъазабияз халкъалъул рахIатвей дагьлъизабулеб гьечIо. Жидерго гъурщил нахърател долларалде сверизабизе гIедегIулел гIадамал къоялдаса къоялде цIикIкIунел ругилан хъвалеб буго информалатазги. Щиб хисизабураб доллар циндаго хиралъиялъ дагъистаниязул гIумруялда жаниб?
Дагъистаналда унел руго иргадулал кадровиял хиса-басиял. Хамиз къоялъ Дагъистаналъул миллияб политикаялъул министрлъун тасдикъ гьаюна Татьяна Гамалей. Гьелде щвезегIан гьей хIалтIулей йикIана МахIачхъала шагьаралъул нухмалъулев хисулейлъун.
ГьоцIалъ ГЭС балаго лъеда гъоркье арал ракьазухъ гIарац кьолеб гьечIин жидеейилан гIарз буго Къорода росдал жамагIаталъул. РецIалил гIарцуда гьоркьоса цо бутIа кьун буго гьезие, амма хадуб баянлъун буго гьеб гIарац кьолаго нусиялда хадув чи гьоркьов тун вукIин.
26 октябралда Дагъистаналъул киналго мухъазда унеб букIана гIурус мацIалъул ва литератураялъул мугIалимзабаз пачалихъалъул цогояб экзамен кьеялъул тадбир. Лъай кьеялъул министерлъиялдаса гьеб тIалаб гьабуна Дагъистаналъул нухмалъулев ГIабдулатIипов Рамазаница, исана школа лъугIарал гIолилаз ЕГЭ кьеялъул хIасилазухъ хал гьабун хадуб. Амма гьатIан къоялъ экзамен кьолел рукIарал цо-цо мугIалимзаби рази гьечIо гьеб тадбир тIобитIараб куцалдаса.
Дагъистаналда жакъа аслияллъун хутIулел руго эркенаб гугари, бокс гIадал спортивиял тайпаби. Республикаялда абуни дагьал гьечIо цогидал спортивиял тайпабазе куцалел гIолохъаби. Амма гьел машгьураллъун гьечIо жакъа республикаялда. Щиб гьелъие бугеб гIилла?
21 октябралдаса Москваялда унел руго «Россиялъул Пачалихъияб Думаялда Дагъистаналъул къоял» церерахъин. Гьелъие бетIерлъи гьабулеб буго республикаялъул нухмалъулев ГIабдулатIипов Рамазаница. Гъоркьияб Палатаялъул Парламенталда рагьун буго «ГIемермиллатазулаб Дагъистан» абураб выставка, рихьизаризе руго Дагъистаналъул махщелчагIаз гьарурал батIи-батIиял тIагIел-алатал. Амма республикаялда халат бахъунеб бугеб криминалияб ахIвал-хIалалъул ва гIадамазул гIузрабазул Дагъистаналъул нухмалъулес гьениб бицен гьабичIо.
Экологиялъул рахъалъ бищун рацIцIадал шагьаразул рахъалъ тIолгороссиялъ хIадурараб рейтингалда рекъон Дагъистаналъул тахшагьар МахIачхъала буго сияхIалъул ахирисел бакIазда. Рейтинг хIадурулаго хIисабалде босун буго гьава-бакъалъул, гьекъолеб лъеда гъорлъ заралиял хутIелал гьечIолъи ва цогидалги мисалал. Амма Дагъистаналдаса экологал киналго гуро гьеб пикруялда тIад рекъолел ругел.
Дагъистанги Гуржияги цолъизабулеб, «Аваро-Кахетиялде» бахъулеб шагьранухда хIалтIизе хIадур ругин жалгиян лъазабуна Гуржиязул хIукуматалъ гьал къоязда. Исана риидал Дагъистаналъ байбихьун букIана гьеб шагьранух бахъизе. Амма дагьал церегIан къояз изну гьечIого яргъид гIуцIараз тIадекIанцIи гьабун хадуб гьоркьобкъотIи ккун букIана гьелъул. Сунцаха Гуржиял тIамурал гьеб нух бахъиялда гьоркьоре журазе?
2014 соналда жанив пачалихъалъул изну гьечIого даран гьабулев 2000 бизнесчи тIатинавун вуго Дагъистаналъул магъалаби ракIарулеб идараялъ. Дагъистаналда гьединаб къагIидаялъ хIалтIулин киналго бизнесчагIиян рикIкIунеб буго жамгIиял хIаракатчагIаз.
Рузман къоялъ рагьизе рагIи кьун букIараб гендерил тоннель гьаб нухалдаги рагьичIо къуваталъул идарабаз. Гьеб рагьизе бугеб къоялъул бицунебги гьечIо. ИчIабилеб октябралда къуваталъул идарабаз лъазабуна терроралда дандечIараб низам жеги халат бахъине бугилан.
ИчIабилеб октябралда радал Дагъистаналъул Гъизляр шагьаралъул аслияб базаралда ккана чIвай-хъвей. Базаралъул цIияв нухмалъулесда тIадекIанцIи гьабиялъул хIасилалда чIвана цо ва захIматго лъукъун реанимациялде ккун вуго ункъо чи. ТIадекIанцIарал чагIи кколел руго базаралъул цеве вукIарав нухмалъулесул чагIи. Унеб буго цIех-рех.
Унсоколо мухъалъул Временный росулъ халат бахъунеб буго изну гьечIого яргъид гIуцIарал ралагьизелъун хасал хъулухъаз лъазабураб низам. Гьеб сабаблъун араб моцIалдаса нахъе къараб гендерил тоннель жеги рагьун гьечIо, абулеб буго гьеб анцIабилеб октябралда рагьизе бугилан. Амма гьебги мухIканаб хIакъикъат букIиналда божулел гьечIо гIадамал. Гьединго хасаб операция тIобитIулаго кIудияб зарал ккарал Времменное росулъ рукIарал гIадамазул гIарзал руго жидее хIукуматалъ кумек гьабулеб гьечIилан.
ТIоцебесеб октябралда Россиялда киса-кибего байбихьана армиялде гIолохъаби ахIиялъул тадбир. Улка цIунулезул кьерде дагъистаналдаса унел гIолилазул къадар гьаб нухалъ кIиго нухалъ цIикIкIинабун буго, амма цебего гIадин гIарац кьечIого армиялде ритIулел гьечIилан абулел харбалги камулел гьечIо республикаялда.
Гьал къоязда Дагъистаналда тIобитIулеб букIана «Каспий ХIалал Экспо» абураб выставка. Экспозицялда жидерго кванил нигIматал ва цогидабги магIишаталъул бутIаялъул тайпаби рихьизаруна Дагъистаналъул батIи-батIиял мухъаздаса ва шагьараздаса вакилзабаз. Амма гьеб тадбиралда гIахьаллъарал рази гьечIо исана гьеб выставка араб куцалдаса.
МахIачхъалаялъул «Анжи» клуб махIрумлъана Россиялъул кубокалда тIоритIулел хIаязда гIахьаллъизе. АрбагI къоялъ гьеб дандчIвана Санкт Петербургалдаса «Зенит» командагун ва гьелъухъа къуна.
Дагъистаналъул печаталъул министерлъиялъ тIатинабун буго республикаялда экстремизмалъул магIнаялъул баянал тIиритIизарулеб сайт. Гьанже гьезулгун хIалтIи гьабизе буго прокуратураялъ. Амма интернеталъулгун хIалтIи гьабулез абулеб буго киналго Дагъистаналда ругел интернет сайтал рикIкIине бегьулин гьединаллъун.
Гьал къоязда къватIибе бачIана Имам Шамилил вукIарав мирза ва къади, гIараб гIелмуялъул рахъалъ бергьарав устар, Къарахъа МухIамадтIагьирил тIехь – «Инсанас жиндирго гIамал-хасият кIварабгIан къадаралда лъикIлъизабиялъул хIакъалъулъ бицунеб пайдаял калимабазул тIехь».
МахIачхъалаялъул мэрасул рищиязде гьанжеги гIемер заман хутIун буго. Амма гьанжеялдего балъгояб гIадаб кьеркьей унеб бугин потенциялиял кандидатазда гьоркьобин, бицунеб буго цо-цо интернет-сурсатаз.
Ярагьунарел министралги чIечIого хисулел хъулухъалги Дагъистаналда халат рахъунел руго хIукуматалъул нухмалъуда кадровиял хиса-басиял. 11 сентябралда индустриялъул ва даран базаралъул рахъалъ министрлъун тана Юсуп ГIумавов. Сентябралъул байбихьуда ГIабдулатIипов Рамазанил хIукмуялда рекъон къана республикаялъул транспорталъулгун, индустриялъул рахъалъ министерлъи. Кинаб магIна бугел гьел хиса-басиязда жаниб ва щай гьоркьоб заман бахъун хъулухъалдаса эркен гьарулел ругел дагъистаналъул хIакимзаби?
Гьал къоязда Узбекистаналда унел руго Эркенаб гугариялъул рахъалъ дунялалъул чемпионаталъул къецал. Россиялъул тIасабищараб командаялда гъорлъе унел кIиго дагъистанияз гьенир рихьизаруна лъикIал хIасилал. Гьезул цояв ЧIарада мухъалъул Гьачада росулъа Садулев Рашидги, Лаваша мухъалъул КъулецIма росулъа ГIабдусалам ХIадисовги кIиялго рахъана дунялалъул чемпионаллъун.
Загрузить еще
