МахIачхъалаялъул авал Семендералда рукъзал ран руго цоцада цун. Цониги метр ракьул гьечIо чIобого хутIараб. ГIадамаз гьаниб кидаго гIарз гьабула шагьаралъул нухмалъулезда тIаса, школа гьечIин, ясли цIакъго рикIкIад бугин, рищни-къул базе бакI гьечIилан бицунеб буго гIемерисез. Марталъул ахиралда гьениб тIобитIана ункъо къоялъ халат бахъараб хасаб операция ва гьелъул хIасилалда чIвана гендерил изну гьечIого яргъид гIуцIараб къокъаялъул нухмалъулев ХIажидадаев Ибрагьим ва Унсоколо мухъалъул депутатазул данделъиялъул спикер МухIамадгIалиев МухIамадхIабиб.
Халат бахъараб рагъулаб дандечIеялъул хIасилалда кIудиял жагъаллъаби ккун руго сверухъ ругел минабазе. Хасаб операция букIараб рукъалда цун бугеб рукъалъул хважаин ГIисаца бихьизабулеб буго дагьалъ цебе бан бахъараб рукъалъул кьучI кьватI-кьватIун бугеб куц. Къадазда гулбузул лъалкIал ругоан. «СагIат щуго тIубарабго радал къватIире гъуна ниж рокъоса щалали лъаларел гьумер бахчарал гIадамаз. Ункъо къоялъ кьвагьдолаго хутIилищха дир рукъ жагъаллъичIого», - ян бицунеб бугоан гьес, щущараб рукъалъул бокIонги, гуллбуца рорлъарал гордалги рихьизарун. Чанго соналъ захIмат цIан данде гьабураб магIишат хвезабунин пашманлъун вуго гьев. Ккараб заралалда рекъараб бецIун гIарац пачалихъалдаса щвеялда гьев божулев гьечIо, амма кин бугониги къеркьезе ракIалда буго.
Цоги аскIоб букIараб тукен хIалтIизабулей ясалъ бицухъе, ункъо къоялъ тукен рагьун хутIун буго ва гьеб заманалда жаниб гьениса гIемераб къайи араб бакI лъачIого тIагIун буго. Жибго тукенги хIалтIизабизе бегьулеб хIал гьечIо.
Хасаб операция лъугIун хадуб кьвагьизабун буго дандбитIун цояб рахъалда бугеб МухIамадгIалиев МухIамадхIабибил рукъги. Къуваталъул идарабазул хIалтIухъабазул баяналда рекъон гьениб бомба батун буго ва гьенибго кьвагьизабизе ккун буго. Мадугьал МухIамадил рукъалъул бащдаб къедги жагъаллъун буго, рукъ сверун кьватIелалги руго. Гьевги божулев гьечIоан пачалихъалдаса гIарац щвеялда. Амма кин бугониги документал ракIарулел руго.
ГIорхъолъа рорчIарал ахIвал-хIалазул министерлъиялъул вакил Денгаев Денгаца «Эркенлъи» радиоялъе бицана зарал бецIизе ккани хIажалъулел документазул хIакъалъулъ.
Денгаев Денга: «Хасал тадбирал тIоритIулеб бакIалда рукъалъе жагъаллъи ккарал чагIаз кьезе ккола тIоцебесеб иргаялда гьенир рехсарал тадбирал рукIин тасдикъ гьабулеб кагъат Федералияб ХIинкъи гьечIолъиялъул идараялдаса. Гьелдаса хадуб нижехъе щвезе ккола шагьралъул ялъуни мухъалъул гIорхъолъа рорчIарал ахIвал-хIалазул комиссиялъул данделъиялдаса протокол, гьединго букIине ккола гьеб рукъалъул яги щущараб магIишаталъул хал гьабураб комиссиялъул акт. Нагагьлъун гьев чиясул рукъ тIубанго биххун батани, гьесие кьола цIияб рукъ базе ихтияр кьолеб сертификат. Къачазе кколеб хIалалда батани, гIарац биччала мухъалъул ялъуни шагьалаъул бюджеталде ва гьез къачIала рукъ.
Амма гIемерисеб мехалъ МахIачхъалаялда гьеб гIарац щвезе гIемер мех бала, цо-цо мехалъ сон базеги бегьула. ГIадамаз жидецаго къачIала мина, хадуб гьезул банкалда бугеб счеталде гIарац реххула администрациялъ. Ккараб заралалъе къимат кьола мухъазулал комиссияз. Пачалихъалъ кьолеб гIарцуца бецIуларо гIадамазе ккараб гIарац, гьеб кидаго дагьаб букIуна. Къануналда рекъон тIубанго магIишат щущараб хъизаналъе кьола I00 азарго гъуруш, дагьаб къадаралъ зарал ккаразе 50 азарго гъуруo».
Гьединал хасал операциязул цояб тIобитIулаго рукъ тIубанго бухIана МахIачхъалаялдас
«Эркенлъи» радиоялъ цебеххунги бицун букIана Гъизилюрт шагьаралдаса хасаб операциялда рукъ бухIарав ГIабдулаев МухIамадил ва лъабго гьесул мадугьаласул хIакъалъулъ. Россиялъул ХIинкъи гьечIолъиялъул идараялъ гьениб хасаб операция тIобитIун букIинчIилан рикIкIунеб буго, хIатта гьеб тасдикъ гьарулел киналго хIужаби, документал ва кагътал МухIамадил кодор руго. Гьезда гъорлъ руго ГIорхъолъа рорчIарал ахIвал-хIалазул вакилас тIадехун рехсарал киналго документал, гIицIго ХIинкъи гьечIолъиялъул идараялдаса кагъат хутIун. ГIабдулаев МухIамадица бицухъе, кумек гьесие жеги щвечIо пачалихъалдаса, рукъги жиндирго къуваталдалъун цIидасан балеб буго.