Унсоколо мухъалъул Балахьуни росдал бегавул МухIамадрасул Якъубовасул васал МухIамад ва ХIаскъил ккун рукIанин 7 маялдаго, амма чанго къоялъ гьезул щибго хабар лъалеб букIинчIин баян гьабулеб буго ккурал гIолилазул гIага-божараз. 13 маялъ гьел изну гьечIого цIунараб ярагъ батиялда бан ккун рукIин лъанила.
Балахьуни росдал бегавул МухIамадрасул Якъубовас «Эркенлъи» радиоялъе баян гьабуна, кIиявго вас МахIачхъалаялда рукIанин, кIудияв вас МухIамад вугила Дунялалъул чемпион, гьитIинавги спорталда куцулев вукIанила.
МухIамадрасул Якъубов: « Рокъоб, ХIаскъилихъе рехун буго автоматги наркотикалги, МухIамадиеги рехун буго наркотикалги таманчаги. Цо щибгIаги гьез гьабураб жо гьечIо. Гьел рукIана шагьаралда, цояв вас чемпион вуго Россиялъулги Дунялалъулги . Гьелде тIадеги, кIудияв васасул автомобилалда жаниса жоги тIагIун буго. НугIзал гьечIого, цебе ккараб жоги хъван ккун руго гьел. ХIинкъи бугел ратизе рес бугин абулеб буго гIицIго. Гьел рихьизеги толел гьечIо».
Якъубовазул адвокат ХIажи ХIажиевас. ГьабсагIат гьезде мухIканго гIунтIизабулеб гIайиб гьечIин, гIицIго изну гьечIого цIунараб ярагъ батиялда щаклъи букIин гурого, официалияб хIалалъ гIунтIизабулеб гIайиб гьечIилан баян гьабулеб буго гьес.
ГьабсагIат гьел МахIачхъалаялъул туснахъалда ругила цо моцIилил болжалаз, ай 7 июналде щвезегIан. ТIокIаб тIаде цIех-рехалъ мухIканго гIайиб гIунтIизабичIого чи кквезе рес гьечIилан тIаде жубана юристас.
Дагъистаналъул Жанисел ишазул министерлъиялда гьеб ишалда хурхун киналгIаги баянал кьечIо, гIицIго Федералияб цIуна-къаялъул хъулухъаз гьарулел тадбиразул кидаго гурин жидеда лъалеб, гьединлъидал баянал кьун бажаруларин абун гурого.
ЦIех-рехалъул идараялъул вакилас «Кавказский узел» сурсаталъе баян гьабухъе, Якъубовазда щаклъи батизе рес бугила изну гьечIого яргъидгIуцIаралгун бухьен букIиналда бан.
Изну гьечIого цIунараб ярагъ батиялда бан чи ккун вугони , гьединал ишазул 80 проценталда нугIзал рукIунарин, гьел жалго низам цIунулел, ялъуни цогидал гьез ккун рукIарал чагIи рукIунин баян гьабулеб буго адвокат Исрафил Гададовас. Низам цIунулезул ярагъ рехизе мурад бугони, гьенир киданиги рукIине кколел нугIзал рукIунарин бицана гьес.
Исрафил Гададов: « 80 процент, дагьаб цIикIкIунцин батила 208 ва гьелда релълъарал статьябазда рекъон ккураб чагIи ругони, гьенир нугIзал рукIуна яги жалго хIалтIухъаби, яги цогидал ккурал чагIи, гьекъолдухъаби яги цогидал, гьаб жоялда гъулбас гьабейин абидал гьеб гьабулел. Мадугьалзаби ва цогидал къватIиса гIадамал рачанани, гьезда цебе рес ккечIогон букIине бегьула ярагъ рехизе.
Формалияб куцалъ тIобитIулеб чIухь бугонани рачуна гьез рукIине кколел нугIзал. Масала, дир практикаялда букIана лъугьа-бахъин, диваналда цеве вахъарав чияс цевеги вахъун абураб, жиндие гъулбасал гьаруралъухъ протоколазда 1500 гъурущ кьолин бицараб. Гьелдаса бичIчIула щиб-кин бугебали гьеб сфераялда. Хас гьабун гьеб ишалъул абунани, дида кколаро росдал бегавуласул лъималазухъ гьедин ярагъ букIун батилин, гьеб цогидаб гIилла букIун гьел кквезе рукIине рехун батизе рес буго».
Изну гьечIогон яргъидгIуцIаразулгун хурхен букIиналда щаклъи букIиналъ ккун ратизе рес бугила гIолилал, гьеб хIужа гьезул ишалъулъ аслияблъун гьабизеги рес бугила цIех-рех тIобитIулаго гьелъие кьучI батанийилан тIаде жубана адвокатас.