Аноним: «Ассаламу гIалайкум, диналъул вацал. ЦIияб хабар буго гьабсагIат ГIабдулмажидил МухIамад(ЭР-МухIамад МухIамадов) Вачун ун вуго гьабсагIаталъ ОМОНаз. ГьабсагIат унсокулисес ахIун бачIараб жо буго гьеб».
Гьеб буго мухъалда гIадамаз вацапалдасан цоцахъе битIулеб букIараб аудио 19 декабралъ къаси. КIалъаялда бицунелда рекъон, ккун вачун арав кколев вуго Унсоколо мухъалъул Унсоколо росдал бетIер МухIамад МухIамадов.
Гьел баянал мухIкан гьаризе «Эркенлъи» радиоялъ бухьен гьабуна Унсоколо росдал бетIергун. Гьес гьеб хабар уйяб гьечIилан лъазабуна. Живги гьабсагIат росулъ, рокъов вугилан баян гьабуна. Гьесул рагIабазда рекъон, гIодоркъояздаса хадуб админстрацияги щибго хиси гьечIого хIалтIизе буго.
Амма, «Эркенлъи» радиоялъухъе щварал баяназда рекъон, гьеб кIалъай къватIибе бачIиналъе гIиллалъун ккун буго 19 декабралъул къаси Унсоколо ккараб кьал. Росдал бетIерарасда ва Унсоколо росулъа Халкъияб мажлисалъул депутат ХIасанов ХIасанида гьоркьоб ккараб рагъ-мучалъул хIасилалда депутатасе зарал ккун буго. ГьабсагIат ХIасанов МахIачхъалаялъул азарханаялда вуго. Гьенире рачIарал низам цIунулез рагъулел ратIа гьари ккун батизе рес бугила росдал бетIер гьез вачун уневлъун вихьиялъе гIиллайин абулеб буго эфиралда жиндир цIар рехсезе бокьичIев Унсоколоса чияс.