Москваялда Джон Теффтида абула Россиялъул мадугьалихъ ругел улкабазда режимал хисиялъул рахъалъ экспертин ва «дипломатияв диверсантин». Гьанже щаклъи буго гьев Москваялде витIулев вукIиналда ва Кремлалъул цо-цо вакилзабазул щаклъи буго гьенибги гьес гьелда релъараб жо гьабизе къасд гьабизе рес букIиналда.
Абизе бегьула Джон Теффт вугин Москвагун Вашингтоналъул хварал гьоркьорлъабазда рухI речIчIизабизе витIулев чийинги.
РакIалде кколеб буго Джон Теффт президент Барак Обамаца Москваялде витIизе вугин ва Россиялъул информалатаз лъазабухъе, Москваялъулги гьечIо гьелда дагIба.
http://echo.msk.ru/news/1353444-echo.html
Гьел лъазабиял ритIарал ратани ва Сенаталъ гьесул кандидатура къабул гьабуни, Теффт Москваялде ине вуго Крымалъе Москваялъ аннексия гьабиялда ва машрикъалъул Украиналда Россиялдехун цIайи цIикIкIараб дандечIей багъариялда бан Америкаялъулгун Россиялъул гьоркьорлъаби цIорораб рагъул заманаялдаса нахъе бищунго хвараб мехалда.
Жидеда сверун Москваялъул рахIат хвезабулел дипломатазул цоявлъун ккола 64 сон барав Теффт. Гьелъие гIиллалъунги буго Гуржиягун Украиналда «кьер-кьерал» революциял гьарулаго америкаялъул дипломатиялъул бетIерлъуда гьев вукIин ва гьел революциязул гIайиб Москваялъ Вашингтоналда гьабулеб букIин.
Дипломатиялда Теффт вугелдаса буго 40 сон. 2004 соналда Украиналда «курактIогьилаб революция» унаго гьесул гьелъулъ букIана лъалеб асар. Гьелдаса хадуб дагьаб заманаялда 2008 соналда Москваялда ва Тбилисиялда гьоркьоб къокъабго рагъ букIараб мехалда гьев вукIана Гуржиялда Америкаялъул вакиллъунги.
Гьеб мехалда Россиялъ магърибалда гьабулеб букIана сепаратистиял регионал Жанубияб Гьириялъул ва Абхазиялъул суалазда сверун конфликт ккелалде цебе гуржиязул президент Михаил Саакашвилие рагъулаб кумек гьабиялъул гIайиб.
WikiLeaks сайталда ва британиялъул Тhe Guardian газетаялда кьурал Америкаялъул Пачалихъияб департаменталъул документазда рекъон, Гуржиялда рагъ байбихьизе лъагIел бугеб мехалдаго Теффтица Россиялда гьабулеб букIун буго гуржиязул сепаратистазул рахъ кколеб ва гьезие кумек гьабулеб букIиналъул гIайиб.
2009 соналда Тбилисиялда жиндирго хъулухъ тун хадуб Обамаца Теффт витIун вукIана Украиналде Америкаялъул вакиллъун. Гьеб мехалда гьенив президентасул рищиязда магърибалдехун цIийи цIикIкIарав президент Виктор Ющенко къола Кремлалдехун цIийи цIикIкIарав кандидат Виктор Януковичие.
Араб соналъул ноябралда Украиналда протестазул цIа пархараб мехалда Теффт Киевалдаса нахъе ун вукIана, амма Кремлалъул рахъ кколез гьесда гьабула гьеб кор боркьизе хIадуриялъул гIайиб.
Гьединазул цояй ккола Россиялъул ЖамгIияб палатаялъул гIахьалчIужу Вероника Крашенниникова.
(INSERT AUDIO -- Krasheninnikova in Russian -- length :16 -- NC070339)
«Гьел соназда рукIана Саакашвилица жанубияб Гьириялде ва Абхазиялде гьарурал гьужумал ва хадуб гьениб рагъ. Гьединго Украиналдаги гьесул букIараб асар кIвар кьечIого кинго тезе бегьуларо».
Гьелъ гьедин абун букIана ГIурус Радиоялъе.
2000-2003 соназда Теффт вукIана Литваялда Америкаялъул вакиллъунги. Россиялъул пачалихъиял информалатазул пикруялда гьеб мехалда Балтиялъул гьеб улкаялда Кремлалдехун рокьукълъи щулалъизабиялъулъги гьесул кумек гьечIого иш ккун батуларо.
Жиндирго иргаялда Теффтица абулеб буго жив Россиялде данде вугев чи гурин.
Жинда кколин дунялалъул гьаб рагIалда киналго ругьунлъизе кколин цадахъ халтIизеги гIумру гьабизеги, гьебги цоцазул суверенитетги лъидаго бачIолъиги цIунулагойин.
Дипломатасул хъулухъалде Теффт лъугьана 1972 соналда цIорораб рагъул завалалда. Гьев 80-билел соназги хIалтIулев вукIана пачалихъияб департаменталда советияб бюроялда.
Советияб Союз биххун хадуб 1996-1999 соназда гьев вукIана Москваялда америкаялъул вакил хисулевлъун.
Дипломатасул цере рукIарал коллегабазул пикруялда рекъон, советиял ва россиялъулал ишазулъ бугеб кIудияб хIалбихьиялде балагьун жакъа Теффт кколев вуго Россиялда Америкаялъул вакиллъун вукIине бищунго лъикIав чилъун.
Висконсиналда гьавурав ва хобби хIисабалда батIи-батIиял тIагърал ракIарулев Теффт лъала гIодобе биччараб хьвада-чIвадиялъул гIадатияв чи хIисабалда.
Гьединаб букIана гьесул вагъа-вашари 2009 соналда гуржиязул ток-шоуялдаги. Гьениб гьес ахIун букIана джазалъул легенда Луи Армстронгил «What a Wonderful World» абулеб кечI.
https://www.youtube.com/watch?v=wP5qU1FSqYE
Карл Шрек
