ЦIех-рехалъул идарабаз Гунащев МахIачхъалаялъул полициялъул нухмалъулев АхIмад МухIамадов чIваялъе гIайибияв вугилан рикIкIунеб буго. Гьеб гIайибги гIунтIизабун гъоркьисала ноябрь моцIалда полициялъ ккуна МахIачхъалаялъул 2 азарханаялъул тохтурзаби Марат Гунащев ва Шамиль ХIасанов. Жиндирго рокъоб чIухь балеб мехалда жидеде кьвагьданин абун полициялъулаз Шамиль ХIасанов чIвана, Гунащев, г1агарлъиялдацин лъазе теч1ого Владикавказалъул туснахъалде вачун вук1ана. Исана февраль моцIалда т1адвуссун МахIачхъалаялъул туснахалде вачана гьев.
Тохтур Гунащев азарханаялда вегизавиялъе гIиллалъун ккана гьесул сахлъиялъул иш цIакъго квешлъулеб букIин. Гьесул гIадал унтаби ругеб мехалда гьоркьоса къотIичIого тохтурасул бербалагьиялда гъоркь вукIине кколин унтаравин, гьединал ресал туснахалда гьечIелъул гьев азарханаялде вачине кканин лъазабуна Маратил эмен Камиль Гунащевас.
«Гьесул бохдулъе букIине кколеб хIалалъ би хьвадулеб гьеч1о гьелда хурхун тохтурзабаз Гунащевасе сакъатлъиялъул 3 группаги кьун бук1ана», - ян лъазабун бук1ана Камиль Гунащевас.
Гьесул рагIабазда рекъон гъоркьисала ноябралъул ахиралда къуваталъул идарабазул хIалтIухъабаз Марат вухун вуго, гьелдаса хадуб гьев дагьавги цIакъ унтун вуго, цере рукIарал унтабиги цIилъун руго гьесул. Гьев кидаго бетIер унтун вукIунин, берзул канлъи дагьлъулеб бугин, бакьалгун кванирукъ унтун бугин гьесулин бицана Маратил инсуца.
Живгоги гIемерал саназ тохтурлъун хIалтIарав Камиль Гунащевас рикIкIунеб буго жиндир васасе туснахъалъул азарханаялда кIвараб кумек гьабулеб бугин, амма Марат гIадал бидурихьал унтаразе хасаб кумек гьабизе рес гьечIин гьениб, гьединлъидал цIакъ кIудияб ургъел бугин жиндие васасул сахлъиялъулин.
Гунащевасул адвокат Заур МухIамадовас «Эркенлъи» радиоялъе бицана гьабсагIат Маратил дагьаб мадар лъугьун бугилан.
Заур МухIамадов: «Гьаб сагIат гьев азарханаялда вегун вуго, сахлъиялъул рахъги дагьабго лъикIлъун бугин рикIкIине бегьула. Чанго къоялъ цеве ваккизе ун вукIана дун гьесде, цодагьаб чIаголъи бачIун бугин гьесулъилан абизе бегьула. Азарханаяла кидалъагIан гьев хутIилебали жеги лъаларо. Гьаб ахиралда букIараб диваналъги гьев цоги моцIицаги жанив тIамизе хIукму гьабуна. Гьедин 27 маялдалъагIан жанив туснахъ гьавун вуго гьеб. Цере рукIарал диванханаялъул хIукмабиго гIадин гьеб цоялда тIасанги Дагъистаналъул ТIадегIанаб диванханаялде гIарза хъван букIана, амма кидаго гIадин гьезги Ленинский диванханаялъул хIукму хисизабичIого тана».
Адвокатасул рагIабазда рекъон гьанжеги цогини цIех-рехалъул иш
гьабулеб гьечIо Марат Гунащевгун. Гьев къватIиве виччазе некIого заман щун бугин, гьесда гIайиб букIин чIезабулеб цониги далилги гьечIин, амма щиб гьабунги гьев туснахъалъув тIамизе хIаракат бахъулеб бугин цIех-рехалъул идарабазилан рикIкIунеб буго адвокат Заур МухIамадовас.
