Интернет-годекIаналдаса харбал

МухIамадов Тамерлан: «Дир хIисабалда тIоцебесеб иргаялда гьоркьоб лъураб тема ккана Семендералда Ибрагьим ХIажидадаев чIван вугищ, гьечIищ абураб суал. Щайгурелъул бичIчIулеб букIинчIо щиб гьениб ккарабали, къуваталъул идарабазги мухIканаб баян кьолеб букIинчIо. Гьеб тема блогосфераялда бищунго гIемер гьоркьоб лъеялъе гIиллалъун ккана гьелда сверухъ мухIканал баянал гьечIолъи. Щивас бицунеб букIана жиндаго битIарабин кколеб информация. Гьелдаго цадахъ блогераз бицунеб букIана ХIажидадаевасулгун ва гьесул сверухълъиялъулгун бухьен бугел цо-цо Дагъистаналъул хIакимазабазул хIакъалъулъ. Гьединго гьоркьоб лъолеб букIана ХъахIаб рукъалда заманаялъ президентасул хъулухъал тIуралев Рамазан ГIабдулатIиповасулгун блогеразул букIараб данделъи. Амма кIудиябго информационнияб хIасил гьелъ кьечIилан абизе бегьула. Мисалалъе, цебеккун Пачалихъияб думаялъул депутат Ризван Къурбановасулгун букIараб данделъиялъул хIасил жеги цIикIкIараб букIанилан абизе бегьула, блогеразда гьоркьоб гьелда хурхун бахIсги гIемераб букIана».

Гьанже гIатIидго бицине буго блогераз кIвар кьурал аслиял темабазул.

Талат къоялъ 2 апрелалда Россиялъул президент Владимир Путиница гъулбасана регионазе жидеего нухмалъулев вищизе ихтияр кьолеб къануналда. ГIагараб заманалда Дагъистаналъул парламенталъ хIукму гьабизе буго кинаб къагIидаялъ рищиял тIоритIизе кколел абураб суалалда хурхун. Блогосфераялдаги гьеб суалалда тIасан бахIсал унел рукIана. Аслияб къагIидаялъ блогераз рикIкIунеб буго Дагъистаналда тIолгохалкъалъул рищиял тIоритIизе кколин. Фейсбукалда цIех-рех тIобитIулеб буго гьеб суалалда тIасан. Гьелъул хIасилазда рекъон гьабсагIаталда Дагъистаналъул блогеразул 80 гоялдаса цIикIкIун проценталъ рищиязул рахъ кколеб буго.

«Нилъеца нилъеего президент вищизе кIоларо абураб жоялъул магIна буго нилъ щибго бичIчIуларел гIабадалзаби ругилан аби. Халкъияб мажлисалъ нилъее гьеб ихтияр кьечIони, нилъер рахъалъ гьезул пикруги гьединабго бугилан абизе бегьула», - ян рикIкIунеб буго блогер АхIмад МухIамадовас. Залова Амира абураб цIаралда гъоркь хъвадарулей блогералъ «Livejournal.com» сайталда хъвалеб буго «ГьабсагIатги нилъее рищиязда гIахьаллъизе ихтияр кьечIони, тIубанго халкъалъул божилъи хвезе буго тIалъиялдаса», - абун. ДандчIвалел руго тIолгохалкъалъул ругониги, кинал ругони рищиязул ургъел гьечIелги. Марат Къурбанов абурав блогерас хъвалеб буго жиндие батIалъи гьечIин кин нухмалъулев вищаниги, лъица вищаниги, жиндир гIумруялда, хъизамалда ва гIагарлъиялда гьеб хъвалеб гьечIин. Мurtaza абураб цIаралда гъоркь хъвадарулев блогерас рикIкIунеб буго рищиял тIоритIичIони лъикIин. «Байбихьизе буго ахIи-хIур, кьвагьа-гIанхъи, гьарулел мацIал, цоцаде тIаде чIехьолеб чороклъи. Гьеб кинабго бихьизе бокьун гьечIо дие, нухмалъуда гьабсагIат вуго рейтинг бугев президент, гьев тасдикъ гьавуни дир дагIбаги гьечIо», - абун хъвалеб буго гьес Фейсбукалда.

Марталъул ахиралда Семендералда тIобитIараб хасаб операциялъул хIасилалда гендерил яргъид гIуцIараб къокъаялъул нухмалъулев ХIажидадаев Ибрагьим чIванилан мухIан гьабуна гьал къоязда Россилъул хIинкъи гьечIолъиялъул идараялъ. Блогосфераялда камулел гьечIо гьанжеги гьелда божуларел чагIи. «Гьев чанцIулго чIванин лъазабун букIана, гьанжеги гьебго жо батила», -абун хъвалеб буго Абу Саидица. Расул Лабазанов абурав блогерас хъвалеб буго ХIажидадаев Ибрагьимилгун бухьен бугел Дагъистаналъул цо-цо хIакимзаби тIатун рукIанин, гьабсагIат гьевги чIван, лъица щиб гьабун бугебали лъазе захIмат бугин.

Гьебго темаялда тIаса кIалъана транспорталда хIинкъи гьечIолъиялда хурхун тIобитIараб данделъиялда Рамазан ГIабдулатIипов. Гьес къуваталъул идарабазул хIалтIухъабазда тIадкъана Дагъистаналъул тIалъиялда ругел чагIазулгун яргъид гIуцIаразул бухьен букIиналда хурхун цIех-рех гьабизе, ва гьединго МахIачхъалаялъул аэропорталъул нухмалъулел хисизе кколилан лъазабуна. Блогераз гьеб данделъиялда тIасаги гIемер пикраби загьир гьаруна. «Рамазан ГIабдулатIиповас бихьизабулеб буго жив гьадинго вачIарав чи гьечIолъи, гIагараб заманалда гIемерисел къуваталъул идарабазул нухмалъулел хисизе руго», - абун хъвалеб буго МухIамад Цези абурав блогерас. Цогидас хъвалеб буго гьадингоги аэропорталъул нухмалъи хисизе къваригIарав гьесда гьитIинабго гIилла батун бугин. «Аэропорталдаса чанцIулго нухалъ цIикIкIун нухмалъулев хисизе кколел бакIал руго, ГIабдулатIипов гьабсагIаталда жинца нахъе ритIизе кIолел чагIазда гурони хъвалев гьечIо», - абун хъвалеб буго блогер Рустамов Рустамица.

Гьединал рукIана гьаб анкьалъ Дагъистаналъул блогераз гьоркьор лъурал аслиял суалал.