Гъунисезул рищиязда сверун хIаял

16 февралалда Дагъистаналда тIобитIулеб буго Гъуниб росдал бегавул вищиялъул кIиабилеб тур. Республикаялъул рищиязул идараялъул баяназда рекъон рищиял унел руго берцинго, гьел тIоритIулеб къагIидаялда хурхун яги гьениб гIадлу хвезабиялъул цониги хIужаги гьечIо, амма цояв кандидатас мухъалъул нухмалъиялъ тIадецуй гьабулеб бугилан лъазабулеб буго.

ГьатIан къоялъ Гъунисез вищулев вуго жидерго бегавул, гьеб хъулухъалде кандидатура лъуразул цояс Гъуниб мухъалуъл бетIерас жив рищиязда гIахьаллъиялъе квалквал гьабулеб бугин лъазабулеб буго.

2 февралалда тIоритIарал Гъуниб росдал бегавуласул рищиязда 8 кандидат гIахьаллъана. Гьезда гьоркьоса Дибиров Мурад ва МахIаев Султанбег рорчIана рищиязул кIиабилеб туралде.

Гьезул тIоцебесеб тур лъугIун хадуб, Дагъистаналъул рищиязул идараялъ гьел рищиял рукIине кколеб хIалалъ анин ва гьениб лъицаниги гIадлу хвезабичIилан лъазабун букIана, кIиабилеб турги гьединго гIадилго инеб бугин абурал баянал кьолел руго гьеб идараялъ. Амма бегавуллъиялде кандидат Дибиров Мурадил гьел рищиял тIоритIиялъул рахъалъ батIияб пикру буго. «Эркенлъи» радиоялъулгун букIараб гара-чIвариялда гьес бицана Гъуниб мухъалъул бетIер МухIамадов Пахрудиние жиндирго росуцояв МахIаев Султанбег бегавуллъиялда тезе къваригIун вугин, гьединлъидал МухIамадовас жиндихъе гIадамал ритIун рачIанин жив гIодой виччан вукIайин, рищиялъул компания тIобитIугейиланги абун.

БетIерас абулеб бугила Султанбег «Единая Россия» партиялда гъорлъ вукIиналъ гьев бергьине кколин рищияздайилан, амма Мурадица рикIкIунеб буго «Единая Россияги» багьанадай ккун МухIамадов Пахрудиние жиндирго чи тезе къваригIун вугин Гъуниб росдал бегавуллъудайилан. Гьеб жинде гьабулеб бугеб тIадецуялъул хIакъалъулъ бицун Дагъистаналъул бетIер ГIабдулатIипов Рамазанихъе кагъатги хъван буго Дибиров Мурадица.

«Эркенлъи» радиоялъ гьел рищиязда хурхарал суалал кьезе чанцIу ахIаниги Гъуниб мухъалъул бетIерас жаваб кьечIо, гьес рахъкколеви абулев вугев гъунисезул бегавуллъуде кандидатура лъурав МахIаев Султанбегицаги Дибировас мекъал жал рицунел ругин абуна.

Гьесул рагIабазда рекъон мухъалъул бетIерасда гьес бегавуллъуде кандидатура лъолеб букIинцин лъалеб букIун гьечIо, гьев жиндир рахъ ккун Дибировасе квалквал гьабулев вугин абиги гьереси бугин бицана «Эркенлъи» радиоялъе МахIаев Султанбегица.