Дагъистаналъул пачалихъияб педагогикияб университеталъул кIинусгоялдаса цIикIкIун студентаз, 16 октябрялъ гIодор чIараб забастовка байбихьун буго. Гьеб байбихьиялъе гIиллалъун ккун буго университеталъул ректор хисулев ГIабдулаев МухIамадица тIоритIулел ругел хиса-басиял.
22 сентябрялъ Роспотребнадзоралъ Дагъистаналъул пачалихъияб педагогикияб университеталъе, ай ДГПУялъе гьукъун букIана цIалуде студентал росизе, амма гьеб хIукму Роспотребнадзоралъ нахъе ахIун буго. ГIиллаги гьелъие ккун буго ДГПУялъул тIалъиялъе роцабазда рекъон кинабго букIинабизе заман кьун букIиналда бан.
ЦIияб цIалул сон байбихьигун байбихьанин университеталда батIи-батIиял хис-басалилан лъазабулеб буго жалго цIалулез ва цо-цо мугIалимзабаз. Гьеб байбихьун буго цо-цо факультетал жураялдаса, масала, гьедин жубан буго Физикаялъул факультет ва Математикаялъул факультет.
Амма гьел жураниги щибкъо къварилъи кколарин, щай гурелъул гьезул релълъен-хъвай бугин гIелмабазул , амма цогидал жураял кинго данде кколарел ругин баян гьабулеб «Эркенлъи» радииоялъе ДГПУялъул 5 курсалъул студент, МухIамадова Асиятица. Гьелъул рагIабазда рекъон, чарагьечIолъиялъ тIамулел руго гьел забастовка тIобитIун, жидер тIалабал тIурай тIалаб гьабизе.
МухIамадова Асият: « Студентаз жакъа ахIи бахъинабиялъе гIиллалъун ккана кIиго факультет цолъизабизехъен букIин. Инженериябгун-педагогикияб факультет ва Технолого –экономикияб факультетал цолъизаризехъен рагIула.
Технолого-экономикияб факультет ккола цIакъ нахъа ккараб факультет, гьезул лицензияги гьечIо, аккредитация гьабун бажаричIолъиялъ. Нижер Инжинериябгун-педагогикияб факультеталъ некIого гьабуна аккредитацияги ва буго лицензияги. ЖамгIиб хIаракатчилъиялъул ва гIелмиял батIи-батIиял къецазулъ бакIалги ккола нижер студентаз.
Гьезул руго цIакъ нахъа ккарал кафедрабиги. Нижеда абулеб буго нужее щибго къварилъи букIунарин гьелдаса, амма кин гьеб букIунареб, нижер батIи-батIиял гIелмиял направлениялго ругеб мехалъ. Диплом кинаб букIинебалеги лъаларо.
Гьелъул ургъел буго нижее. Киналго руго гьелде данде чIун. Нижер аккредитация букIиналъ, гьезул гьечIелъул гьеб буго гьез гъол рорчIизаризе журазехъен. Цолъараб факультет букIине бугила Лъайкьейгун-технологикияб».
Гьел хIаял ругин тIалъиялъ гьарулел, амма студентазе зарал гуреб жо гьечIин гьелъулилан рикIкIунеб буго 2 курсалъул студент Каримова Гуляцаги.
Гьелъул баяназда рекъон, гьез забастовка лъазабидал, гьенире цо-цо университеталъул тIалъиялъул чагIи рачIун данделъи гьабун бугго. Гьез тIалаб гьабун буго гьез забастовка лъугIизабун, цIали байбихьи. Амма жидеда ракIалда гьечIила забастовка рехун тезе.
Каримова Гуля: «Нижер цо-цо мугIалимзаби руго хас гьабун нижер факультеталда дарс кьолел. Масала, психолого-педагогикияб кафедра. Гьединабго кафедра буго дозулги. Технолого-экономикияб факультеталда гьеб кафедраялъул бетIер вуго цIияв тарав декан.
Гьес нижер мугIалимзаби нахъе рехи хIакъаб буго. Жакъа нижехъе рачIун тIалаб гьабуна нижеца букIине кколеб хIалалъ цIали байбихьи, нижер тIалабазухъ гIинго тIамичIого. Нижеца абулеб буго, цолъизабейин, амма гьеб иш гьабейин тIаде соналдаса байбихьун росарал цIалулелгун. Нижее бокьун буго нижеца цIали байбихьараб факультет лъугIизе.
Гьезда гьеб бмичIчIизегIан забастовкаги гьабизе буго. Метер улбулги рачIине руго нижер. ТIалъиялъ нижеде кIвар кьечIони. Ниж прокуратураялде гIарзагун ине руго».
Студентаз забастовка гIицIго цIалул заманаялъ тIобитIулеб буго. Гьел заманаялда цIалуде рачIун гIодор чIолел руго. Амма кинабгIаги цIали гьабулеб гьечIо.
«Эркенлъи» радиоялъ бухьен гьабуна ДГПУялъул пресс-хъулухъгун ва тIалъигун, гьезул баянал цIехон гьеб забастовкаялда хурхун, амма пресс-хъулухъалъул вакил ГIалиев Нариманица инкар гьабуна киналгIаги баянал кьезе.
Гьесул рагIабазда рекъон, университеталъул тIалъиялъ гьезие буюрухъ кьун буго руцIун рукIуне. Ректорасул ишал тIуралесул кумекчIужуялъ гьединго инкар гьабуна киналгIаги баянал кьезе.