Беслан 10 соналдасан
Бесланалъул №1 школалда хварав 300 чиясул суратал ран руго гьел гъоркьлъалие ккун рукlараб спортзалалъул къадазул хутlелазда. Гьезулги 186 буго лъимералъул сурат. Гlагараз гьенире жегиги росун рачlунел руго расанкlаби.
Качмазова Аминае 2004 соналъул 1 сентябралда букlана 8 сон. Гьелда цадахъ гьеб къоялъ рукlарал гьелъул гьалмагъзаби Лейлаги Алинаги гьенир хвана. Аминал цояб бералъе жагъаллъи ккана. Гьанже гьей цlалулей йиго Владикавказалъул университеталда.
Заман чlун буго Кокова Оксана къижулей йикlараб рокъоб. Гьелъул эмен Русланица гьеб рокъобе нуцlа кидаго рагьун букlуна. Лъабабилеб къоялъ школалда кьвагьи бахъараб мехалда Оксанада бажарула гьениса лъутизе, амма гьей нахъеги гьение тlадюссуна хутlаразе кумек гьабизе ва гьений чlвала. Оксанада лъикl лъаан каратэ ва гьелъие бокьулаан спорт. Инсуда ва вацасда цадахъ гlумру гьабулей Оксанаца бачунеб букlана гьезул рукъ-магlишатги. Оксанае букlана 15 сон.
"Дида ккола гьей нижеда аскlой йигин",-гьедин абула 63 сон барав Коков Русланица жиндир яс Оксанал хlакъалъулъ. Гьей гьаюраб къолъун букlараб 1 сентябралда гьес ва гьесул вас 27 сон барав Урузмагица кидаго кlодо гьабула гьеб къо Оксанае бокьулеб букlараб квенги столалда лъун. Школалда гьужум унаго гьесул кlиго гордуялъул цlурдул рекун рукlана. Гьес гьел жеги лъун гьечlо.
54 сон бугей Надежда Гуриевалъ Бесланалъул тlосебесеб школалда 20 соналъ кьолел рукlана тарихалъул дарсал. Гьей гъоркьлъалие йосун йикlана жиндир лъабго лъимергун цадахъ. Гьелъул вас Борисги яс Вераги гьенир хола ва гьезул жаназаби рухlула гьужум гьабулаго гьенибе кьвагьараб жоялъ. Борисица ва Вераца кьурдизе кколеб букlана кьурди. Верал жаназа лъала гьелда букlараб гурдел хутlелаздасан. Надеждада ва гьитlинай ясалда кlола гьениса лъутизе. Гьанже гьей хlалтlулей йиго Бесланалъул цlияб школалда.
Дзебисов Азаматил бищун гlагардисев вацгlал Заур хола дол къояз Бесланалъул школалда. Гьел гьенир цадахъ рукlана Азаматил эбел Светланагун. Хадусан спортзалалъул батула Заурил бухlараб жаназа. 20 сон барав Азамат гьанже Москваялда цlалулев вуго, амма гlодоркъояз гьев кидаго вачlуна Бесланалде, щола школалде. Гьес бицана Заур жинда гlемер вихьулаанин макьилъ, живги цадахъ ахlулев вукlанин, жинца инкар гьабун хадуб тlакlав вихьичlин, гьев жиндие къо-лъикlги гьабун анин.
Лена Гаитова ва яцал Розита ва Зарина Цириховазе 2004 соналъул 1 сентябралда букlана 12, 10 ва 14 сон. Ясазда кlола гьужум байбихьарабго школалдаса лъутизе, амма гьенив хола Лена вац Алан. Ясал хутlулел руго лъикlал гьудулзабилъун ва абулеб буго кlодолъанагlан дол къоял жидее захlамалъулел ругин.
Дзгоева Кристинае букlана 11 сон гьейги гьелъул 10 сон барай яц Дзерассаги эбелги гъоркьлъалие росараб мехалда. Гьенир ккурабгlанаб заманаялда гьел цадахъ рукlуна, амма гьужум байбихьараб мехалда гьел цоцаздаса ратlалъула. Гьитlинай яц гьений хола. Кристина гьанже цlалулей йиго Москваялда ва дол къоял ракlалде щвезаризе гьелъие бокьуларо.
Кристинал яц Дзерассал хоб буго "Хlурулгlиназул гьитlинаб шагьаралда". Гьенир рукъун руго Бесланалъул школалда хварал цоги лъималги.
Ахирисел къоязда бакIалъул гIадамаз спортзалалдаса нахъе росун рукIана гьенир цере рукIарал расанкIаби, трагедия ккун 10 сон тIубалел къояз гьенире росун рачIине ругел цIиял расанкIабазе бакIал гьабизе. 1 сентябаралда школалда ракIалде щвеялъул тадбирал тIоритIун хадуб киналго уна хабалазде щвезе.
2 сентябралда Владикавказалда тIобитIизе буго концерт-реквием. 3 сентябралъул тадбирал лъугIизе руго хваразул къадар рикIкIун гьаваялде хъахIал понцIераби ричIчIаялдалъун.