Исламалъул тIалабалги тIасан бугьтаналги

Ильясов Мурад рикIкIуна Шималияб Кавказалдаги Дагъистаналдаги машгьурав динияв гIалимчилъун. Мурадица Исламалде гъорлъ гIадамал цIаялъе кIудияб хIалтIи гьабулеб букIанин бицана журналистазе гьесул гIагараз. Гьезго абухъе, ахираб заманалда Мурадица дагIват гьабулеб букIана ц1ик1к1унисеб нухалда интернеталдасан.

47 сон барав Ильясов Мурад ккола Лаваша мухъалъул ТIасияб Убеки росулъа. Гьев цIалулев вукIана Мисриялда ва гьал къоязда Москваялдаса МахIачхъалаялде вачIун вукIана. Гьесул вас МустIафаца абулеб буго эмен живго толев вукIинчIин полициялъулаз. Гьез гьев чанги нухалъ ахIулев вукIун вуго гьикъа-бакъиялъе Лаваша мухъалъул жанисел ишазул идараялде.

МустIафаца бицаралда рекъон Исламалъул тIалабал тIадчIун тIуразе Мурадица байбихьарабго, лъицалиго харбал риччан руго гьев вагьабияв вугин. Гьелдалъун гьев парахатго толев вукIун гьечIо полициялъулаз. Мурадил рокъоб чанго нухалъ чIухьбан букIун буго низам цIунулез.

Ахирисеб нухалда гъоркьиса бан бук1ун буго чIухь. «Щиб цIехолеб бугебали полициялъулаз бицичIо, къануналъ гьукъараб жоги гьезда батичIо», - ян абуна МустIафаца.

Мурадил гIагаразул цояс (жиндир цIар тIатинабизе гьесие бокьичIо) абуна жал божулел ругин Мурад хасал хъулухъазул хIалтIухъабаз ккун вукIиналдайин. Гьесго бицана Мурадил телефоналъ ахирисеб нухалда ахIун бачIун бугин МахIачхъалаялда гIагарда бугеб Красноармейск росулъайин ва.

Гьеб росулъ бугеб кирпич къотIулеб заводалдаса цодагьалъ рикIкIад бугин ХIинкъигьечIолъи чIезабиялъул Федералияб хъулухъалъул базайиланги т1аде жубана гьес.

Мурадил вас МустIафаца абуна жиндир инсул тушбаби рукIинчIин. Гьес абуралда рекъон, Дагъистаналда Исламалъул тIалабал тIадчIун тIуралел бусурбаби низам цIунулез рикъиялъул хIужжаби гIемерлъулел рукIиналъ, жидер божи бугин Мурад къуваталъул идарабазул хIалтIухъабаз викъун вукIиналда.

МустIафал рагIабазда рекъон, МахIачхъалаялда бугеб «Шималияб» автостанциялда викъун вуго гьесул эмен. Лъугьа-бахъиналъул нугIзабиги ратун руго МустIафада. Гьел ккола автостанциялъул хIалтIухъабилъун. Гьез бицун буго гIадатияб ретIел ретIарал ярагъ кодоб бугел чаг1аз ккунин Мурад. Къуватги хIалтIизабун, квералги кьурун, жидерго автомобилалда вахинавуна гьез гьев.

МустIафаца бицана автостанциялда лъун ругин видеокамераби. Гьез бахъун батизе бегьула кин Мурад викъаравали. Автостаницялъул нухмалъиялде гIарза битIун буго викъарасул гIагараз видеокамерабазул архив жидехъе кьейилан. Жаваб гьезие жеги щвечIо.

Гьединго гIагараз гIарза хъвана МахIачхъалаялъул Киров мухъалъул жанисел ишазул идараялде, прокуратураялде ва ЦIех-рехалъул комитеталде. Мурадил вас МустIафаца гьединго лъазабуна гIагарал къоязда жиндир эмен ватичIони, жал митингазде рахъизе ругин. МитингазгIаги кинаб букIаниги хIасил кьелин хьул буго Мурадил гIагаразул. Амма гьел ралагьун чIун руго низам цIунулез щиб букIаниги гьабилищали Мурад ватизе.

МахIачхъалаялъул Киров мухъалъул жанисел ишазул идараялда абуна журналистазда жидеда Мурад викъиялъул хIакъалъулъ жеги щибго лъаларин, амма жидехъе щванин МустIафал гIарза.

Дагъистаналдаса журналист Разият АхIмадовалъ абуна «Эркенлъи» радиоялъе гIадамал рикъиялъул хIужжаби тIагиIнариялда тIад республикаялъул тIалъи тIадчIун хIалтIизе кколин.

Разият АхIмадова: « Интернеталда «Дагъистанилан» хъварабго, цебе рехун бачIуна тIоцебе лъабго жоялда хурхарал лъазабиял: гIадамал рилулел руго, рикъулел руго, чIвалел руго.

Гьединаб ахIвал-хIал республикаялда букIаго, гьанир курортал разеян хьулгун руго республикаялъул нухмалъиялда ругел. Бищун цере тIуразе кколел масъалабазда бералги къанщун чIун, цогидал суалал тIуразе кIоларо. Цо-цоял низам цIунулез жидерго хIалтIи тIаса ккураб къагIидаялъ гьабулеб букIин лъачIого ратиларо дагъистаналъул нухмалъулевги, хIакимзабиги.

Мисалалъе, дир вацгIал гъоркьисала ккуна полициялъулаз, гьесул рокъоб граната батанинги абун. Диналде кинабгIаги бербалагьи бугев чиги гьев вукIинчIо. Гьесул рокъоб чIухь балеб мехалъ, граната батун буго шкафалда жаниб. Гьебги жалго низам цIунулез рехараб. Нижеца ахIи-хIур бахъинабураб мехалда, вацгIал нахъе вичана. Гьединал хIужжаби чанги руго республикаялда. Гьел такрарлъизе ричазе бегьулареблъи бичIизе кколарищ нухмалъиялда. Гьезулъ гIайибиязе къануналда рекъон бищун вахIшияб тамихI гьабизе ккола».

ГIадамал рикъиялъул хIужжаби гIемерлъулел рукIиналъул бицунеб буго Дагъистаналда бугеб инсанасул ихтиярал цIунулеб чанги гIуцIиялъ. Мисалалалъе, «Мемориал» гIуцIиялдаса щварал баяназда рекъон, гьаб соналъул байбихьудаса рикъаразул гIагарзухъа гIуцIиялде щвана 28 гIарза.

«Дагъистаналъул улбул» абураб гIуцIиялъул нухмалъулей ГIисаева Светланал рагIабазда рекъон, гьаб соналъул байибухьадасан Дагъистаналда викъана лъебералдаса цIикIкIун чи.
Инсанасул ихтиярал цIунулез гьединго лъазабулеб буго, гIемерисел рикъарал ратулин жанисел ишазул идарабаздаян.