Москваялда гIагарда бугеб Долгопрудный шагьаралдаса Дмитрий Соколовасул гражданияй чIужулъун йикIанин Асияловаилан лъазабулеб буго Россиялъул цIех-рехалъул комитеталъ. Соколов федералияб цIехеялда ай розыскалда лъазавун вуго. Гьесда гIунIтизабулеб буго гIайиб, гьес МахIачхъалаялда 25 маялда Ленинил майданалда аскIобе гIуцIанин теракт. РакIалде щвезабила, гьеб къоялда жийго жинцаго кьвагьизаюна Мадина ГIалиевалъ, кIиго чи хвана, къогояв лъукъана. ЦIех-рехчагIаз лъазабуралда рекъон, шагьидазул рачел гьелъие хIадур гьабуна Соколовас. Гьединабго рачел гьес жиндирго чIужу Асияловалъеги хIадур гьабунин, хъвалеб буго «Известия» газеталъ.
«Коммерсантъ» газеталъ хъваралда рекъон, Асияловалъулгун Соколовасул лъай-хъвай ккун буго интернеталдасан. 20 сон барав Соколовасухъе Москваялде ун йиго 30 сон барай Асиялова. Хадур гьел кIиялго Дагъистаналде гочана ва Соколов ГIабдулжаббар цIарги босун «рохьилазде» гъорлъе анаилан хъвалеб буго газеталъ. Гьес лъазабун буго кьвагьул алатал кин гьарулелали ва чанги кьвагьиялъулъ гьев гIайибияв вукIине бегьулин хъвалеб буго BFM сайталда.
Соколовасул эбел-инсуда низам цIунулез лъазабун букIун буго гьев рохьилазда гъорлъ вугин, амма гьелда гьел божулел рукIун гьечIо. Гьез гIарза кьуна «Жди меня» передачаялдаги, риларал гIадамал ралагьулеб Liza Alert гIуцIиялдаги. Асияловагун бухьен ккун букIун буго Сокоовасул инсуца ва гьесда гьелъ абулеб букIун буго жинда лъалирн кив вугев Дмитрий, амма гьев «рохьилазда» гъорлъ вугин абураб жо гьересияб бугин.
Волгоградалда кьвагьи ккараб бакIалда низам цIунулезе батана Асияловалъул паспорт. Интернеталда чанги бахIсал ккана гьелда тIаса. Цояз хъвалеб буго гьеб уяб паспорт гьечIин, щайгурелъул хIижабги ретIун сурат бахъизе гьукъун бугин къануналъ, цогидаз гьезие жаваб кьолеб буго паспорт гьересияб гьечIин. Интернеталда кIиго сурат бакана паспорталъул. Цояб сураталда Асиялова хIижаб гьечIого йиго.
Низам цIунулезул лъазабиязда рекъон, Асиялова эбелгун кIалъалей йикIун гьечIо. Асиялова ккола Гъуниб росулъа. Гьелъул эбел Равзат Асияловалъ бицана журналистазе яс жиндихъе моцIалъ цее кIалъанин. КъанагIат гурони кIалъалей йикIун гьечIо эбелалъухъе Наида, щайгурелъул Равзат гьелда семулаан.
«Турокил чIужулъун йикIана Наида, гьесухъа нахъе араб мехалда гьей гIурусасе росасе ана ва гьеб мехалда ретIана гьелъ хIижаб, как базе байбихьана», - ян бицана журналистазе Равзатица. Гьелъ гьединго абуна, жиндие рекIее гIоларила хIижаб ва гьелдалъун семулей йикIанин жий ясалда.
Равзатица гьединго бицана, гьелда ясалъул рос киданиги вихьичIин, амма лъалеб букIанин гьел кIиялго МахIачхъалаялда гIумру гьабулел рукIараллъи.
Информациялъул гIемерисел алатаз хъвана Асиялова квешго унтун йикIанин, гьелъул рукьби турулел рукIанин ва гь.ц. Гьелъул унти сабаблъун гьей детдомалдаги кьунилан хъвана цо-цо агентствобаз. Равзатица абуна гьеб кинабго гьереси бугин, Наида яцалгун Гъуниб росулъ гIунилан ва гьелъул чехь гурони унтулеб букIинчIин, гьебги унтизе байбихьанин цодагьалъ цебе, хIалакълъизеян диетаби хIалтIизаризе Наида лъугьарай мехалда.
Гъуниб росдал школаялъул директор Байзат МухIамадовалъ бицана «Эркенлъи» радиоялъе цебе Наида Асияловалъ лъималазда кьурдизе малъулеб букIанин.
Байзат МухIамадова: «Гьелъул гурони бицунеб гьечIо нижеца. Гьей лъикIай яслъун йикIана, адаб-хIурмат бугей, хьвади-чIвадиги гьелъул цогидаздаса хисараб букIинчIо школалда цIалулеб мехалда. Диналдехун юссарайилан гьелдаги абизе бегьулароан. Цогидаз гIадаб ретIелги ретIун юкIунаан гьей. Цебе нижехъ Гъуниб батIаго рукIинчIелъул диналъул нухда лъугьарал чагIи. Анкьго соналъ цебе ана гьей гьаниса нахъе. Москваялде анилан бицунеб бугоха. ХIалтIи балагьизе ун йиго гьей. Школа гьелъ лъугьана I3 соналъ цебе. Школа лъугьун хадуб гьей хIалтIулей йикIана Художественнияб школалда. Гьелъ кружокал рачунаан лъималазе, кьурдизе малъулаан гьезда. Амма гьеб школа къана хадуб. Гьелдаса хадуб ун ятилаха гьей Москваялде хIалтIи балагьизе».
Равзат Асияловалъул мадугьал Аминат МухIамадовалъги абуна «Эркенлъи» радиоялъе Наида диналде юссарай гIадан йикIинчIин.
Низам цIунулезул баяназда рекъон, Асияловалъ теракт гьабизе кколеб букIун рагIула Москваялда. Гьение гьей уней юкIун йиго автобусалда МахIачхъалаялдас