Шамат къоялъ Советская къватIалъе ХIайдар ГIалиевасул цIаркьеялде дандечIараб тIолгодагъистана
МитингчагIаз жидерго тадбир МахIачхъалаялда Сулейман Стальскиясул цIаралда бугеб ахикь тIобитIизе бугин хъван букIана Дагъистаналъул юстициялъул министерлъиялде кьолел документазда. Амма тахшагьаралда гьединаб бакI гьечIин багьанаги батун митинг тIобитIизе разилъи кьечIо министр Азади РахIимовас. МитингчагIаз гьес ургъунго гьабулеб иш бугин гьебилан рикIкIунеб буго, щай гурелъул живго министрги азербайджанав вукIиналъ, гьелда тIадеги Дербенталъул мэр Имам Яралиевасулги кIудияв гьудул вугин гьевилан лъазабулеб буго лезгиязул «Садвал» жамгIияб идараялъул нухмалъулев Альберт Эседовас.
Альберт Эседов: «Нижеца жакъа Юстициялъул министр Азади РахIимовасда МахIачхъалаялда Сулейман Стальскиясул цIаралда бугеб ах букIин лъазабулеб ва бихьизабулеб буго. Гьес тахшагьаралда гьединаб бакI гьечIинги абун ниже митинг тIобитIизе рес кьечIо, гьединлъидал жакъа нижеца цо-цоккун пикетал тIоритIулел руго. Ниж Дербенталда Советская къватIалда ХIайдар ГIалиевасул цIар кьеялда дандечIун руго. Нижеца хIакимзабаздаса Россиялъул къанунал цIунизеги, халкъалъе пайдаяллъун рукIинеги тIалаб гьабулеб буго. Владимир Путин вуго нижер президент, Дербент Россиялде гьоркьобе уна! Нижеца лъикIал миллиял гьоркьолъаби рукIиналъул рахъ ккола»
МахIачхъалаялда пикетал торитIана шагьаралъул аслияб майданалда, Авар театралда аскIоб бугеб Сулейман Стальскиясул ахикь, Дагъистаналъул милиляб политикаялъул министерлъиялъул кIалтIа ва тахшагьаралъул аслияб Расул ХIамзатовасул цIаралда бугеб къотIноб лъураб живго поэтасул ва гьебго къотIноб дагьаб гъоркьегIан бугеб Россиялъул Император Перт I монументазда цебеги.
Руслан Къасумов
Руслан Къасумов: «Ниж Петр I, ХIажи – Давудил ва цойгидал Россиялъул тIадегIанал васазул ирсилал ккола. Гьединлъидал Россиялъул цолъи цIунизе нижеца бажарараб гьабулеб буго. Цо-цоял къватIалги, ракьалги Россиялъул интересалги ричизе лъугьун руго. Нижеца гьеб киданиги биччаларо. Дагъистанги Россиялда гьоркьоб буго ва букIине буго, батIиял республикабиги пачалихъалги нилъее гьанир хIажатги гьечIо».
ГIурус театралда аскIоб бугеб Расул ХIамзатовасул монументалде аскIореги щвана пикетчагIи. Гьениб цебе Азербайджаналда магIарулазулгун лезгиязул бугеб захIматаб хIалалъулги, гьезие гьарулел ругел захIмалъабазулги бицана пикет тIобитIулез.
Альберт Эседов: «Азербайджаналда магIарулазулги, лезгиязулги, цойгидал гьитIинал халкъазул ихтиярал хвезарулеб бугеб мехалда къватIалъе ХIайдар ГIалиевасул цIар кьей нижеца кутакалда мекъаб, Россиялъул ва Дагъистаналъул интересал хвезабулеб иш бугилан рикIкIуна. Нижехъе щварал баяназда рекъон азербайджаналъул информалатаз «Дербент Южный форпост России» абураб ахIиялда гъоркь тадбирал тIоритIулел ниж Азербайджаналъул жанисел ишазде гьоркьоле лъугьунел ругин ва Владимир Путиниде данде рахъарал чагIи ругилан рихьизарулел руго. Гьеб буго гьадингояб чIанда. Нижеца президентасул ва гьес гьабулелъул рахъккола кидаго. Ниж руго Россиялъул гражданал».
Дербенталда Советская къватIалда цIар хисиялде данде цохIо жанунияб Дагъистаналъул гIадамал гурониги республикаялъул батIи-батIиял жамгIиял идарабиги чIун руго. Гьезул цояблъун кколеб Россиялъул Афгъанистаналда рагъулел рукIаразул советалъул Дагъистаналда бугеб бутIаялъул нухмалъулев хисулев Шамиль Хадулаев вачIун вукIана пикеталда гIахьаллъи гьабизе.
Шамиль Хадулаев
Шамиль Хадулаев: «29 июналъ тIобитIизе ракIалда букIараб гьеб митингалъул рахъкквезе ракIалда букIана нижер Россиялъул Афгъанистаналда рагъулел рукIаразул советалъул Дагъистаналда бугеб бутIаялдаги. Митинг Рамазан ГIабдулатIивасул ва Владимир Путинил рахъккун ва Дербенталда Советская къватIалъе ХIайдар ГIалиевасул цIаркьеялде дандечIун тIобитIизе букIана. ЖамгIияталъе лъазе бокьун буго кинал кутакал ишазухъ къватIалъе ХIайдар ГIалиевасул цIар кьезе кколебали. Гьединго лъазе къваригIун буго Дербенталъул шагьаралъул мажлисалъ щай лъиданиги цIехечIого гьеб къватIалъул цIархисиялъул хIакъалъулъ хIукму къабул гьабурабали. Россиялъул къануналда рекъон тарихияб цIар цIунизе ялъуни цIигьабураб къватIалда цIар лъезе гурони гьединаб хIукму къотIизе бегьуларо. Дагъистаналъул юстициялъул министерлъиялъ ургъунго гьеб митинг тIобитIизе рес кьечIелъул, гьал жанунияб Дагъистаналъул жамгIияталъул рахъкквезе вачIун вуго дун жакъа пикеталде».
Дагъистанлда тIоритIизе течIониги Москваялда ва Ростовалда 29 июналъ гьаруна къватIалъе ХIайдар ГIалиевасул цIаркьеялде дандечIарал митингал. Кавказский Узел сайталъул баяназда рекъон Москваялда митингалда гIахьаллъи гьабун буго кинавниги 200 чияс ва гьеб тIобитIиялъе киналниги квалквалалги рукIун гьечIо.