ЧIвай-хъвеязул сияхI къокълъулеб гьечIо…

ЦIех-рехалъул комитеталъул хIалтIухъан Рамазанов Рамазан тIад рекIараб автомобиль кьвагьизабун буго хамиз къоялъ радал сагIат ичIго тIубалеб гIужалъ, тахшагьаралъул Нуровасул цIаралда бугеб къотIноб. Рамазановасул Hyundai Sonata маркаялъул автомобилалъул тIинда хурхинабун букIун буго кьвагьул алат. Лъукъарав Рамазан азарханаялде хъамун вуго, гьенив операция гьабулеб столалда къадаралде щун вуго гьев. Рамазанв ккола Хайдакъ мухъалдаса. ЦIех-рехалъул комитеталде хIалтIизе вачIиналде гьев хIалтIулевв вукIана МахIачхъалаялъул наркотикал тIиритIизариялде данде къеркьолеб идараялъул адвокатлъун. ЦIияб хIалтIуде вачIун щуго моцIги хадубги гурони бан букIун гьечIо, гьениве вачIун хадув гьев тIамун вукIана Ленинский мухъалъул кIудияв цIех-рехчиясул хъулухъалде.

ТакъсирчагIи щал рукIаралали жеги чIезабун гьечIилан бицана цIех-рехалъул комитеталъул Дагъистаналда бугеб бутIаялъул пресс-хъулухъалъул нухмалъулев Темирбеков Расулица:

Темирбеков Расул: «Кьвагьул алат рекIинабун букIун буго Рамазан гIодов чIолеб рахъалда гъоркь. Кьвагьиялъул хIасилалда щварал гIемерал ругънал сах гьабун бажаричIо, гьев азарханаялда операция гьабулеб столалда тIадго хвана. Гьеб такъсиралда тIасан цIех-рехалъул комитеталъ рагьун буго ункъо статьялда рекъон такъсир гьабиялъул иш: ЦIех-рехалъул хIалтIи гьабулев чиясул гIумруялде квер борхи, къанунияб гуреб куцалъ ярагъ цIуни ва хIалтIизаби, кьвагьул алат хIалтIизби гьединго чиясул буголъиялъе зарал гьаби.

Нижерго хIалтIухъаби гьединаб балагьаб лъугьа-бахъиназдаса цIуна-къазелъун гьарулел малъа хъваял рукIуна нижер, нужерго автомобилалда хадуб хъаравуллъи букIинабеян, щакаб тIагIел-алат бугищалт лъикI хал гьабеян ва гьелда релълъарал насихIатиял тадбирал тIоритIулаха нижеца. Амма Аллагьасул хъваялдаса рочIизе бакI гьечIелъул, кингоги гьадинал вахIшиял такъсирал нахъ чIван бажарулеб гьечIоха».

Цо моцIалъ цебе гIадин Рамазан гIумру гьабун вукIараб рукъалда аскIоб полициялъул чагIаз пуланаб такъсир гьабиялда хурхун шаклъи ккарал чагIи ралагьизелъун чIухь балеб букIун буго. Гьеб мехалъ цо полициялъулавги чIван лъутун унаго цогидав полициялъулас чIван вукIун вуго гьеб такъсир гьабиялда щаклъи букIаразул цояв. Нижехъе щварал баяназда рекъон гьеб лъугьа-бахъиналда тIасан цIех-рех гьабизе тIадкъан букIун буго Рамазанида. Щаклъи буго гьелъие гIоло гьабураб такъсир батизеги бегьулин гьев гIумруялдаса ватIа гьавиян.

Гьединго Рамазанида эбел-инсуца гIемер абулеб букIун автомобиль агъаз гьечIого рагьдухъго тогейин гьелда хадуб хал кквейилан, гьа, лъие къваригIарав чийин дун, дие хIинкъизе бакI гьечIилан гьес инкар гьабулеб букIун буго гьелдаса.

Рамазан Рамазанов тIоцевесев хIалтIухъан кколин исана жидер идараялда чIваравилан бицана Расулица. 2007 соналдаса нахъейин абуни цIех-рехалъул комитеталъул вакилзабазул Дагъистаналда чIван вуго кинавниги анкьго чи. Рамазан вукъана МахIачхъалаялда. Гьесул гIумруялъул букIана 36 сон. Нахъе лъабго лъималги, гIолохъанай лъадиги хутIана къороллъуда.