Министрасул «бецIал ишазде» канлъи речIчIизабулеб буго

БекIмурза БекIмурзаев хIалтIулев вукIараб идараялдаса прокуратураялъ гьесде гIунтIизарулел гIайибазда тIасан баян щвечIо «Эркенлъи» радиоялъе. Дагъистаналъул прокуратураялъулгун бухьен гьабидал гьез бицана такъсир гьабиялъул иш жеги рагьун гьечIин цеве вукIарав министрасда тIадилан. ЦIех-рехалъул киналго материалал Дагъистналъул цIех рехалъул комитеталде кьун ругилан, гьезда такъсир гьабиялъул гIайиб гIунитIизабиялъе хIажатал далилал гьенир ратании гьез гIунтIизабизе бугин БекIмурзаде такъсир гьабиялъул гIайибан бицана гьениб.

Дагъистаналъул миллияб политикиялъул, къватIисел бухьеназул ва диналъул рахъалъ министерлъиялъул вукIарав нухмалъулев БекIмурзаев БекIмурзатIе гIайиб гIунтIизабулеб буго гьес нухмалъи гьабулеб идараялъул цIаралдасан Лотос басмаханаялъулгун гаьраб къаотIиялда рекъон гьес чанго миллион гъуршие зарал гьабун бугин республикаялъул бюджеатлде. Гьеб гIарацги тIад харж гаьбуна жинцаго хъвараб тIехь басмаялде бахъизе хIадурулеб букIун буго министрас. ГIарцул гIаммаб къадар букIун буго лъабго миллион гъурущ. Гьеб гIарцуда гьоркьосан «Лотос» басмаханаялъ авторасул захIматалъухъ мухь хIисабалда БекIмурзае тIадбуссинабун буго 870 000 гъурущ.

Басмаханаялъулгун гьабураб къотIиялда рекъон БекIмуразаца хIадуризе кколаан ункъо томалдасан данде гьабураб тIехь, гьелъухъ «Лотос» басмаханаялъ гьесие кьезе кколаан миллион гъурущ гIарацги.

Амма жакъа къоялде щвезегIан БекIмурзаца хIадурун буго гIицIго гьеб тIехьалъул кIиго том, хIутIараб кIигояб къватIибе бачIун гьечIо. Гьеб кинабгоги хIисбалде босун гIунтIизабулеб буго прокуратураялъ экс-министрасде гIайиб

Живго я БекIмурзал, я гьесул адвокатасул кинал ругониги комментариял жеги къватIире загьирлъичIо.

Дагъистаналда цIияв прокурор хисаралдаса гьаб кIиабилеб хIужа бугин абизе хIукуматалъул кIудиял хъулухъчагIазда, гьединго кIудияб идараялъул хIалтIулъ къанун хвезабиялъул хIужаби загьир гьарурал. «Эркенлъи» радиоялъ дагьаб цебегIан бицун букIана МахIачахъалаялъул жанисел ишазул идараялъул лъабго хIлтIухъан хъулухъалдаса эркен гьавиялъул. Гьеб идараялъ 30 миллион гIанасеб гъурущ гIарац цо хасал чагIазул мурадазда рекъон харж гьабун бугилан абураб гIайиб гIунтIизабуна прокуратураялъ гьезде.

Гьаб нухалъ миллияб политикаялъул ва диналъул суалазул рахъалъ министрасул хIалтIулъ ккарал гIунгутIаби чIвазаруна къватIир. Гьелъул магIна кколищ Дагъистаналъул цIияв прокуррорас кIуди-кIудиял такъсирал къватIир чIвазаризелъун хIалтIи гьабулеб бугилан абураб? Гьеб суал нижеца кьуна юрист Сулейманов Сулеймание. БекIмурза БекIмурзаевасул гIайиб къватIиб чIвазаби гьеб цохIо прокурорасул буюрухъалда рекъон тIубалеб иш гурин, республикаялъул тIалъиялъги квербакъун батулин гьелъиеян рикIкIунеб буго Сулейманица:

Сулейманов Сулейман: «БатIи-батIиял цIех рехалъул идарабазде материалал ритIун хIалтIи гьабичIого жалго лъугьун прокуратураялъ гIайиб гIунтIизабулеб къагIида букIунаро. Гьелъие квербакъи республикаялъул тIалъиялъги гьабун батила узухъда. Жибго прокуратураялъул руго цогидалги хIалтIи гьабиялъулъ лъикIал хIасилал рихьизаруралги хIужаби. Амма гьединал кIудиял хIакимзабазе гIайиб гIунтIизабиялъул хIукму гьез жидецаго гьабуларо».

Прокуратураялъ БекIмурзадехун кIвар буссинабиялъе сабаблъун ккараб, гьес хIадур гьабураб тIехьалда цIар ккола «Инсанияталъе бугеб хIинкъи ва хIинкъи гьечIолъи балагьиялъул нухда бугеб дунял» абун. Министрлъун вугебгIан заманаялъ гьев гIемер вихьизе бегьулаан Дагъистаналъул рухIияб идараялъул вакилзабигун цадахъ гIодов чIун батIи-батIиял диниял мажлисазда данделъабазда кIалъаял гьарулев. Амма гьоркьоб заман иналде халкъалда гьоркьоб тIибитIун букIана хабар тIарикъаталъул церехъабазда берцин вихьизе гаргадулевги вукIун чанги хIилла макруялъул ишал тIатун ругин гьесда хадурилан.