Марат Гунашевасде гIайиб гIунтIизабулеб буго МахIачхъалаялъул полициялъул нухмалъулев МухIамадов АхIмад чIваялъулъ гIахьаллъанилан. Гьединго цойги гIайиб гIунтIизабулеб буго Маратица хъачагъал сах гьарулел рукIанин, гьединго сах гьавун вугин низам цIунулез рохьилавлъун рикIкIунев, Интерполалъ валагьулев Ибрагьим ХIажидадаев.
Низам цIунулез гьев вачун ана азарханаялдаса, Маратица унтарасе дару биччалеб мехалда. Байбихьуда лъалеб букIинчIо Гунашев вачун араб бакI. Хадуб жамгIиял хIаракатчагIазги цогидазги ахIи-хIур бахъинабидал, лъана гьев Владикавказалда жанив тIамун вукIин. Гьедин Шималияб Гьириялде гьев вачун иналъул магIна бичIчIулеб букIинчIо гIагарлъиялда. Низам цIунулез абулеб букIана Маратие жиндиего хIинкъи букIинаредухъ вачанин гьев дове.
Марат Гунашевасул лъади Аминаца дагьалъ цебе Россиялъул президент Путинихъе кагъат битIун букIана жиндир рос эркен гьавизе квербакъеян. Амма щиб гьабуниги гьелдаса хадубги диваналъ хIукму гьабун букIана Марат Владикавказалда 27 январалде щвезегIанги туснахъ гьавизе.
Хадубги цIех-рехчияс хитIаб гьабуна гьенибе 27 апрелалде щвезегIанги туснахъалъув тейин гьевилан. Гьелда дагIба бан адвокатас хъвараб гIарзаги букIана. Гьелъул хал гьабизе кколаан 13 февралалда. Гунашевин абуни 12 февралда вачун вуго Владикавказалдас
Заур МухIамадов, адвокат: "Нижеца рикIкIуна гьев дове мекъи вачун вукIанилан. Гьедин диваналде гIарзаги хъвана. Гьанже битIун гьелъул хал гьабизе заман щведал, нахъе вачун вуго доваса гьев".
КигIан жидеца ахIи байдал вачинчIев Гунашев МахIачхъалаялде, гьанже вачиналъе гIилла цIехедал, официалияб куцалда низам цIунулез щибго бицунеб гьечIин абулеб буго адвокатас. Адвокатасул рагIабазда рекъон, щибаб нухалда гьез диваналде гьабураб гIарзаялда данде цIех-рехчагIаз босун бачIунеб буго цого материал, тIаде цIияб жоги балагьичIого.
Заур МухIамадов: "Нижее щибниги баян гьабулеб жого гьечIо гьезул. 12 декабралда дове Владикавказалде вачун аралдасаги, гьанже МахIачхъалаялде вачун вачIаралдаса нахъеги киналгIаги цIех-рехалъул тадбиралги гьарулел гьечIо Маратие. Цин дова чIезавуна жанив тIамун, гьанже гьаниве вачун чIезавун вуго гьединго".
Марат Гунашев туснахъалъуса эркен гьавеян Россиялъул президентасде щвезегIан хитIабал хъвай гуребги, МахIачхъалаялда тIоритIулел митингаздаги борхана гьеб суал. Масала, 8 февралалда букIараб митингалда. Гьенив Маратил эмен Камил Гунашевас гьадин абун букIана.
Камил Гунашев: "ГIайиб батани, гьабе гьесие диван, амма гьеб гIайиб батулареб мехалда ургъизейищ гьеб кколеб. Гьедин цIех-рехалъулъ цоялда хадуб цояб гъалмагъир бугоха нижеда бихьулеб. Цеве дун вукIунаан дида хъвалеб жо гурин гьеб суал. Гьанже гьеб пикру хисана дир".
Сахлъиялъул ишги лъикI гьечIин абулеб буго адвокат Заур МухIамадовас. Цо заманалда нухда авариялде ккун, квегIаб бох букIанила унтун. Щвалде щун сах гьабичIолъиялъ гьанже махIалда бугеб бидурихь гьорон бачIун, ахадаса хIетIейин абуни чIегIерлъизе байбихьун бугин бицана ЭР-ялъе адвокатас. Гьелда бан чIезабураб сакъатлъиялъул лъабабилеб даражаги рагIула Гунашевасул.