9 июлалда диваналъ россияъул къануналде данде кколареб хIалалъ хъван бугин рикIкIана Гъизляралъул коньяк гьабулеб заводалъун нухмалъулевлъун Олег Артюхов тIамун Дагъистаналъул росдал магIишаталъул министр Батал Баталовас хъвараб буюрухъ.
Исана май моцIалда Баталовас гьабураб гьеб хIукму Россиялъул захIматалъул къануналъул чанго бутIаги хвезабун гIуцIун бугин рикIкIана Дагъистаналъул прокуратураялъ, гьединлъидал гьелда тIасан гIарзаги хъван букIана гьез диваналде.
ГIарзаялда прокуратураялъул вакилзабаз хъвалеб буго цебе Гъизляралъул коньякалъул нухмалъулевлъун вукIарав Евгений Дружининилгун гьабураб хIалтIул къотIи-къай хвезабизе ккани цин хасаб комиссиялъ разилъи кьезе кколин, гьелда тIадеги цIияв нухмалъулев тIамулеб буюрухъалда Дружининилгун гьабун букIараб хIалтIул къотIи-къай кида биххизабурабалиги хъван букIун гьечIо, гьеб кинабго къанун хвезаби бугинги рикIкIун прокуратураялъул рахъги ккун диваналъ Артюхов къануналде данде кколареб хIалалъ тIамун вугин хъулухъалдейин абураб хIукму гьабуна.
Гьединго диваналъул хIукмуялда хъвалеб буго хIалтIуде вачIун бажарулареб мехалда чи хъулухъалдаса вахъизе бегьуларилан. Евгений Дружинин чанго моцIица унтун вугинги абун хъулухъалда вукIинчIо.
Гьеб Гъизляралъул коньяк гьабулеб заводалъул нухмалъулесул хъулухъалда хурхун ахIи-хIур исана февралалда бахъана. Гьеб мехалда Республикаялъул бетIер Рамазан ГIабдулатIиповас лъазабуна 20I4 соналъул сентябрь моцI щвелалде гьеб завод бичизе бугилан. Гьелъул багьаги 4 миллиард гъурущ бугин чIезабун букIана, амма гьеб хIукмуялдаса разигьечIолъи загьир гьабуна заводалъул хIалтIухъабаз. Гьез чанцIулго батIи-батIиял акциял тIоритIана, цо нухалда гъизляр бакьулъ I000 ялдаса цIикIкIун чи гIахьаллъараб митингцин гьабун букIана гьез. Гьел завод бичиялда данде чIчIун гурелги, чанги саназ гьелъул нухмалъуда вукIарав Евгений Дружининил рахъккунги рахъун рукIана къватIире.
Гьеб дандечIей букIиналъе кIудияб гIиллалъун кканин абизе бегьула цин гьеб завод Дербенталъул чогърол заводалъул нухмалъулев СагIадулаев МухIамадица босизехъин бугин, гьев нухмалъудеги вачIине вугин абура хабар. ГIемерисел гIурусал хIалтIулеб гьеб заводалда гIурус миллаталъул гурев чи виччаларин чIун ругин гIадамалин абулеб букIана официалияб гуреб къагIидаялъ. Амма Дружининил бакIалда цойги гIурусав Александр Кручанов тIамун хадув гьевги гьев хIалтIухъабазда вихьизавизе рачIарал Дагъистаналъул росдал магIишаталъул министрги, республикаялъул буголъиялъул министрги заводалда жанире къазецин риччачIо гьелъул хIалтIухъабаз. Гьелдаса хадуб исана апрель моцIалда заводалъул нухмалъуде Олег Артюхов тIамун хадуб хIалтIухъабаз гьев лъикI къабул гьавун вукIинчIо, жидеца митинг тIобитIизе бугин гар-галел рукIана гьел, амма гьелдаса нахъе цониги акция гьабичIо коньяк гьабулеб заводалъул хIалтIухъабаз.
Экспертазги рикIкIунеб буго завод бичиялъ республикаялъул бюджеталъе кIудияб зарал гьабизе бугин. Республикаялда ракIарулел магъалабазул 28 процент кьолеб буго цохIо гьеб заводалъ. Гьединго экспертаз рикIкIунеб буго гьеб ГIабдуалтIиповас абураб 4 млрд гъурщиде бичизе бегьуларилан, гьелъул багьа чанцIулго нухалъ цикIкIараб бугила.