ЦIияб соналда хурхарал тадбирал тIоритIизе ва гьеб байрам школазда ва цогидал бакIазда тIолго Россиялдаго гIадин, Дагъистаналдаги кIодо гьабизе кколин лъазабуна Рамазан ГIабдулатIипас араб анкьалъ Дагъистаналъул хIинкъи гьечIолъиялъул шураялъул хIалтIухъабигун букIараб данделъиялда. Гьелдаго цадахъ хал кквезе кколила байрамазул къоялъ киналгIаги такъсираздаса гIадамал цIуниялда хадуб ва кIваркь кьезе кколилан лъазабуна президентас.
Your browser doesn’t support HTML5
МахIачхъалаялда накIкIил гъветI
ГIабдулатIиповасул амру тIубан, шагьаразда, мухъазул центразда ва цо-цо чIахIиял росабалъ лъун руго елкаби. Гьедин, Хунзахъ мухъалъул бетIерас жиндирго инстаграммалда лъун буго сурат Хъаладухъ ва администрациялъул минаялда цебе лъураб елкаялъул суратгун.
Амма ахирал соназ Дагъистаналда цIияб сон кIодогьабиялде бербалагьи хисун буго. Гьелъие гIилла кколеб буго диниял хIаракатчагIаз гьеб байрам кIодогьабиялда данде гьабулеб хIалтIи. Гьедин масала, араб соналъ цо-цо мухъазда росабазул дибирзаби росдал гIолилалгун тирун цIияб соналъул сордоялъ хал кколеб букIун буго гIадамазда хадуб, байрам гьабулел ратаразе вагIза насихIат гьабун.
Гьелдаго цадахъ, цо-цо бакIазда цIияб соналда хурхарал тадбиразда гIахьаллъи тIадаблъун гьабулеб буго гIадамазда. Гьедин, МухIамадов Ибрагьимихъе школалдаса битIун бачIун буго кагъат. Гьелда хъваралда рекъон, цIияб соналъул тадбиралде лъимал рачIунел гьечIони, гьез хъвазе кколеб буго мухIканаб гIилла гьенире рачIинчIолъиялъе. Ибрагьимица абулеб буго жив бусурбанчи вугин ва гьеб къо жинда байрамлъун бихьуларин.
МухIамадов Ибрагьим: « Школалда мугIалималъ тадбиралде рачIунел рачIунарел чагIи цIехедал, дир лъималаз рачIунарин абун буго. Школалъул тIалъиялъ лъазабун бугила щибаб классалъул нухмалъулезда цогIаги чи гьеб тадбиралдаса камичIого рукIине. Нагагь камуни гьел хIалтIудаса махIрумлъизецин рес бугила. Гьединлъидал гьез цереккунго ритIун рачIана рокъоре цIезе кагътал щай гьеб тадбиралде лъимал рачIунарелали. Абулелеб буго рачIинчIезул цIарал полицилде кьезе ругилан. Дида бичIчIуларо, 800 чи цIалулеб школалда бищун кканани 20 чи вачIинчIолъиялъ щиб ккезе бугебали».
Бусурбабазул гIалимзабаз ахирас саназ цIияб сон гьаби тезе ккелин балеб ахIи мекъи бугин, гьелдаго цадахъ, гIадамазда хIал гьабун байрам гьабизабиги мекъаб бугин баян гьабуна философиял гIелмабазул кандидат Садикъов Саидица. Цияб сон кIодо гьаби диналда хурхинабиги мекъаб бугила.
Садикъов Саид: « Жакъа нилъеца гIумру гьабун буго светияб хIукуматалда. Рахъун цIияб сон бусурбабазул байрам гурин абизе бегьуларо гIалимзабаз. Нилъ динияб пачалихъалда гуреллъидал ругел. ЦIияб сон ккола светияб байрам, цояб сон лъугIун цогияб сон бачIин кIодо гьабулеб. Гьеб диналда хурхинабиги мекъаб буго. Гьедин босани, жакъа цIияб сон ширкалъул гIадамазул байрам бугин абулеб батани, киналгоги байрамал руго цере рукIарал диназдаса рачIарал. Киназулго букIуна аслу. Гьелдаго цадахъ тIалъиялъ букIа, лъица букIа, бокьичIев чиясда байрам кIодо гьабизабиги мекъаб буго. Щибав инсанасул ихтиярал ва эркенлъи гьукъи ккола гьеб. Светияб хIукуматалда рукIун киналго хIукуматалъул байрамал тIоритIизе ккола. Амма хIал гьабизе бегьуларо».
ЦIияб сон кIодо гьабулел ва гьеб байрамлъун рикIкIунарезда гьоркьоб тIоцебесеб сон гуро бахIсал унел ругел интернеталдаги. Гьел бахIсазда гIахьаллъулезул щивасул бугин жиндирго хIакъикъат, амма цогидазда байрам гьабизе гьукъи, яги гьеб тIадаблъун гьаби мекъи бугин рикIкIунеб буго тарихчи ХIажимурад Доногъоца. Живго ХIажимурадица цIияб сон байрамлъун рикIкIунеб гьечIо, амма гьелдаго цадахъ, цогидал гIадамазе гьеб байрам рохалида тIобитIи гьарулила жинца.