Дагъистаналъул цIех-рехалъул идараялъ бетIералдасанго лъазабулеб букIана Нугъай мухъалъул жанисел ишазул бутIаялда полициялъул подполковник Жамалудинов Сайпулакъадица гьебго мухъалдаса 22 сон барав ХIасанов Эрадилида туманкI лъачIого речIчIун бугилан. Гьев чIварасул гIагарлъи гьеб лъазабиялда рази рукIинчIо, ва гьал къоязда экспертизаялъул баянал кодоре щун хадур гьез абулеб буго жал гьев подполковник туснахъгьавичIого гIодоре риччазе гьечIилан. Экспертизаялъул хIакъалъулъги, гьелъул баяназулги бицана ва гьезда хурхун жидерго пикру загьир гьабуна «Эркенлъи» радиоялъе чIварасул гIагарав чи ГIадильгереев Рустамица.
ГIадильгереев Рустам: «Гьеб экспертизаялъул банаязда рекъон гулла речIчIун буго I-2 сантиметралъул рикIкIалъудасан, ай гьеб ккола аскIосан, цвизегIадинги гьабун речIчIараб гулла. Гьелъул хIасилалда цо чанго минуталда жанив хванин Эрадилилан абураб пикру буго экспертазул. Къуваталъул идарабазени къваригIун букIана гьеб лъачIого речIчIараб гулла бугин чIезабизе, хадур гьел лъугьана живго цIунулаго речIчIун бугин гьев подполковникас таманчайин абизе. Гьел гьадингоял гьерсал рукIин нижеда доб мехалдагоги лъалаан, гьанже гьеб экспертизаялъги тадсикъ гьаруна.
ЛъачIогоги гьедин гъванщилъги цвизабун гуро речIчIулеб, живго цIунулагоги гьеб гъванщилъ речIчIи гIантаб жо буго. Эрадиль гьесде нахъа-нахъасахунги вилълъунищ тIадекIанцIи гьабулев вукIарав? Гьедин батани нусги гьес живгоги цевехун валагьун, нахъехун квералги ритIун кьабулеб букIун буго. Гьединаб кьучI гьечIеб харбалги рицун, баяналги кьун чIун руго цIех-рехалъул идараби. Амма гьанже гьеб экспертизаялъ бихьизабулеб буго гьел мекъал рукIин, гьелъ чIезабун буго гьес таманча ургъунго речIчIун букIин».
Гьединго Рустамица бицана Эрадиль ХIасанов чIваялъул иш жидер гьариялда рекъон Дагъистаналъул цIех-рехчагIазухъа нахъеги босун Шималияб Кавказалъул федералияб округалъул прокуратураялъги, цIех-рехалъул идараялъги хал гьабулеб бугилан. Дагъистаналъул къуваталъул идарабазда божилъи гьечIила жидер, гьез щиб гьабунги гьев Жамалудиванов ритIухъ гьавизе, гьесие нухал ратизе хIаракат бахъулеб бугин лъазабун букIана чIварасул гIагарлъиялъ. Гьезул аслияб разигьечIолъи буго гьев подполковник Жамалудинов Сайпулакъади туснахъ гьавун гьечIолъиялдаса ва ХIасанов чIваялда хурхун жеги чи чIваялъул бутIаялда рекъон такъсиргьабияллъул иш рагьун гьечIолъиялдаса.
Республикаялда гьеб иш рагIалде бахъунареблъи ва гьеб лъугьа-бахъиналъе букIине кколеб къиматги кьолареблъи, гIайибиязе тамихIги гьабулареблъи бичIчIанила жидеда гьединлъидал гьеб иш нужерго берлабагьиялде гъоркье босейин абун кIицIул кагъат хъван букIанила жидеца Россиялъул генералияб прокуратураялдейилан бицана Рустам ГIадильгереевас.
Гьеб такъсир гьабураб полициялъуласе букIине кколеб тамихI гьабейин абун тIалаб гьабун Нугъай мухъалъул гIадамаз чанцIулго тIоритIун рукIана кIуди-кIудиял митингалги. Гьездаса хадуб гIадамал гIодоре риччаялъе жал гьаризе лъугьанила цIех-рехчагIийин абулеб буго чIварасул гIагарлъиялъ. Гьедин жал тIаса рихьиялъе ххвелал гьарун гурони букIине кколедухъ хIалтIи ва цIех-рех гьабизецин лъугьинчIила гьел. Гьедин чIварав ХIасановасул адвокатас чанцIулго гьев Жамалудинов туснахъ гьавейин тIалаб гьабун диваналде гIарз хъваниги, батIи-батIиял багьанабиги ратун цин диван тIобитIунцин гьечIо, хадубги гьев подполковник унтун азарханаялда вегизавун вугин абун багьанаги батун адвокатасул тIалаб нахъчIван буго.
Амма халкъалъул разигьечIолъи цIикIкIунеб букIин бихьараб мехалда гьеб гIодобциналъе цIех-рехчагIаз жидецаго бачIанила диваналде Жамалудинов туснахъ гьавейи абун тIалабилан абурал баянал кьун рукIана чIварасул адвокат Асланов Дилимханица. Амма гьел цIех-рехчагIаз Сайпулакъади Жамалудинов диваналде вачIинавичIила, гьезда гIезегIан лъикI лъалаанила гIайиб гIунтIизабулев вугев диваналде вачIинчIого гIарзалъул халгьаби тIобитIулареблъи. Гьеб лъаниги, гьевги вачIинавичIого жидецаго хIалтIи гьабулеб бугеб ххвел гьабизе лъугьанила цIех-рехчагIийин лъазабун букIана адвокатас. Гьеб лъугьа-бахъиналдаса хадуб гьеб киналдаго тIасан гIарзги хъван бугеб ахIвал-хIалалъуги бицине адвокат ва чIварасул гIагарал ун рукIун руго Россиялъул Генералияв прокурор хисулев Иван Сыдорукихъе, гьесул тIалабалда рекъон гьеб иш Дагъистаналъул къуваталъул идарабазухъа нахъеги босун гьезда тIад ругезухъе кьун буго.