ЧIварав АрслангIали Давудов кколев вукIун вуго Дербент шагьаралдаса, гьесул бизнес хурхараб букIун буго аслияб къагIидаялъ пихъил ва пастIабазул нигIматал раччиялда. ЦIех- рехалъул хъулухъалъ рикIкIунеб буго гьев чIваялъул иш хурхараб букIине бегьулин гьес жиндирго бизнес Азербайжаналъул республикаялде гIунтIун гьабулеб букIиналдаги.
Гьеб тIоцебесеб хIужа гуро Дагъистаналда бизнесчагIазда хурхун такъсир гьабиялъул. I4 сентябралда гьебго Дербенталда чIван вукIана бизнесчи Феруз Агаев. ТакъсирчагIаз гьесда тIадекIанцIи гьабун букIана Дербенталде рачIунаго нухда батулеб квана -гьекъезе лъалхъулеб бакIалде цо депутатасда цадахъ Агаев вачIиндал. Доб мехалъ депутатасе щибниги зарал ккечIо, цохIо Феруз Агаев чIвана.
Гьединго гьелда цебесеб къоялъ Избербашалдаги чIван вукIана бизнесчи. Радал сагIат 8 тIубалеб гIужалда жиндирго тукен рагьизе унаго гьесде тIадекIанцIи гьабун букIана щалали лъаларел чагIаз. ЧIварав бизнесчиясул цIар рехсолеб гьечIоан, гьесул букIун буго 50 сон.
Щай Дагъистаналда ахираб заманалда гIемерлъулел ругел бизнесчагIазде гьарулел гьужумал? Гьеб суал нижеца кьуна жидерго аслияб хIаракатчилъи дармида хурхарал цо-цо дагъистаниязе.
МахIачхъалаялдаса къватIибегIан бугеб цадахъго гIемер къайи бичулеб базаралда хIалтIулев бизнесчи Сайфула -къадица рикIкIунеб буго кIудияб даран базаралда ругел чагIаз жидеего щвараб хайиралдаса пуланаб къадаралда бахъизе кколеб закат -сахI кьолеб гьечIолъиялда бан гьарулел ругин гьезде гьединал тIадекIаницIиялилан. ЧIахIияб бизнесалъул бетIергьабазухъа пуланаб къадаралда гIарац тIалаб гьабун, хIинкъаби кьун, флешкаби ритIулел рукIиналъул хабар чанго соналъ буго Дагъистаналда. Ахираб заманалда гьезул бицен гьоркьоб къотIун букIанин абизе бегьула. Сайфула -къадияс рикIкIунеб буго гьединал флешкаби исламалъ фарзлъун гьабураб закат сахI бахъуларел чагIазухъе ритIулилан кколин жинда. КIиабилеб гIиллалъун гьес рехсолеб буго цо цо чагIаз исламалъ гъукъараб гIаракъи-чагъир, гьединго хъалиян ва цогидаб бичулеб букIин
26 сентябралдаги Хасавюрт мухъалъул Аксай росулъ жиндирго рокъой чIван ятана гIолохъанай бизнесчIужу. Гьелда лъун батана носол чанго ругъун. ЧIваралъул букIун буго жийго бетIергьанаб цIарагI бичулеб тукен.
ЦIех- рехалъулаб комитеталъ кьураб баяналда рекъон, хамиз сордоялъ Дербент мухъалде унеб шагьранухда чIварав чиясде гьабураб такъсир хурхараб буго гьесул бизнесалъулаб хIаракатчилъиялда. Кьвагьул алат лъун букIун буго 47 сон барав бизнесчиясул автомобилалда гъоркь. ЦIакъго гIемерал ругънал лъун рукIиналъ лъукъарав гьеб бакIалдаго хун вуго.