27 августалда ГΙабдурашидовасул гIагарлъиялъул къокъаялъ пикет гIуцIана МахIачхъалаялда ГIурус театралда гIагарда. Амма гьеб тадбиралда я низам цIунулез, я хIукуматчагIаз кинабгIаги кIвар кьеялдаса хьул буссарал ГIабдурашидовасул гIагарлъи къалъудехун Дагъистаналъул прокуратураялда цере ракIарана.
Викъарасул вац Хизри ГIабдурашидовас «Эркенлъи» радияолъе абуна Шамил маскаби гьурмада ххурал чагIаз вачун анилан.
Хизри ГIабдурашидов: «Вац жиндирго рокъове инехъин инсухъа вахъун вукIана. Дун гьудулзабигун инсул азбаралде щолеб мехалда, дида бихьана вацасул автомобилалъе гIарцулаб кьералъул «Лада Приора» автомобилалъ нух къан букIин. Гьеб автомобилалдаса къватIире вортун вачIана щуго-анлъго чи. Гьезул гьурмада маскаби ххун рукIана. Кодор гьезухъ автоматалги рукIана. РетIел гьезул камуфляж кьералъул букIана.
Шамил гьез вухун-кьабун жидерго автомобилалде къазавуна. Вацасул автомбилалдаги рекIана дозул кIигояв. Автомобилал лъугьа-бахъин ккараб бакIалдаса хъамун ана. Гьезда хадур дирго автомобилалда гьудулзабигун дунги вортана. Амма ниж хадур лъугьун рукIин гьезда бичIана ва нижее нух къазе хIалбихьана гьез. Гьездаса ниж тIурана. Вац викъиялда хурхун нижеца чанги бакIалде гIарза хъвана, амма киссаниги кинабгIаги жаваб щвечIо».
Викъарасул чIужу Марьям ГIабдурашидовалъ абуна рос вугеб бакI батизе кIолеб гьечIилан. Гьелъул рагIабазда, гьел щвана МахIачхъалаялда ругел жанисел ишазул идарабазде, заманалъ жанир тIамулел изоляторазде, амма киса кибего гьезда абун буго ГIабдурашидовасул хIакъалъулъ жидехъ кинаб-гIаги информация гьечIилан.
Марьямица гьединго абуна, Шамилгун ккарабщинаб рехсарал гIарзаби хъванин жидеца прокуратураялде, ЦIех-рехалъул комитеталде, ХiинкъигьечIолъиялъул федералияб хъулухъалде. Гьел гIарзабазда хурхун жаваб гIагараб заманалде щолин хьул гьечIо Марьямил. Гьелдалъун гьелъ абулеб буго жидецаго хIаракат бахъине бугин Шамил ватизе.
Дагъистаналъул прокуратураялда абуна ГIабдурашидовасда хурхун тIадчIун хIалтIизе ругин ва гIагараб заманалде жаваб кьезе бугин гьабураб хIалтIиги рехсон.
ГIабдурашидовасул гIагарлъиялъ гIарза гьединго хъвана «Дагъистаналъул улбул» абураб инсанасул ихтиярал цIунулеб гIуцIиялде. Гьеб гIуцIиялъул нухмалъулей Светлана ГIисаевалъ абуна гьеб гIарзаги хIисабалде босун, жидер гIуцIиялъги гIарзаби ритIанин чанги бакIазде – Россиялъул президентасул администрациялде, Россиялъул Прокуратураялде ва цогидал идарабазде.