МухIамадов МухIамадил такъсирияб къукъаялда гъорлъ вукIиналда щаклъи букIун ккурал гIадамазеги гIемераб гIазаб кьолеб бугин, гьел МухIамадовасде гIайиб гIунтIизабун кIалъазе тIамулел ругин бицана, гьезул гIагарлъиялъ 22 сентябралда МахIачхъалаялда тIобитIараб пресс-конференциялда.
Гьезул щивасул букIана къуваталъул идарабаздасаги, цIех-рехалдасаги разигьечIолъи. МухIамад МухIамадов ккуна 2013 соналъул 27 июналда. Гьесде гIунтIизабулеб буго гIарац бахъиялъул, хIилла-рекIкI гьабиялъул, такъсирияб къукъа гIуцIиялъул, гъал-магъир гьабиялъул гIайибал. Гьединго ккун руго хасал идарабаз МухIамадовасул къукъаялда гъорлъ рукIанин лъазабурал Дубки росдал депутатазул мажлисалъул нухмалъулев Абакаров Сиражудинги, полициялъул майор ХIажиев МухIамадги, гьезулго гьалмагъ ГъазиахIмадов Мурадги. Гьебго къукъаялде гъорлъе унел рукIиналда щаклъи бугев жеги щуго чиги цIех-рехалде лъазарун руго. Гьезда гьоркьов вуго МухIамадов МухIамадил вац Русланги гьезул вацгIал полициялъул хIалтIухъан Батыров Камильги.
Пресс-конференция байбихьулаго МухIамадов МухIамадил ва Русланил эмен АхIмадица бицана цIех-рехалъул идарабаз жидерго хIалтIи нахъегIанаб хIалалъ гьабулеб бугин. Жиндир васасда гIайиб чIезабиялъе гIоло гьез цойгидал гIадамазеги гIазаб кьолеб бугилан. МухIамадида цадахъ вукIарав чи вугинги абун ГъазиахIмадов Мурад гьесде данде хъвадаризе тIамулев вугин низамцIунулезин, гьес жиндир васасде гIайибал гIунтизарулел кагътазда гъулбас гьабизе инкар гьабидал Мурадие гIазаб кьолеб бугилан.
МухIамадов АхIмад: «ГъазиахIмадов Мурадие депутат МухIамадов МухIамадида гIайиб гIунтIизабун кIалъайин абун чанцIулго гIазаб кьун буго. Исана цIияб соналда хурхун январалъ рукIунел халатал гIодоркъоязул заманалда, хIалтIуда щивниги гьечIеб мехалда туснахъалъуса къватIивеги вачун чанцIулго гIазаб кьун буго гьесие. Гьеб тадсикъ гьабизе я тохтурзаби яги нугIзалги рукIун гьечIо гьенир. Гьелде тIадеги адвокатги виччан гьечIо гьесухъе. Гьесул иш бачунев вугев цIех-рехчиясги лъазабулеб буго жинда вихьизецин вихьичIин гьевилан. Туснахъалдаса вачун унелъул сурав босизе вачунев вугинги абун, лъикI гIазабги кьун, хадув гьев квеш лъугьанинги абун цIех-рехчиясда вихьизецин течIого цIидахъан жаниве вачунев вукIун вуго. Гьедин гьев вачунев вукIараблъи тадсикъ гьабулеб хъвай-хъвагIайги документалги руго».
Гьединго пресс-конференциялде рачIун рукIана полициялъул майор ХIажиев МухIамадил эбел-эменги. Гьевги МухIамадовасул такъсирияб къокъаялда цадахъ лъугьун гIарац бахъулев вукIанинги абун туснахъ гьавун вуго. ХIажиевги къуваталъул идарабаз МухIамадовасде гIайиб гIунтIизабизе тIамулев вукIанин, гьес инкар гьабидал гьесиеги кьечIеб гIазаб течIин бицана гIагарлъиялъ. ХIажиевасул адвокатас киназдаго рихьизаруна гIакъуба кьеялъ, ток биччаялъ хъахьиллъараб гьесул къаркъалаялъул суратал.
Гьединго ХIажиев МухIамадил лъадуца бицана гьев ккун хадуб жидер рокъоб чIухь балеб заманалда нугIзарги доре-гьанирехун ралагьизарун низамцIунулез жидецаго гулби рехханила гьенирейилан. Хадуб изнугьечIого ярагъ цIунун батанин рокъобин абураб гIайибги гIунтIизабунин жиндир росасдейилан. Гьесдаги чанцIулго низамцIунулез абун бугила дуца депутат МухIамадовасде гIайиб гIунтIизабураб кагътида гъоркь гъулбас гьабуни, мун эркен гьавизе вугилан. Гьес инкар гьабунщинахъе гIакъубаги кьолин гьесиейилан.
Гьединго МухIамадовазул эмен АхIмадица бицана цIех-рехалъе къваригIун рачунел ругин абун жиндир васазул автомобилалги рахъун анин низамцIунулез, хвараб мехалда жийго юкъизе нахъе лъураб херай жиндир якьадалъул гIарацгицин бахъун анин гьез жидер рокъосайилан.
МухIамадов АхIмад: «Лъидаялиго банкалъе кколеб гIарац тIадбуссинабейин абун бугинги абун гIайибги гIунтIизабун туснахъ гьавуна дир вас. Гьебги лъица лъида абурабалицин мухIкан гьабичIо къуваталъул идарабаз. Гьеб щибали лъалареб багьанаги батун туснахъ гьевги гьавун байбихьана нижер гIагарлъиялъул доба чIухь базе. ЧанцIулго нижер добаги бана гьеб. МухIамади лъабго автомобил ана бахъун, рокъов щивниги гьечIеб мехалда рачIун маскабиги тIадххун цо чагIаз гьесул рокъоб бугебщинаб къайи-цIа ана бахъун.
Гьеб автомобиль бахъараб мехалда кьезе кколеб хасаб акт букIуна, цониги гьебги кьечIо. Хадуб лъана дида нижер цо автомобиль гьез бичун буго Унсоколоса чиясе. Гьедин сундулъго бокьа-бокьараб гьабулел руго гьел къуваталъул идараби. ТIокIаб жойищ гьабилареб чIухь балеб мехалда рокъоб букIараб нижер херай якьадалъул жийго юкъизе тараб гIарацин бахъун ана гьез. Цин экспертиза гьабизегIан тун бугила хадуб щибали гьабизе кколинги абун лъагIел аниги жеги гьебги щвечIо нахъе».
Ахиралдаги дур пикруялда рекъон щайин гьеб дуца абухъе щибго гIайиб гьечIев дур вас МухIамад туснахъ гьавуравилан «Эркенлъи» радиоялъ цIехараб мехалда АхIмадица абуна гьелъие гIиллалъун кканила Хунзахъ мухъалул бюджеталдаса 60 миллион бикъун букIин гьесул бажариялдалъун тIатинаби. Гьеб мухъалъул букIараб нухмалъиялъе дандеккечIила гьеб, мухъалъул нухмалъиялде жиндир вас вачIиналдаса хIинкъун, гьез гIарацги кьун тIамунила къуваталъул идараби жиндир васазде дандейилан бицана МухIамадов ХIажица.