ЖамгIияб низам цIуниялъулъ жалго гIадамал гIахьаллъизе ккеялъул хIакъалъулъ бицана дагьалъ цебе Дагъистаналъул терроралда данде чIараб комиссиялъул данделъиялда. Амма гIемерисеб мехалъ гIадлу цIуниялъул мурадалда дагъистанияз байбихьулеб буго ярагъ босизе. Гьеб хIалтIизабиялъул хIужаги ккана араб анкьалъ Ленинкенталда. Ярагъги кодоб ккун жидерго росаби цIунулел къокъабиги руго республикаялда. Россия телеканалъ бихьизабун букIана Лаваша мухъалъул Хважалмахьи абураб росулъ ругел жамгIияб низам цIунулел къокъабазул хIакъалъул хасаб репортаж.
Гьезул киназухъего буго ярагъ. Гражданиял инициативаязул комитеталъ ихтиярал цIуниялъул системаялда реформа гьабиялъул хIакъалъулъ хIадурараб докладалда бицунеб буго Дагъистаналда щибаб рокъоб ярагъ босулеб бугин жалго цIуниялъул мурадалда. Гьелъ бицунеб буго гIадамал къуваталъул идарабаз жалго цIуниялда божулел гьечIо ва кодоб ярагъги ккун жидерго хасал къокъаби гIуцIизе хIадурун ругоян бицунеб буго докладалда.
«Регнум» агенствоялда Константин Казениница Ленинкенталда бугеб дандечIеялда тIаса хъвараб макъалаялда бицунеб буго жамгIиял низам цIунулезухъе ярагъ цIикIкIани гьелъ кIудиял тунка-гIусиязде рачине рес бугин. Гьединал къокъаби Ленинкенталда рукIин тасдикъ гьабулеб буго лъукъаразул цоясда «Сайга» абураб чанахъабазул тункIидаса кьвагьун букIиналъ. «ХIакъикъаталда гьениб ярагъ букIине кколаан гIицIго полициялъухъе, амма лъукъарав больницаялде ккун вуго гьез кьвагьун гурев, чанахъанасул туманкIгун вукIарав жамгIияб низам цIунулесул кумекалдалъун», - абун хъвалеб буго жиндирго блогалда адвокат Къадиев Расулица.
Щал кколел жамгIияб низам цIунулел ва бугищ гьезул ихтияр ярагъ хIалтIизабизе абураб суал кьуна нижеца юрист Къурбанов ГIазизие.
Къурбанов ГIазиз: «Низам цIунулел хасал къокъаби гIуцIулаго гьезул регистрация гьабизе ккола, гьезул ихтияралги масъалабиги мухIкан гьаризе ккола. Гьадин цо къоялъ нижеца низам цIунизе буго абун ракIаризе бегьуларо. Гьеб рахъалъ къануналда рекъон иш гьабиялдаги дун щакав вуго, щайгурелъул гьел къокъаби гIуцIулел руго ракIалде кковухъе. Ярагъ букIине кколищ гьезухъе абураб суалалъе жаваб кьезе лъугьани, гьаниб мухIканго абизе ккола кколарилан ва гьеб Россиялъул къанун хвезаби бугилан. Чан гьабиялъеян кьурал «Сайга» абурал туманкIал руго гIемерисезухъе. Гьеб ярагъ цоги батIияб бакIалда хIалтIизабизе бегьуларо. Шагьаралда ялъуни росабалъ гьеб ярагъги босун хьвадизе, гьеб хIалтIизабизе гьукъун буго, гьеб тасдикъ гьабила бокьарав юристас. Жибго ярагъ къануналде рекъон, киналниги кагъталги ракIарун, регистрацияги гьабун босараб батизе бегьула, амма гьеб рехсараб бакIалда хIалтIизаби гьукъун буго. Гьез абизе бегьула жалго жидецаго цIуниялъе гIоло хIалтIизабун бугин. Амма гьеб мехалъги гIайиб тIасан унаро, щайгурелъул гьелъие бихьизабураб хасаб ярагъ буго. Нахъойги абулеб буго, «Сайга» туманкIги кодоб ккун чан гьабизе гурони ине бегьуларо».
ЖамгIияб низам цIунулел чагIи ккола полициялъулал, киналгIаги батIиял чагIи гьенир гIахьаллъизе бегьулароян рикIкIунеб буго Гъизилюрталдаса адвокат МухIамад ГIумаровас. Гьесул пикруялде рекъон, гIадамаца гьеб хIалтIи гьабулеб батани, пачалихъалъ харжги кьун полиция хьихьиялъул магIна гьечIо. Рехсараб къагIидаялъ кодоб ярагъги ккун бакIарараб халкъалда абизе бегьула изну гьечIого яргъид гIуцIаралин. Гьединлъидал, къануналда рекъон гьеб ахIвал-хIалалъул хал гьабуни, рохьор ругел яргъид гIуцIаралги, росабалъ ялъуни шагьаралда тIад ярагъгун жамгIияб низам цIунулелги цого чагIи кколел ругоян бицана «Эркенлъи» радиоялъе адвокат ГIумаров МухIамадица.
ЖамгIияб низам цIунулел къокъаби гIуцIизе ккеялъул хIакъалъулъ тIоцебе бицана 2012 соналъул августалда шайих СагIид-Афанди чIван хадуб доб мехалда вукIарав Дагъистаналъул президент МухIамадсалам МухIамадовас. Гьединал къокъаби гIуцIун рукIана щибаб мухъалда. Цо-цо росабазда изну гьечIого яргъид гIуцIараздагун гьезда гьоркьор тунка-гIусиялцин ккана. Октябралъул байбихьуда гьединаб тунка-гIусиялъул хIасилалда Лаваша мухъалъул Хважалмахьи росулъ чIвана лъабго жамгIияб низам цIунулезул чи ва лъабго полициялъулав.