Эльдаров: ГIакълу бугев чияс банкалда гIарац лъоларо

Гьеб гIарац щвезе рес бугин кинавниги 120 азарго гIансев чиясулилан хъвалеб буго иформ. алатаз кьураб баяналда. Шималияб Кавказалда бугеб «Сбербанкалъул» бутIаялъул нухмалъулев Новиков Владимирил рагIабазда рекъон гIарац кьезе буго рехсараб банкалъул Дагъистаналда, гьединго Пятигорск шагьаралда бугебги бутIаялда.

Январалъул микьабилеб къоялъ «Экспресс» банкалъ официалияб куцалъ лъазабуна жидерго хIаракатчиялъиялъул болжал лъугIиялъул. Гьебго моцIалъул 21 абилеб къоялъ кьураб лъазабиялда абулеб букIана Росcиялъул аслияб банкалъ гьелухъа хадубккунги хIалтIизе изну кьолеб лицензия нахъе босиялъул хIакъалъулъ

Чанго къоялдаса «Эксперсс» банкалъул вакилзабаз лъазабуна 700 азарго гъурщиде щвезегIан гIарац счеталда букIарал чагIазул гьеб гIарац нахъбуссинабизе бугилан. Амма абизе ккола гьеб банкалда гIарац лъурал гIадамаз бицунелда рекъон чанго миллионалдасаги цIикIкIараб гIарац лъурал чагIиги гьенир рукIаралъи.

Араб соналъул декабрь моцIалде щвезегIан «Экспрессалда» гIадамаз лъураб гIарцул къадар букIун буго щугогун бащдаб миллиард гъуруш. Кинабниги гьеб банкалъул 33 офис букIана республикаялда. Гьединлъидал рецIалил гIарац кьезе Сбербанкалда божилъи гьаби баян гьабизе ккараб жо гурилан абулеб буго рехсараб баяналда, рецIалил гIарац кьезе буго Сберанкалъул республикаялда киса-кирего рагьун ругел отделниязда.м

Сбербанкалъул вакилзабаз кьураб баяналда абулеб буго рецIалил гIарац щвезе чиясул рес бугин гьесул гIумру гьабулеб бакI кибехун батаниги. Гьедин мисалалъе хIалтIулаб къваригIелалъ Дагъистаналъул бокьараб шагьаралда мун вугонигицин гьеб шагьаралда бугеб Сбербанкалъул бокьараб бутIаялдасан рес букIине буго гIарац щвезе.

Гьединго мисалалъе мугIрузул мухъазда гIумру гьабулел чагIазул гьел ругеб бакIалда «Экспрес» банкалъул филиалал рукIун ратичIониги Сбербанкалъ рагIи кьолеб буго гьеб мухъалда ругел жидерго офисалдаса рецIалил гIарац кьезе.

ТIадеги баянал щвезелъун МахIачхъалаялъул Сбербанкалъулгун бухьен гьабидал гьез инкар гьабуна гара-чIвариялъе, клиентазда гьоркьоб биха-хочи ккечIого букIиналъул мурадалда жидеца хIукму гьабунин рецIалил гIарацги кьун 1-б феваралалдаса хадуб гурони кинал ругониги баянал кьечIого тезе

Жакъа Дагъистаналда гIумру гьабулев чияс кинаб букIаниги банкалда жиндирго гIарацги лъун гьелде божилъи гьабун вукIине бегьулеб заман гьечIилан абуна «Эркенлъи» радияоялъе МахIачхъалаялдаса Эльдаров Эльдарица. «ЦIияб Коммерциялъулаб» банкалъул Дагъистаналда бугеб филиалалъул нухмалъулев ккола гьев:

Эльдаров Эльдар: «ХIукуматалъулгун бухьен бугел чIахIи –чахIиял банказ кида къадги махсароде кквечIого толаро банкалда гIарац лъурал чагIи, щайгурелъул гьенир гIемер руго мекъи квер бегьулел гIадамал. Гьез хIисаб гьабула кинангоги чияр буголъи ккола гьаб, щай дица бугеб ресалдаса пайдаги босун диего цо гьалъул бутIа тIезабизе бегьулареб абун. Гьелъул бетIергьан гьечIо, нилъеца гIарац лъураб хIукуматулъул банкалъ дур тIалаб гьабуларо. Гьединлъидал бищунго лъикIаб гIакълу буго дурго гIарац дуцаго цIуни, яги цо кинаб букIаниги бизнесалде гьоркьове жувай. Дур гьел дагьа-макъал кепкал банкалда лъунилан мун бечелъизе гьечIо. Мисалалъе къарзалъе гIарац босулеб бугонигицин жидеего бутIа тIезабичIого гьез дуе гьеб кьоларо, хIасил дуда ракIалда букIараб куцалъ хIалтIи рагIалде бахъинабизе дуе рес букIине гьечIо.

Дица абила банкалда гIарац лъелалде дудаго цо цIияб жо лъан букIине цIалуде тIадего кIвар кьунани лъикIилан ва гьитIинабго букIаниги цо бизнесалъул щиб букIаниги жоги рагьеян. Банказул кумекалдалъун Дагъистаналъул экономика цебетIезе гьечIо. Гьелъул букIинесеб бараб буго лъай бугев, бажари бугев чиясда. Банкалда гIарацги лъун мокърукье валагьун мун вукIаго къарзалъе цо кIудияб гIарац босулев чияс банкалъул нухмалъиги рекъезабула, гьоркьоб дур гIарацги уна».

Эльдарица хадубги тIаде жубана 170 -саги цIикIкIун соналъ хIалтIулеб бугеб, улкаялда гIумру гьабун ругезул цIикIкIарасеб бутIаялъ жидерго гIарац лъолеб бакI бугониги Сбербанкалъги цIунуларин халкъалъ жиндехун гьабулеб божилъи. Гьеб нилъеда бихьанин Советияб хIукуматалъул заманалдаса нахъего жидерго тIолабго буголъи банкалда цIунун рукIарал аза-азар чиясул кIудияб къадар гIарцул хIукумат биххун хадуб хIурудахъ араб мехалъ гьелъул рецIалил гIарац жакъа къоялъги халкъалъухъе тIадбуссинабун бажарулеб гьечIин гьелъухъа.