УЕФА-ялъул нухмалъиялъул хIукмуялда разилъичIого гIемераб ахIи- хIур бахъинабуна «Анжи»-ялъул фан клубалъги, гьединго футбол бокьулел дагъистаниязги. 7 июлалда МахIачхъалаялъул «Динамо» стадионалда тIобитIун букIана митинг. Жидерго разилъи гьечIолъи загьир гьабулаго УЕФА-аялъул нухмалъиялде хитIаб гьабун гьез абулеб букIана Дагъистаналда хIаял тIоритIизе щибниги хIинкъи гьечIеблъи бихьизе гьанибе жидерго коммиссия битIеян. Амма кинабниги комиссия гьез гьанибе битIичIо.
Рокъосел хIаялги Анжиялъ тIоритIизе ккана Москваялда гIагаралъухъ ругел стадионазда. Абизе ккола «Лига Европы» турниралда тIоритIарал киналго хIаязда Анжиялъ дандиязул командаялъе кинабгIаги рес кьечIо бергьине, гьелъул хIасилалда МахIачхъалаялъул командаялъул ресал тIадеги цIикIкIана «Европаялъул Лигаялда» тIоритIулел чIахIиял турнираздаги гIахьаллъизе.
Талат къоялъ къватIибе бачIараб лъазабиялда хъвалеб буго Футболалъул тарихалда ва статистикаялда тIасан халкъазда гьоркьосеб –(IFFHS) федерациялъул версиялда рекъон «Анжи дунялалдаго церетIурал клубазул сияхIалъул цересел кьеразулъе бачIанилан. «Лига Европы» турниралда босараб бергьенлъиялъул хIасилалда «Анжиялъе» щун буго 133 бал ва церетIурал клубазул сияхIалда 95-абилеб бакIалдаса гьеб бачIун буго 72-абилеб бакIалде. Гьеб сияхIалъул бищун цебесеб кьерда буго дунялалдаго машгьураб Испаниялъул клуб «Барселона».
Исанасеб сон «Анжиялъе» гьединго машгьураб букIана фанатазда гьоркьор ккарал рагъулал тунка- гIусияздалъунги. Ахирисеб гьединаб хIужа ккун букIана августалъул ахиралда. Цересел къоязда «Анжи»-ялъул фанатазде тIаде кIанцIи гьабуна Санкт -Петербургалъул «Зенит» командаялъул рахъкколез. Доб мехалъ батIи-батIияб ругъунги лъун азарханаялда вегизавун вукIана Дагъистаналдаса спортивияв журналист Керов ЯхIяги. Хадусел къоязда Москваялъул «Локомотив» командаялъул фанатаз МахIачхъалаялдаса фанатазде гьабун букIана гьужум. Фан клубалъул пресс- атташе ХIайбат Муслимовалъ бицаралда рекъон Москваялъул фанатазе рекIее гIун рагIуларо «Лига Европы» турниралда Анжиялъул рокъосел хIаял гьезул стадионалда тIоритIулел рукIин.
Гьелдасаги цебе Россиялъул чемпионталъул рахъалъ махIачхъалаялъул команда хIалеб букIана С- Петербургалъул «Зенит» командагун. ХIай лъугIун хадув Зениталъул фанклубалъул нухмалъулезул цояв Румянцев Александр азарханаялда вегизавун вукIана. «Анжи»-ялъул фанатаз кьабунин живан бицун буго гьес. Гьеб хIужаялда тIасан угловнияб иш гьабунин лъазабуна гьал къоязда МахIачхъаялаялъул Советский мухъалъул диваналъ. Амма «Эркенлъи» радиоялъе гьезухъа кинал ругониги комментариял щвечIо. МахIачахъалаялъул фан клубалъул нухмалъулев Рамазаницаги гьелда тIасан чIван къотIараб хIукму загьир гьабичIо нижер программаялъе.
Ахирисел хIаязда «Анжиялъ» рихьизарурал лъикIал хIасилал Дагъистаналъул футбол бокьулез хурхинарулел руго тIоцебесеб иргаялда командаялда дунялалдаго машгьурал футболистал хIалел рукIиналъги, гьединго Голландиялдаса машгьурав тренер Гус Хиддинкица нухмалъи гьабулеб букIиналъги. Амма легионеразул бицунаго кIвар кьечIого гIолареб хIужа ккола клубалъ гьел хьихьизелъун гIемераб гIарац харж гьабулеб букIинги. Мисалалъе Камеруналъул цIар рагIарав футболист Самюэль Это,О Анжиялъ восана 20 млн. евроги кьун.
Гьелда тIадеги Москваялда гьес жаниб гIумру гьабулеб рукъалъухъ клубалъ кьолеб рагIула 80 азарго евро. Машгьурав футболистасе чIезабураб рукъалда рагIула 1000 квадратияб метр, хIухьбахъиялъе хIажалъулел киналго шартIал: сауна, бассейн ункъо вегулел рукъзал ва кIудияб, плазмаялъулаб экраналъул телевизорги. Амма телевизоралда ракI рекъон рагIуларо «Анжи»-ялъул легионерасул. Гьеб цIакъго гьитIинаб бугилан багьана чIвалеб рагIула гьес. Гьединго гьесие рекIее гIун гьечIо гьесие хъулухъ гьабизе чIезарурал чагIиги. Бассейналъе хъулухъ гьабизе дагьалги гIадамал кквезе ругин жинцаян абун буго гьес франциялдаса журналистазда.
ЦIакъго хираго чIолев гьечIевишха Анжиялъе гьединав футболист? МахIачахъалаялдаса футболалъул аналитик Шамилица рикIкIунеб буго гьечIилан.
МухIамадов Шамил: « Россиялъул чемпионаталда исана лъикIал хIасилал рихьизаруни тIадеялъул «Лига Чемпионов» турниралдеги рорчIизе рес букIина гьезул. Гьанже учузаб багьаялдеги рачIуна гьанире хIазе чагIи, щайгурелъул киса кибего лъалелъул гьанже «Анжи» команда. Керимовас гIарац гIадада гIодобе баларо, командаялъе пайдаяб куцалда гурого. Гьелде тIадеги футболалъул «Академия» абураб школаги рагьулеб буго гьанже гIолеб гIел куцазе букIине.
Гьенив тренерлъунги вуго Голландиялда цIар рагIарав, лъикIав специалист вукIун гьез жидерого доваса кивениги виччалев вукIинчIев чи. ИншаАллагь, чанги лъикIал, гьунар бугел гIолохъанал футболистал рахъине руго республикаялда. Нилъер гIолилазе кидаго хасиятаб жолъун ккола къохIехьей, таваккалъи ва мурадалде щвеялъе бокьараб рес бати. Гьединал гIолилазин кирехунго рихьизарулел лъикIал хIасилалги».
Футболалъул рахъалъ россиялъул цIияб сезон «Анжиялъ» байбихьана лъикIал хIасилаздалъун. Дагьаб цебегIан Нижний Новгородалъул командаялда тIад ракIчIараб бергьенлъиги босун МахIачхъалаялъул клуб бахана турниралъул таблицаялъул тIоцебесеб бакIалде.