Россиялъ Крымалъул бащдабчIинкIиллъиялъул аннексия гьабиялда хурхун кIигогIан соналъ гьоркьор къотIизарун рукIарал НАТО-Россия форматалъул контактал цIилъизаруна Брюсселалда.
КIалъа-басаял байбихьилелда цебе альянсалъул генералияв секретарь Йенс Столтенбергица абуна, НАТО-Россия данделъеялъул аслияб масъала кколин Украиналда бугеб ахIвал-хIалалъул, дора тIамулел галабазул баянлъиялда ва цадахъал ишазда хурхарал суалал гьоркьор лъейин.
Россиялъул президентасул пресс-секретарь Дмитрий Песковас лъазабуна, НАТОялдаги Россиялдаги гьоркьоб божилъи букIараб хIалалде бачиналъе кIудияб хIаракат бахъизе ккезе бугин.