Бакуялда диванханаялда инсанасул ихтиярал цIунулей Лейла Юнусие туснахъалъул 11 сон ва гьелъул рос Ариф Юнусие 9 сон тIалаб гьабулеб буго прокурорас. Рос-лъадуда гIунтIизабулеб буго пачалихъалъе хилиплъиялъул, гьереси документал гьариялъул, магъало кьечIолъиялъул ва къануналде данде кколареб куцалда бизнес гьабиялъул гIайибал. Лейлае буго 59, Арифие-60 сон. Гьел кIиялго руго унтарал чагIи ва адвокатазул баяназда рекъон, гьезие туснахъалъуб кколеб дару гьабулеб гьечIо.
Гьездаго цадахъго Бакуялъул туснахъалъур руго анцI-анцI активистал, журналистал ва хIукумат какулел. Инсанасул ихтиярал цIунулез рикIкIунеб буго президент ИльхIам ГIалиевас тIобитIулеб бугин жиндие дандекколарел чагIазул кIалал къазариялъул кампанияйин.
Лейла Юнусица Бакуялда гIуцIун букIана ракълил ва демократиялъул Институт. Гьелъ кидаго какулеб букIана Азербажаналда инсанасул ихтиярал хвезари. Ариф Юнус вуго тарихчи. Гьес цIех-рех гьабула Кавказалда ккарал ва кколел киналго конфликтазул.