Москваялъ Европаялъул улкаби ва Америка ахIулел руго «Исламияб пачалихъ» абулеб террористияб къукъаялде данде цадахъ рекъон къеркьезе.
Талат къоялда Россиялъул президентасул пресс-хъулухъчи Дмитрий Песковас лъазабухъе, Сириялъул нухмалъиялъе дандечIей гьабизе Америкаялъ хIаракат бахъулеб бугеб гIанасеб заманаялда ахIвал-хIал квешлъун гурони лъикIлъизе гьечIо.
Гьелдаса цебе Россиялъул къватIисел ишазул министр Сергей Лавровас Катаралда Америкаялъул Пачалихъияв секретарь Джон Керригун ва СагIудиязул ГIарабиялъул къватIисел ишазул министр ГIабдул Джубейргун букIараб данделъиялда бицун букIана президент Владимир Путинил инициативаялъул. Гьесда ракIалда рагIула террористалгун къеркьезе гIатIидаб коалиция гIуцIизе-гьелде гъорлъе росизе ракIалда букIун буго Сириялъул ва ГIиракъалъул армияги, курдазул рагъулал къукъабиги.
Сириялъул президент Башар Асадиде дандечIей гьабулеб гIодобе биччараб оппозициялъул рахъ жидеца кквезе бугин Керрица абун хадуб Лавровас жаваб кьун букIана гьелъул лъикIаб хIасил букIунарин.