Дагъистаналъул ЦIех-рехалъул идараялъ рагьун буго Тарумовка мухъалъул бетIер Марина Абрамкинада ва гьеб мухъалъул азарханаялъул бетIерав тохтурасда ва ракьул суалал тIуралеб идараялъул кIиго хIалтIухъанасда тIад такъсир гьабиялъул ишал. Гьедин лъазабулеб буго рехсараб идараялъул сайталда. ЦIех-рехчагIазул щаклъи буго гьез хъулухъалдаса цIикIкIун пайдаги босун, хIилла-рекIкIги гьабун пачалихъалъул ракь учузаб багьаялда бичун букIиналда. Гьеб ккола ахирал къоязда Дагъистаналда чIахIиял хъулухъчагIазда тIад рагьулел ругел такъсир гьабиялъул ишазул иргадулал.