Исана Дагъистаналда кIалбиччанкъо цо букIине бугин, цересел саназ гIадин аскIоб бугеб кIиго росулъги батIи-батIиял къояз гьабизе гьечIин гьеб. Гьеб мурадалда гIуцIун бугин хассаб комиссия, моцI цIилъулеб куц ва гьижрияб къагIидаялда моцIал байбихьиялда хадуб хал кколеб.
Гьединаб лъазаби баккана Рамазан моцI байбихьигун «ИсламДаг» абураб сайталда. 14 июлалда гьеб комиссиялъ гьабураб хIукму лъазабуна Дагъистаналъул муфтияталъ, гьеб лъазабиялда рекъон, официалияб хIалалда Дагъистаналда кIал биччалеб къо кколеб буго 18 июль.
Гьеб лъазаби халкъалда гьоркьоб тIибитIизабуна бакIалъул информ-алатаз ва социалиял гьиназул кумекалдалъун.
Амма 16 июлалъул бакъаниде, гьелго соцалиял гьиназда тIиритIана лъазариял, ГIарабиялда моцI цIилъун бугилан ва гьениб кIал биччалеб бугин 17 июлалъ, гьебго хIал букIана Россиялъул цогидал регионаздаги, масала, Москваялда «Рамазаналъул чадир» къалеб бугин 16 къоялъ ва 17 июлалъ кIал биччалеб бугин хъвалеб букIана журналист Мария Маловалъ.
ГIадатиял гIадамазда гъорлъ гIемер тIадкIалъаял раккана Дагъистаналда кIалбиччанкъо исламиял улкабаздаса ва цогидал регионаздаса батIа-тIун тIобитIулеб букIиналъ:
Жидер росулъ имамас лъазабунин 17 къоялъги кIал кколеб букIин, гьес абуралда хадур рилълъун, кIалалги ккунин абулеб буго ГьоцIалъ росулъа Сулейманов МухIамадица.
КIал биччалеб къо Дагъистаналда 18 букIин лъазабун букIаниги, жинца 17 къоялъ кIал кквечIин, жиндир ХIежалда, ГIумраялда вугев васас вотсапалдаса хъван бачIанин гьениб моцI бихьун букIиналъул ва кIал биччалеб къо 17 июль букIинин абулеб буго МахIачхъалаялдаса Фаризаца.
Социалиял гьиназда гIемерисел щибго бичIчIуларого хутIун рукIана, Россиялъул рухIияб идараялъ байраб 17 июлалъ гьабулеб букIаго, Дагъистаналда 18 къо байрамлъун лъазабун букIиналда бан гIемер бахIсал тIоритIана.
Щай Дагъистаналда кIал биччалеб къолъун 18 июль лъазабурабали мухIканлъи цIехон, «Эркенлъи» радиоялъ бухьен гьабуна Дагъистаналъул муфтий хисулев Кахаев АхIмадгун.
Гьесул баяназда рекъон, комиссиялъ киналгIаги мухъазул имамал ракIарун тIобитIараб мажлисалда хIукму гьабун буго, киналго исламалъул тIахьазда рехсарал хIужаби хIисабалде росун, моцI бихьигун, кIал биччаялъул лъазабизе. Дагъистаналда, гIалимзабаз хIисабазул хIасилалда гьабураб хIукмуялда рекъон, моцI бихьулеб буго 17 къояъ.
АхIмад Кахаев: «Цересел саназ, батIа-батIаго гьабулеб кIалбичанкъо букIун, исана гьеб цо къоялъ, гIаммаб куцалъ республикаялго байрам гьабизе хIукму гьабун букIана гьеб цо къо чIезабизе комиссия гIуцIизе. Гьенир ракIарарал гIалимзабаз, комиссиялъул бетIер, МухIамад ГIабдурахIмановасул нухмалъиялда гъоркь, гIемерал халгьабиял тIоритIана. ШаргIалда рекъон, киналгIаги хIужби хIисабалде росун рачIана гьеб хIукмуялдеги.
Аслияб мурад букIана жамагIат цолъизаби. Дагъистаналда нолъ моцI бихьизе кинго рес букIинчIо. ГIарабиязул улкабазда гьеб бихьун батизе рус буго, амма нилъер гьаниб гьечIо. Нилъер гьаниб кколеб хIалалъ 30 кIалги ккун гIидалъул къо букIине буго 18 июлалъ».
ЦIересел саназ гIемерисеб мехалъ Дагъистан гIарабиязул улкабазда нахъбилълъун, гьениб моцI бихьидал кIал биччалеб букIанин, исана хIакъикаталдаги, гьеб такрарлъичIин, Дагъистаналда киналго гIалимзабаз дандбан, нилъер гьаниб моцI бихьиялда рекъон, биччалеб бугин кIалилан хъвалеб буго «Чернови» газеталъул рухIияб колонка бачунев журналист ГIабдулмумин ХIажиевасги.
КIалбиччалеб къо субботаялъ кколеб букIиналда бан, Дагъистаналда 20 июль хIалтIулареб къолъун лъазабун буго.