Одесса областалъул губернатор Михаил Саакашвилица лъазабуна, жиндир цIияб командаялъе харжалъул гIарац Америкаялъул хIукуматалъ биччазе бугин.
Политикасул рагIабазда, гьелда хурхун къотIи-къай гьабун буго Украиналда Цолъарал Штатазул вакил Джеффри Пайетилгун.
Саакашвилица «Фейсбукалдасахун» лъазабуна гьединго, Одессаялъул полиция Америкаялъул полициялъулаз куцазе бугин.
Маялъул ахиралда Маихаил Саакашвилие кьуна Украиналъул гражданлъи ва гьев тIамуна Одессаялъул губернаторасул хъулухъалде.
Гуржиялъ Саакашвилида хурхун рагьун буго чанго такъсирияб иш ва гьев валагьиялде лъазавун вуго. Политикас абулеб буго, жинде гIунтIизарулел гIайибазда гъоркь политикияб кьучI бугин.