Гьал къоязда Хасавюрталъул заманалъ гIадамал жанир тIамулеб туснахъалда вугев 8-9 чи вухун вугин щалали лъаларел чагIазилан лъазабулеб буго адвокат МухIамадова Сапиятица. Гьелъул рагIабазда рекъон гьел рухаразе букIине кколеб медицинаялъул кумекги гьабулеб гьечIо, гIага-божараздаги адвокатаздаги рихьизеги толел гьечIо туснахъулъул нухмалъиялъ.
Гьенив туснахъалда вухаразул цояв Антаев Шамилил эмен Ханпашаца «Эркенлъи» радиоялъе бицана цебе-цебеги рухулаанила гьенир туснахъалъур гIадамал, амма цониги нухалъ гьеб иш гьабуразе тамихI гьабичIилан. Гьесухъги жеги бухьен гьабун бажарун гьечIо жиндирго васгун.
Ханпаша Антаев: «Гьурмазда маскабиги ххун лъиданиги щибниги абичIого, щибго бичIчIизабичIого жаниреги кIанцIун туснахъ гьарурал кьабизе лъугьун руго гьел чагIи. Вухиялъ хъахIил гьабураб дир васасул суратал ритIун рачIана дихъе туснахъалда вугев дир лъалев чияс. Гьесго бицана гьев вухун вукIиналъулги. Васасулгун гьаб сагIат кинабгIаги бухьен гьечIо. Я телефоналъ ахIизе щолеб гьечIо гьесухъе я вихьизе толев гьечIо низам цIунулез. Бащадаб лъагIел балеб буго дир вас гьенив туснахъ гьавун. ХIал-гьабиялда щаклъи бугезул къокъаялда гъорлъ вукIанин абун жанив тIамун вуго гьев. Гьабизецин гьабичIеб гьеб такъсир тIаде босизабулеб буго гьесда полициялъулаз. Цебеги гьеб такъсир гьабиялъе мукIурлъейин абун тIадецуйги гьабулеб букIана гьесде, кьабунги вукIана. Живго жинцаго чIваялде ккезавун вукIана гьез гьев. Гьениб лъугьунеб-толелда тIасан гIарзалъ ине, гьел чагIазе тамихI гьабейин тIалаб гьабизе туснахъалъул нухмалъулевги кодове щолев гьечIо. Гьаб нухалдаги тIурахъдилев вуго гьев. Цин хIалтIуда гьечIила гьев цин регIун гьечIилаги абула абула туснахъалъул хIалтIухъабазги».
Адвокат МухIамадова Сапиятица Хасавюрталъул туснахъалда гIадамал рухун ругин, гьелда хурхун халгьабизе айин абун ахIун буго гьеб туснахъалда хадуб халкколев прокурорасухъеги. Къануналда рекъон, телефоналъ ахIун гьединаб такъсир гьабун букIиналъул бицани гьеб параялъго гьелъул цIех-рех гьабизе ине кколев вуго прокурор. Амма МухIамадовалда гьес лъазабун буго букIине кколедухъ хъван гIарзагун ячIайин жиндихъе гьеб мехалда цо жо ккелилан. Ургъунго халаб бахъинабулеб бугила гьеб иш прокурорас, гьел рухаразул къаркъалаялдаса гIужал инегIанин абулеб буго гьелъ. Гьедин прокурорас къанун хвезабулеб бугин, букIине кколедухъ жиндирго хIалтIи гьабулеб гьечIин гьесилан абун гьесда тIасан гIарзаги хъван буго Сапиятица.
Гьел туснахъ гьарурал чагIи рухиялъе гIилла щибин цIехезе, гьеб ишалъе баян кьейин тIалаб гьабун «Эркенлъи» радиоялъ ахIана Хасавюрталъул заманалъ гIадамал жанир тIамулеб туснахъалъул дежурныясухъе. Амма дежурный Атековас лъазабуна жиндица лъиениги кинал рукIаниги баянал кьоларила, гьелъие баян кьезе туснахъалъул нухмалъулевги хIалтIуда гьечIилан.
Гьединго адвокаталъ бицана цере-цере гьедин цадахъ гIемерав чи Хасавюрталъул туснахъалда вухиялъул хIужаби рукIинчIила. Жанир тIамуразде тIадецуй киса-кибего гIадин гьенибги гьабулилан. Амма киданиги гьеб жидеца гьабураб къанун хвезабиялъеги гIадан инжит гьавиялъеги гьел мукIурлъуларилан бицана гьлеъ. Гьединго адвокаталъ абуна гьездасан гIарзал хъван гьезие тамихI тIалаб гьабизе лъугьинги гьебги гIададисеб гIадаб жо бугила, щай гурелъул прокуратураялъги диваналъги гьезда гIайиб букIин чIезабуларила, гьел цо системаялъул чагIи ругилан.
Адвокаталъул рагIабазда рекъон бищун гIемер туснахъ гьаруразе гIазаб кьолеб бакI рагIула МахIачхъалаялъул заманалъ гIадамал жанир тIамулеб туснахъ. Гьениб жанибги цIакъго туснахъ гьаруразе гIакъуба кьолел бутIабиги ругин бицана гьелъ.
Сапият МухIамадова: «Гьеб туснахъалда буго хасаб бутIа, гьенир рукIуна киналниги экстремизмалда хурхен букIиналда щаклъи бугел чагIи. Гьединлъидал ФСБялъул кверщаликь букIуна гьеб. Гьениб бокьараб жо гьабула жанир тIамуразда, гьезие кьолареб гIазабги букIунаро, гьениб лъугьунеб-толелъул хIакъалъулъ къватIире баяналги къанагIат гурони рачIунаро. Чанги рукIана гьеб бутIаялда ругел гIолохъаби араб бакI лъачIого тIагIарал хIужабиги. ЦохIо нухалда кIун букIана дида гьенив жанив тIамун вукIарав вас вухун вукIиналъе гьел мукIур гьаризе. МукIурлъичIого бажарулеб хIалги букIинчIо гьениб, гьесда тIад чIагояб бакI хутIун букIинчIо. ГьабичIеб такъсир тIаде босизабулеб букIана гьесда. Гьев вухиялъе мукIурлъаниги щиб гьел гIайиб гьезда тIад чIезабун бажаруларелъул. Дица прокуратураялдеги диваналдеги гIарзалги хъван ахIи бахъинабизе лъугьараб мехалда. Гьез гьеб иш буссинабуна дов дица цIунун вукIарав васас туснахъалъул низам хвезабунила, гьелъ гIадлу гьабун гьев гIодове виччазавизе кьабизе кканин гьесдайилан абун».
Жиндица гьеб туснахъалъул нухмалъиялдаса гIемер гIарзал хъваялъ гьез хIалтIизе квалквалал гьарулилан жиндиейилан бицана гьединго Сапиятица. Чанги нухалъ тIубарал къоязги жиндица цIунун ругел чагIазухъе йиччаларила гьез жий. БатIи-батIиял багьанаби ратулила гьел туснахъалъул хIалтIухъабаз. Жиндица гьел хIакъир гьарулин, гIадлу хвезабулин абун гIарзал хъван, хIалтIулъ квекIенал гьарулила гьезилан бицана адвокаталъ.