1 апрелалъ МахIачхъалаялъул къватIаздасан унаго Дагъистаналъул нухмалъулев Рамазан ГIабдулатIиповасул кортежалда гъорлъ вукIарав полициялъулас чанго аскIосан дагьал хIинцго унел рукIарал автомобилазда кодоб букIараб хасаб тIил кьабун, гьезие жагъалъи ккезабулеб видео тIибитIун букIана интернеталда. «Синие ведерки» абураб жамгIияб гIуцIиялъул вакилас гьеб видео, кортежалдасан гIарз гьабун битIун буго Дагъистаналъул нухлул инспекциялде.
«Синие ведерки» кколеб буго хIакимчагIаз бокьа-бокьараб гьабиялда ва нухда къанунал хвезариялда данде бугеб жамгIияб гIуцIи. Гьез тIалаб гьабулеб буго хасал хъахIилал паркъераби гIицIго экстрениял хъулухъазул автомобидазда гурого лъезе тунгутIи.
Дагъистаналъул автоинспекциялде гIарз гьабурав гьеб гIуцIиялъул вакил Георгий Кокориница баян гьабулеб буго гьенисан бачIараб жавабалдалдаса рази ругин. Гьелдаго цадахъ Санкт-Петербург шагьаралъул Жанисел ишазул нухмалъиялдеги битIун букIанила гьебго тайпаялъул гIарза, амма гьез къанун хвезабиялъул хIужа батичIин жаваб бачIани лъазабулеб буго гIуцIиялъ.
Дагъистаналъул Нухлул инспекциялъул тIалъиялъ бачIараб жавабалда лъазабулеб буго гIайибиял къануазда рекъон тамихIалде цIанилан. Амма гьеб тамихI лъие гьабурабали кинабгIаги мухIканлъи щвечIо Дагъистаналъул Нухлул инспекциялдаса.
ГIайибиял тамихIалде цIанин абураб жоялъ кинабгIаги мухIканлъи кьоларин, гьенир пуланал гIадамал рихьизарун гьечIин абулеб буго жамгIияв хIаракатчи МухIамад Шамиловас. «Эркенлъи» радиоялъе гьес баян гьабухъе, зарал гьабурал хIалтIухъабазе тамихI гьабунгутIиялъ гIадамал гIарзалъ унел гьечIо, амма гьединал хIужаби чанги рукIунила.
МухIамад Шамилов: « МатIаби гъураралги цIурдул гъураралги гIадамал гIемер рукIуна, амма гьел гъурарал кортежазул чагIазе тамихI гьабунгутIиялъ, гьел гIарзалъ унаро. ЦогIаги чиясе хIакъикъаталдаги тамихI гьабун букIарабани, гьев чиясул цIар хъван букIине кколаан. Гьав пуланав чиясе гьаб пуланаб тамихI гьабунилан абун. Гьадинго, тамихIалде цIанин абун хъварал рагIаби ккола щибго кьучI гьечIел, мухIканлъи кьун гьечIонани. Гьеб цо бугеб лъугьа-бахъин гуро гури. Щибав хIакимчиясул рукIуна кортежал, гьединал кортежазда цо-цо матIаби гъуризе бокьулелги камуларо».
Цо нухда чIун хутIарал гIечIого, нухдаса унел кортежалъул машинаялдаса къватIиреги раккун, дагьабниги аскIорегIан ругел автомобилазул матIаби гъурулин лъазабулеб буго автомобилистаз.
Гьедин гъуранин жиндирги матIабийилан абулеб буго МахIачхъалаялдаса МухIамадов Къасумица. Жинда цадахъ, ГАИялъул пост бугеб бакIалде ункъо чи щванила, кортежалъул гIахьалчияс матIаби гъурарал, амма цонигиязецин щибго кумак гьабичIила гьениб.
МухIамадов Къасум: «Нухда инаго, нахъасан баккун бачIуна кортеж сигналалги гьарулаго, кIвараб куцалъ нух кьун рагIалде къаниги кьабун дубинкабигун рекула матIаби. Дирги гьединго ккана. Посталде полициялъулазде гIарз бахъун ункъоял рукIана, амма щиб гъоз гьабилеб? Гьел посталда ругезги релъун тIаса рихьизаруна гIадамал, президентасул кортежлъидал гьебилан абун».
Цо гIайибиял кортежалъул гIахьалчагIи тамихIалде цIай гуребги, гьел кортежал лъил ратаниги, хIакимчиясе гьабизе кколин тамихI, гурого, гьединал гIарзазул хIасил кколарин рикIкIунеб буго автомобилистас.