Амировасул адвокат Владимир Постанюкица ЭР-ялъе бицана 2 июналда байбихьараб диваналъул данделъиялда ТIагьиров Шамсудин абурав туснахъ гьавурас лъазабунила Амировасда нахъасан гьереси-баянал кьейилан тIадецуй гьабулеб бугин жинде туснахъалда.
Постанюкица тIаде жубана жидер хьул бугин, гьединго гьанжелъагIанги кколеб букIанин диваналъ гьелде кIвар кьелилан. Амма кьолеб гьечIин. Гьединго гьеб тIадецуй загьирлъулеб бугин диваналъул данделъи гьабулеб заманалдаги, ай хIухьбахъизе заман кьураб бакIалдагицин.
Кинаб къагIидаялда гьев ТIагьиров Шамсудиниде тIадецуй гьабулеб бугебин гьикъидал, Владимир Постанюкица гьадин жаваб кьуна.
Владимир Постанюк: «Гьев тIамун вуго карцералъув. Цинги гьесда абулеб буго дуца дурго пикру хисизабизе кколин. Дуе ккурав адвокатасдаса инкарги гьабизе кколин. Низам цIунулезул оперативиял хIалтIухъабаз гьесдаса тIалаб гьабулеб буго Амировасдаги Жапаровасдаги тIасан гьереси-баянал кьезе».
Ростовалда гьеб диваналда гIахьаллъун вуго СагIид Амиров МахIачхъалаялъул мэрлъун вукIиндал, гьесда цадахъ хIалтIарав МуртазагIали МухIамадовги. Гьес бицана ЭР-ялъе жидеца инкар гьабулеб бугин гьабсагIат Амировасеги гьесда цадахъ ругезеги диван гьабулел чагIаздаса.
МуртазагIали МухIамадов: «Протоколалда хъваралдаги диваналда бицунеб жоялдаги гьоркьоб кутакалда кIудияб батIалъи букIиналъ, лъабцIул хъвана нижеца диванчагIаздаса инкар гьабулеб бугин абураб гIарза. Амма лъабабго нухалда инкар гьабуна нижее. МухIамадов МухIамад МухIамадович абун балъгояв нугIги вукIана диваналда кIалъалев. Бицине жо лъаларого бабадулев вукIана гьев.
МуртазагIали МухIамадовас ЭР-ялъе бицана СагIид Амировги, гьесул вацасул вас Юсуп Жапаровги, гьесда цадахъ ругел чангоялги цIунулел ругин 13 адвокатас.
Амировгун Жапаровасда цадахъ диван гьабулеб буго МухIамад Къадиевасеги, Мурад ГIалиевасеги, Зубаир Мутаевасеги, МухIамад АхIмадовасеги. Гьезде гIайиб гIунтIизабулеб буго Дагъистаналъул ЦIех-рехалъул комитеталъул хIалтIухъан Арсен ХIажибегов чIваялда хурхун. Диваналъул цебесеб данделъиялда гьесул вац Руслан ХIажибегов кIалъана видеоконференциялдасан. Жиндир вац Амировас чIваялда щаклъи гьечIин лъазабун букIана гьес.
ЦIех-рехчаг1аздаги гурездаги лъалеб бугин Амировги гьесда цадахъ ругелги гIайибиял рукIин, амма гьезухъ гьечIин гIурал далилал – чIванкъотIарал нугIзал, такъсир гьабизе тIадкъай кьурав чи киллергун кIалъаялъул, яги гьел цоцаде телефоналдасан ахIаралги цогидалги хIужабиян бицана ЭР-ялъе низам цIунулел идарабазул хIалтIухъан Артур АхIмадовас.
Артур АхIмадов: «Якъинаб жо буго Амировас гьебги цогидалги такъсирал гьарураблъи. Гьес тIадкъаял кьолаан жиндирго тухумалда жанир ругел чагIазе. Гьениса къватIибе хабарги къанагIатги унароан. Гьединлъидал цIех-рехчагIи хапдолел руго кквезе щвараб, кигIан гьитIинаб букIаниги, хIужаялда хадур. Гьелъие гIоло гьез хIалтIизабизе кколеб буго бокьараб къагIидаги. Цоял хIинкъизарун, цогидазе – туснахъалъуса хекко къватIир риччалин рагIи кьун, лъабабилезулгун цогиги къотIи гьабун. Масала, гъов «Колхозник». Аслияв нугI – ГIабдулхIалимов МухIамад. Гьев вуго гьанже тIуван цIех-рехчагIазда варав чи. РакIги кинха гьесда гурхIилеб, цо заманалда бащдаб Дагъистан наркотиказдалъун хьезабулеб бугин гьесилан абурал баянал руго низам цIунулезухъ. Гьединлъидал гьевги Амировги гIайибиял гьечIилан ахIи базе лъугьин гьеб жо кколаха букIунеб чIанда хабар, чIанда-хабар.
Гьаб ккола Амировасегун Жапаровасе гьабулеб кIиабилеб диван. Пенсиязул Фондалъул нухмалъулев Сагид МуртазагIалиев чIвазе хIадур вукIанин абураб гIайибги тIадчIезабун, туснахъалъул 10 сон кьуна гьесие. Гьесул вацасул вас Юсуп Жапаровасеги кьуна 8 сонгун 3 моцI.