Украиналъул гIорхъабазда гIагарда Россиялъул рагъулаб техникаялъ щиб гьабулеб бугебали баян кьеян чIарал журналистазе Владимир Путинил пресс-секретарь Дмитрий Песковас абуна гьеб суалгун улка цIуниялъул министерлъиялде ай миноборонаялде аян. МухIканаб жаваб кьезе Песковасда кIвечIо.
Россиялъул рагъулаб техникаялъул колонна Украиналъул гIорхъабазде унеб бугин лъазабуна гьал къоязда Reuters информагентствоялъ. Колоннаялъул сураталги лъуна гьез интернеталда. Россиялъул Миноборонаялдаса гьел лъазариязда тIаса баянал кьечIо.
Прессаялъ чанги нухалда лъазабун букIанаан Россиялъул рагъулаз Украиналъул сепаратистазе кумек гьабулеб бугилан, амма улкаялъул президент Путиница гьел информациязда бугьтаналин абулаан, гьереси бугилан чIолаан.
ТIаде жубала, ракълилаб заманалда хварал солдатазда тIаса миноборонаялъул информация балъгояблъун букIине кколин хIукму къотIана Россиялъул президентас. Хасаб буюрухъ гьес гъулбасана 28 маялда. Цебе гьединаб информация балъгояблъун рикIкIунаан гIицIго рагъулаб заманалда.
ЦIияб къанун хвезабурал анкьго соналъ туснахъалде лъезе бегьулаан.