Непалалда гьалкъоязда букIараб кутакаб ракь багъариялъул хIасилалда хварал гIадамазул къадар 6 200 чиясде бахана, ян лъазабуна гьеб улкаялъул жанисел ишазул министерлъиялъ.
Финансабазул министр Шаран Махатица лъазабуна риххарал рукъзал ва жамгIиял минаби цIигIуцIизе гIоло бищун дагь босун кIиго миллиард доллар хIажатаб бугин. Халкъаздагьоркьосеб жамагIаталдехун вуссун гьес гьединаб гьари гьабун буго.
Цолъарал Миллатазул ГIуцIиялъул баяналда рекъон 25 апрелялда букIараб ракь багъариялъул хIасилалда зарал кканин микьго миллион чиясе, кIиго миллион чиясе хIажатаб бугин квен-тIехьги, лъимги, даруги.