Россиялъул президент Владимир Путин разилъанин Украиналъул машрикъалъул рахъалда рекъел цIунулел аскариял ритIизе, ян абураб Украиналъул тIадтаразул баян Кремлалъ нахъ чIвана.
Хасго доба сепаратистаз Украиналъул аскариязде данде рагъ бачунеб буго.
Гьадин лъазабуна Россиялъул президентасул пресс-секретарь Дмитрий Песковас. Украиналъул тIадтараз рехсараб лъазаби загьирабуна 30 апрелялда Владимир Путингун Германиялъул канцлер Ангела Меркелил, Франциялъул президент Франсуа Оландгун ва Украиналъул президент Петр Порошенкогун букIараб телефонияб гара-чIвариялдаса хадуб.
Цого мехалъ Песковас абуна, Россиялъ киданиги нахъ чIвалеб букIинчIо рекъел цIунулел аскарязул хIажалъи, аммаила, гьелда я Россиялъул, я цогидаб улкаялъул ихтияр гьечIин, тIоцебесеб иргаялда гьадинаб хIукму гьабизе кколин рагъдолел рахъаз, ай – Киевалъги Донбассалъги.