Гьел тохтурзаби тамихIалде цIай тIалаб гьабун, Прокуратураялде ва сахлъи цIуниялъул Министерлъиялде гIарза кьунин жидецайин лъазабулеб буго гIолилалъул эбелалъ.
17 апрелалъ, бакъанида, къагIида гьечIого лъугьун, лъимер гьабизе йигей МухIамадова Узлипат хехаб кумекалъул машинаялда Хасавюрталъул централияб азарханаялда цебе бугеб лъимал гьарулеб рокъое ун йиго, амма гьений тохтурзабаз къабул гьайичIого, нахъияб къоялде квеш лъугьун, лъимрги хун, эбелги тIончIорукъги нахъе босун, захIматаб хIалалъ йигила. Жакъа 4 къо бугила жидер, азарханаялъул кIалтIа чIун, хвелгун къеркьолей йигей ясалъул ургъалидайин абулеб буго МухIамадова Узлипатил эбел Айгьанатица.
МухIамадова Айгьанат: « Хамиз къоялъ бакъанида квеш лъугьун, дир яс росас хехаб кумекалъул машинаялда азарханаялде ячун йиго, амма гьенир ругел тохтурхабаз гьей нахъчIван йиго, гьей лагIулей йигин чехь унтиялъилан. АскIоб бугеб цIияб перинаталияб централда гьел цо даруги кьун нахъе ритIун руго, гьелги гьабизе жо лъачIого, рокъоре нахъруссун руго».
Перинаталияб централда гьеб къоялъ тохтурзаби гьечIин, нахъа мех букIиналъин абун бугила гьезда, нахъияб къоялъ радалиде яс гIакълъу-лъаялдасаги ун ятун йиго. Радал нахъеги хехаб кумекалъул машинаялда азарханалде ячиндал Централияб азарханаялъул лъимал гьарулеб рукъалъул тохтур квералги гIебеде ритIун чIун йигила, жидеца гьей къабул гьаюларилан.
МухIамадова Айгьанат: «Ясалъул бидул тIадецуй гIодобе ккезабизе кIоларого гIемер уколал гьарун руго азарханаялде щвелалдеги, гьений Инна абурай гIаданалъ къабул гьаюн гьечIо яс, добцояб азарханаяде айилан абун. ЦIияб азарханаялда хехаб кумекалъул машинаялда хIалтIулев васас ахIун гурого рачIун гьечIо тохтурзаби».
ГьабсагIат жидеца Прокуратураялде гIарза кьунила, кIиябго азарханаялъул тохтурзабазда тIасан, гьенире низам цIунулел рачIун, киналгIаги Узлипатил ищалда хурхарал къагътал росун ун ругила. гьединго хъванила гIарза сахлъи цIуниялъул Министерлъиялде, тохтурал хIалтIудаса нахъе рахъи тIалаб гьабунин баян гьабуна «Эркенлъи» радиоялъе Айгьанатица.
Хасавюрталъул Централияб азарханаялда цебе бугеб лъимал гьарулеб рукъалда сверухъ цереги рук1анила г1емер лъугьа-бахъинал, масала лъимер гьабулеб рукъалъул нухмалъулей Халимбегова Зарета сабаблъун гIумруялдаса ятIалъун йикIанила чIужугIадан, гьедин 4 соналъ цебе, кесарево чехь ссун лъимер гьабурай гIадан хведал, гьеб тIобитIараб операциялъухъ гьей гIаданалъул гIага-божаразухъа гIарац тIалаб гьабун хадуб гурого лъазе течIила гьелъ гьей хун йикIинин баян гьабуна «Эркенлъи» радиоялъе жиндир цIар абизе бокьичIев чияс, гьелдаса хадуб ахIи-хIур бахъун, гьей хIалтIудаса нахъе рехун йикIанила, амма гьанжеги гьениего тIадюссун ячIун йигила.
Азарханаял муниципалияб буголъиялдаса нахъе росун, сахлъи цIуниялъул Министерлъиялъул балансалде кьедал цIакъго гIемерлъанин тохтуразул гъалатIал, гьезул агъаз гьечIолъи сабаблъун кколел хвелал ругониги, цониги гьединал гъалатIал ккарал тохтурал хIалтIудаса рехун, яги тамихIалде цIан гьечIила.
МухIамадова Узлипатил гIагараз абулеб буго жидер яс сакъатай, чIобогояб гIумру бугей гIаданалде сверанила, жидеца тамихI тIалаб гьабулеб бугила цогидал эбелабазул ва лъималазул гьединаб къисмат ккечIого букIиналъе.
Гьеб тайпаялъул лъугьа-бахъинал цереги рукIана Дагъистаналда, 15 марталъ Каспийск шагьаралъул азарханаялда, тохтураз кIвар кьечIого тун, хун буго 10 моцI бараб лъимер, гьеб лъугьу-бахъиналъул хIасилалда сахлъи цIуниялъул Министерлъиялъ лъазабуна хал гьаби тIобитIулеб бугин, амма гьелдаса хадуб щибго хабар къотIана, цониги тамихIалде цIарав, яги хIалтIудаса вахъарав тохтурги ккечIо.
Лъималазул хвалда хурхун эбел-инсуца гIайиб гIунтIизабуниги тохтурал жидерго хIалтIуда хутIулел руго. Масала, кирего ун гьечIо ЦIунтIа мухъалъул азарханаялъул хIалтIухъаби. Гьезул гIайибалда хун букIана гьанже гьабураб лъимер, мухъалдаса МахIачхъалаялъул азарханаялде УАЗ машинаялда битIун. Лъимер хвараб улбуз Дагъистаналъул бетIерасухъе хъван букIана кагъат, амма гьелъул щибго хIасил ккун гьечIо.