Донбасалда унеб рагъулаб конфликталда официалияб Украиналъул 12 солдат чIвана, 24-яв лъукъана. Украиналъул рагъулав пресс-секретарь Андрей Лысенкоца абухъе, сепаратистаз гьабураб провокация сабаблъун хвана солдатал.
Машрикъалъул Украиналда ахIвал-хIал хIалуцараблъун хутIулеб бугин, лъазабуна Лысенкоца. БатIи-батIиял мухъазда кколел руго тунка-гIусиял. РакIалде щвезабила, 12 февралалда Минскалда гъулбасараб къотIи-къаялда рекъон, Украиналъул нухмалъиялъ ва сепаратистаз тунка-гIусиял чIезаризе кколел рукIана.
Гьединго 13 апрелалда Германиялъул, Франциялъул, Россиялъул ва Украиналъул къватIисел ишазул министрал дандчIвана Берлиналда. Донбасалда цIидасанго байбихьарал тунка-гIусиязул суал борхана данделъиялда. Кьвагьа-гIанхъиял чIезаризе кколин бицунеб букIана министраз. Араб соналъул апрелалдаса байбихьун Украиналда тIобитIулеб конфликталда 6 азаргоялдаса цIикIкIун чи хванаян абуна данделъиялда.
Украиналда бугеб ахIвал-хIалалъул гьединго бицине буго гьал къоязда букIине кколеб G7-cаммиталдаги.