Чехиялъул премьер-министр Богуслав Соботкаца какана жиндир улкаялъул президент Милош Земанил калам ва гьелдаса нахъе Цолъарал Штатазул илчи Эндрю Шапирода бараб конфликт.
ГьатIан къоялъ Земаница абуна жинца жиндирго резиденциялъул нуцIа гъосие къан бугин. Премьер-министр Соботкал рагIабазда рекъон гьадинал рагIаби дипломатикияб махшелгьечIолъиялда релъарал ругин ва президент цIодорго кIалъазе кколин.
Милош Земанил хиял буго 9 маялда Москваялде сапар бухьине Дунялалъул КIиабилеб рагъда бергьенлъи щваралдаса лъабкъоялда анцIго сон тIубай кIодо гьабулеб тадбиралда гIахьаллъи гьаби мурадалда.
Евроцолъияялъул церехъаби гьеб тадбиралде ине гьечIо Украиналда Россиялъ хIалтIизабулеб политикаялдаса разилъи гьечIолъи бихьизабун. Эндрю Шапироца Милош Земанил хиял какун хадусала, Чехиялъул президентасул ццим бахъун букIана.