Йеменалъул территориялда шиитал-хуситазул яргъид гIуцIарал радикалиял къокъабазул контролалда гъоркь ругел объектазда авиакьабиял щвезаруна мадугьалиял улкабазулгун дандбан СагIудиязул ГIарабиялъ.
Гьелъул хIакъалъулъ лъазабуна гьеб улкаялъул Цолъарал Штатазда вакил ГIабдель аль-Джубейрица. СагIудиязул ГIарабиялъул нухмалъиялда гъоркь гIуцIараб коалициялде гъорлъе унел руго ГIарабазул цолъарал эмиратал, Кувейт, Катар ва Бахрейн.
Вакиласул рагIабазда, операциялъул мурад ккола президент Абд-Раббу Мансур Хадица нухмалъулеб Йеменалъул «къанунияб хIукумат цIуни». Аль-Джубейрица инкар гьабуна Йеменалъул президент вугеб бакIалда хурхун комментариял гьаризе.