20 - 25 соналъ жидеца гIумру гьабун букIараб общежитиялдаса жал хасел бакьулъ къватIире рахъинарулел ругин абун разигьечIолъи буго хасал тIадкъаял тIуразарулеб полициялъул къукъаялъул (ОМОНалъул) хъизаназул. Гьез лъазабулеб буго жидеца гьениса нахъе ине инкар гьабидал жидее кIиго сордо-къоялъ токги газги свинабун бугилан. Щиб гьабунги жанисел ишазул министерлъиялъ жал гьеб общежитиялдаса нахъе инаризе къваригIун бугин бицана «Эркенлъи» радиоялъе ОМОНалдаги хIалтIун пенсиялде арав Юсупов ГIалица.
Юсупов ГIали: «Гъоркьисалаги исанаги буго гьеб ниж гьаниса нахъе рахъайин абун хабар. Гьаб нужее кколеб бакI гурилан абун, гIадамазул нерваби хвезарулел руго. ЧIванкъотIун цониги жанисел ишазул идараялъул хIакимасги абуларо нижеда гьаниса нахъе рахъайилан. Гьазда абун дозда абун, харбал щвезарула нижехъе. Цониги гьев хIакимги нижгун дандчIвалев гьечIо. Киназго абулеб буго республикаялъул жанисел ишазул министрасул буюрухъ бугила нуж гьаниса нахъе рахъинарейин абун. Ниж гьаниса нахъе рахъинаризе кколин абунаб цохIониги документги гьечIо жеги, я диваналъул хIукму гьечIо. Ниж нахъе рахъинариялъе ургъунго гьабураб жо буго гьаб газги токги свинаби. КIиго сордо-къоялъ гьечIо я газ, я ток я хинлъи. Квен гьабизе рес гьечIо, лъимал руго школалде инчIого рокъорго хутIун».
Гьел гIадамаз бицухъе 17 февралалда общежитиялде рачIун руго жанисел ишазул министерлъиялъул хIалтIухъаби ва гьез сваркаги гьабун ток рекIинабулеб бакIалъул нуцIа тIокIаб рагьун бажарулареб хIал гьабун буго. Гьениб гIумру гьабун ругез жидецаго ток биччачIого букIиналъе гьабураб жо бугин гьебилан лъазабун буго гьез. Юсупов ГIалица бицана жидеца МахIачхъалаялъул токалъул идараялде ахIанила жидер гьаниб гьадин ток сун бугин, гьеб къачIазе рачIайилан. Гьезул хIалтIухъаби общежитияллъул кIалтIу цIунун ругел низамцIунулез жанирецин къазе риччан гьечIо.
Общежитие бугеб минаялъул бащалъиялдасаги цIикIкIун бакI жанисел ишазул министерлъиялъул хIалтIулел бакIаз ккун руго. Гьеб рахъалдаги, аскIор ругел ОМОНалъул цойгидал минабахъги, цохIо гьоркьо бугеб гьеб цебехун рехсараб общежитиялда хутIун, киса кибего бугоан ток.
Жидерго бугеб къварилъи бицун общежитиялда гIумру гьабун ругез кагътал хъван руго Россиялъул президент Владимир Путинихъеги, Дагъистаналъул нухмалъиялъухъеги, Россиялъул ва Дагъистаналъул жанисел ишазул министразухъеги, жеги цониги бакIалдасан жидее жаваб щвечIин абулеб буго гьел гIадамаз. Жал кумек гьарун аскIоре аралщиназги лъазабулеб бугила нужер жанисел ишазул министрасулгун хурхен бокьун гьечIилан, Дагъистаалъул телевидениялде араб мехалда гьезги инкар гьабунила жидер захIмалъазабазул хIакъалъулъ бицинейилан абуна Юсупов ГIалица. Гьединго ГIалица бицана жидехъе баянал щванила гьаб общежитиялде цохIониги журналист виччагейин лъазабун бугила Дагъистаналъул жанисел ишазул министерлъиялъилан.
Гьеб общежитиялда гIумру гьабун ругелщинал ОМОНалъул хIалтIухъаби I993 соналдаса нахъе Дагъистаналда рукIаралщинал рагъулал лъугьа-бахъиназул гIахьалчагIиги кколел руго.
Юсупов ГIали: «Гьаниб гIумру гьабун ругелщинал жанисел ишазул хIалтIухъабаз ЦIияблак мухъалдаса бахъараб, Гъадарда букIараб рагъ-кьалалде гIунтIун гIахьаллъи гьабуна. Гьел рукIана гьединго Болъихъги, Чачаналъги. Гьедин къасилъи гьечIого къадлъи гьечIого хIалтIана ниж. Киназулго гIадин руго пачалихъалъ кьурал орденалгун медалалги. Республикаялда тIад захIматаб къо чIараб мехалда цохIо нижер къокъа букIана гьелъ кверчIвай гьабизе бегьулеб идара. Гьаб общежитиялда гIумру гьабу рукIаразул 60гIан чи чIвана ВатIан цIунулаго. Гьанир гIумру гьабун руго хIалтIуда сакъатлъи щварал, пенсионерал, гьаб сагIатги полициялъул кьерулъ ругел хIалтIухъабиги. Жеги хIалтIулел ругезе къойил хIинкъалаби кьолел руго гьаниса къватIире рахъинчIи хIалтIудаса нахъе реххизе ругилан».
Пачалихъалъе жидер ургъел гьечIила, анцI-анцI соналъ ВатIан цIунун хIалтIарал жидер россабазулги гьезул хъизаназулги пикру гьабулеб гьечIин абун ццин бахъун руго ОМОНалъул хIалтIухъабазул лъудби.
Тучалаева Хадижат: «Нилъер пачалихъалъ цIакъ ургъел гьабулеб буго Украинаялъул ва гьезул гIадамазул. Гьезде регIилалда цебе щай нилъерго гIадамазул тIалаб гьабулареб? 30 соналъ жанисел ишазул идарабазда хIалтIарал, рагъулел рукIал, къварилъиги къоги бихьарал гIадамал жакъа гьаб рокъоса къватIире рахъине кколел рагIула. Гьелъул лъиениги гьечIо ургъел. Украинаялде регIун руго гьел, нилъер пачалихъ Украинаялъе кумек гьабулеб бугебгIан мехалъ гьанир гьумру гьабулел ругел чагIи къварилъиялда рукIине кколел рагIула. Гьебго кинаб жо?»
Гьаб сагIат хIалтIуда ругел ОМОНалъулазда общежие хисун нужее Каспийскалда кьелин рукъзалин абун буго. Гьел рукъзалги жанир гIумру гьабун бажарунареб хIалалда ругила, гьениб я лъим, я газ я хинлъи гьечIилан абулеб буго гIадамаз. АскIоса гIебеде цохIониги школа яги лъималазул ах, поликлиника гьечIин, гьелда тIадеги жал киналго МахIачхъалаялда хIалтIилел ругила гьединлъидал гьенир кьурал рукъзал жидее къваригIун лъазабулеб буго гьез. ХIалтIуда ругезеги заманлъгIаги гьел Каспийскалда рукъзал кьолел ругила, пенсиялда ругезе щибниги щоларин лъазабунила, кирейила жал инелилан абун ццин бахъун руго ОМОНалъул пенсионаразул хъизаналги.
Дагъистаналъул жанисел ишазул пресс-хъулухъалъул нухмалъулев хисулев ИбрагьимхIажиев Русланица «Эркенлъи» радиоялъе бицана гьеб ОМОНалъулаз гIумру гьабун бугеб общежитиялъул мина кIиго соналъ административияблъун рикIкIине хIукму гьабун бугила министерлъиялъ. Гьединлъидал гIадамалги гьениса нахъе рахъинарун хIалтIулел бакIал гьаризе ругила гьеб бакIалдайин. Гьениса нахъе рахъинаризехъин ругел киналго гIадамазе Каспийскалда заманалъ рукъзал кьезе ругинги лъазабуна гьес. Ирга щвараб мехалда къануналда рекъон кколедухъ киналго полициялъул хIалтIухъабазе жалго бетIергьанаб рукъ-бакI кьезе бугин абуна ИбрагьимхIажиевас. Гьел Каспийскалда кьолел ругел рукъзабахъ киналгIаги хIажаталщинал шартIалги чIезарун ругила, гьенир гIумру гьабун ругез газалъухъ, токалъухъ гIарацги кьезе кколарила, гьеб кинабго пачалихъалъ кьолин абуна гьес.
Амма общежитиялда гIумру гьабун ругел ИбрагьимхIажиевасул рагIабазда божулел гьечIо. Жал гьаниса щиб гьабунги къватIире рахъинаризе къваригIун бугила гьезие, гьелдаса хадуб жидер къисматалъул ургъел бугев чиг гьечIин гьенивилан руго гIадамал.